ភ្នំពេញ៖ អ្នកជំនាញការជាន់ខ្ពស់នៃប្រទេសហូឡង់ មានបំណងស្នើសុំកិច្ចសហប្រតិបត្តិការល្អ ពីក្រសួងបរិស្ថាន ដើម្បីលើកទឹកចិត្តដល់សហគ្រាសធុនតូចនិងមធ្យមគិតគូរ ពីបរិស្ថានឱ្យកាន់តែប្រសើរថែមទៀត ខណៈគម្រោង CBI ធ្លាប់បានធ្វើការជាមួយសហគ្រាសធុនតូច និងមធ្យមនៅរាជធានីភ្នំពេញ និងខេត្តសៀមរាប ទាក់ទងនឹងការផលិតសម្ភារៈតុបតែងផ្ទះ ដើម្បីនាំចេញទៅកាន់ទីផ្សារអឺរ៉ុប។
លោកសាយ សំអាល់ រដ្ឋមន្រ្តីក្រសួងបរិស្ថាន នារសៀលថ្ងៃទី១១ ខែមីនា ឆ្នាំ២០២០ បានអនុញ្ញាតឱ្យប្រតិភូគម្រោង CBI ដឹកនាំដោយ លោក Jim Tersleeg អ្នកជំនាញការជាន់ខ្ពស់នៃប្រទេសហូឡង់ ចូលជួបពិភាក្សាការងារ និងសម្តែងការគួរសម នៅទីស្តីការក្រសួងបរិស្ថាន។
លោក Jim Tersleeg បានបញ្ជាក់ថា កន្លងមកគម្រោង CBI ធ្លាប់បានធ្វើការជាមួយសហគ្រាសធុនតូច និងមធ្យមនៅរាជធានីភ្នំពេញ និងខេត្តសៀមរាបទាក់ទងនឹងការផលិតសម្ភារៈតុបតែងផ្ទះ ដើម្បីនាំចេញទៅកាន់ទីផ្សារអឺរ៉ុប។
លោក Jim Tersleeg មានបំណងស្នើសុំកិច្ចសហប្រតិបត្តិការល្អ ពីក្រសួងបរិស្ថាន ដើម្បីលើកទឹកចិត្តដល់សហគ្រាសធុនតូច និងមធ្យមគិតគូរ ពីបរិស្ថានឱ្យកាន់តែប្រសើរថែមទៀត។
ក្នុងឱកាសនោះ លោករដ្ឋមន្រ្តី បានស្វាគមន៍ចំពោះគម្រោង ដែលគិតគូរលើវិស័យបរិស្ថាននៅកម្ពុជា។
លោក សាយ សំអាល់ បានលើកឡើងពីគម្រោងបង្កើតក្រុមការងារមួយ ដើម្បីសហការជាមួយគម្រោង ក្នុងរៀបចំផែនការសកម្មភាព គ្រប់គ្រងបរិស្ថានកាន់តែប្រសើរឡើងថែមទៀត ជាមួយសហគ្រាសធុនតូច និងមធ្យមនៅកម្ពុជា។
សូមបញ្ជាក់ថា គម្រោង CBI គឺជាភ្នាក់ងារសហគ្រិននៃប្រទេសហូឡង់ (ទទួលថវិកាពីក្រសួងការបរទេសនៃប្រទេសហូឡង់) ដែលផ្តោតលើកកម្ពស់ការនាំចេញពីបណ្តាប្រទេសកំពុងអភិវឌ្ឍន៍ ទៅទីផ្សារអឺរ៉ុប៕ដោយ៖កូឡាប