ប្រទេសអ៊ីតាលី នៅថ្ងៃពុធម្សិលមិញនេះ បានធ្វើការបិទហាងលក់ទំនិញទាំងអស់ទូទាំងប្រទេស លើកលែងតែឱសថស្ថាន និងហាងលក់ម្ហូបអាហារ ដើម្បីទប់ស្កាត់ការរាតត្បាតរបស់វីរុសកូរ៉ូណា ដែលបានឆក់យកជីវិតមនុស្សចំនួន ៨២៧នាក់ ត្រឹមរយៈពេល ២សប្តាហ៍។
នាយករដ្ឋមន្រ្តីអ៊ីតាលី លោក Giuseppe Conte បាននិយាយថា ការបិទអ្វីៗស្ទើគ្រប់យ៉ាងក្នុងប្រទេស នឹងបន្តរហូតដល់រយៈពេលយ៉ាងតិច ២សប្តាហ៍។
“ហាងទាំងអស់នឹងត្រូវបិទ លើកលែងតែកន្លែងចាំបាច់ដូច ឱសថស្ថាន និងហាងលក់ម្ហូបអាហារជាដើម”។
លោកនិយាយថា “បារ តៀម ភោជនីយដ្ឋាន ហាងអ៊ុតសក់ និងកន្លែងផ្តល់សេវាកម្មផ្សេងៗទៀតនឹងត្រូវបិទ ប៉ុន្តែអនុញ្ញាតឲ្យមានការដឹកជញ្ជូនដល់ផ្ទះ”។
លោកក៏បានថ្លែងប្រាប់ពលរដ្ឋអ៊ីតាលីថា កុំឲ្យប្រញ៉ាប់ទិញគ្រឿងទេសទុកអី។
សូមបញ្ជាក់ថា វីរុសកូរ៉ូណា ឬ COVID-19 មានការរាតត្បាតខ្លាំងនៅក្នុងប្រទេសអ៊ីតាលី ក្នុងរយៈពេលប៉ុន្មានសប្តាហ៍នេះ បណ្តាលឲ្យអ៊ីតាលីក្លាយជាប្រទេសទី ២ ដែលមានអ្នកស្លាប់ និងឆ្លងច្រើនបំផុតបន្ទាប់ពីប្រទេសចិន។ បើតាមតួលេខចុងក្រោយ នៅអ៊ីតាលី មានអ្នកឆ្លងវីរុសមរណៈនេះជាង ១២.០០០ករណី៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia