សៀមរាប ៖ ដោយមានការអនុញ្ញតពីលោកស្នងការនគរបាលខេត្ត និងសម្របសម្រួលពីលោកព្រះរាជអាជ្ញាអមសាលាដំបូងខេត្តសៀមរាប នៅព្រឹកថ្ងៃទី១១ ខែមីនា ឆ្នាំ២០២០នេះកងកម្លាំងនគរបាល ផែនការងារសន្តិសុខ កម្លាំងការិយាល័យប្រឆាំងបទល្មើសបច្ចេកវិទ្យា សហការណ៍ កម្លាំងអធិការដ្ឋាននគរបាលក្រុងសៀមរាប បានធ្វើការនាំខ្លួនម្ចាស់គណនីហ្វេសប៊ុកម្នាក់ ដែលមានទីលំនៅបច្ចុប្បន្ន សង្កាត់ស្លក្រាម ក្រុងសៀមរាប ពាក់ព័ន្ធនឹងការបង្ហោះព័ត៌មានមិនពិត និងបំពុលសង្គម ធ្វើឱ្យប៉ះពាល់ដល់សន្តិសុខ សណ្តាប់ធ្នាប់សង្គមមកសាកសួរ។
ម្ចាស់គណនីហ្វេសប៊ុគ «ឡន លី គ្រួសាររីករាយ» ឈ្មោះ ភុត ថុនា ភេទប្រុសអាយុ៣២ឆ្នាំ មានទីលំនៅបច្ចុប្បន្ន ភូមិបឹងដូនប៉ា សង្តាត់ស្លក្រាម ក្រុងសៀមរាប ខេត្តសៀមរាប ពាក់ព័ន្ធនឹងការបង្ហោះព័ត៌មានមិនពិត និងបំពុលសង្គម កាលពីថ្ងៃទី៥ និងថ្ងៃទី១០ ខែមីនា ឆ្នាំ២០២០កន្លងទៅដែលធ្វើឱ្យប៉ះពាល់ដល់សន្តិសុខ សណ្តាប់ធ្នាប់សង្គមមកសាកសួរ។
ក្រោយសាកសួរ សាមីខ្លួនបានសារភាព ចំពោះមុខសមត្ថកិច្ច ហើយត្រូវបានសមត្ថកិច្ច កសាងសំណុំរឿងបញ្ជូនទៅ សាលាដំបូងខេត្តសៀមរាប ដើម្បីអនុវត្តនីតិវិធីបន្តតាមផ្លូវច្បាប់៕ ដោយ៖កូឡាប