ភ្នំពេញ៖ រដ្ឋាភិបាលចិនបានផ្ដល់ជំនួយជាសម្ភារៈការិយាល័យ ដែលមានទឹកប្រាក់១លានយ័នដល់កម្ពុជា ដើម្បីសម្រួលដល់ការងាររបស់មន្ដ្រីរាជការបស់កម្ពុជា និងដើម្បីអនុវត្តភាពជាដៃគូយុទ្ធសាស្ត្រគ្រប់ជ្រុងជ្រោយកម្ពុជា-ចិន។
ពិធីប្រគល់ និងទទួលសម្ភារៈការិយាល័យនេះ ធ្វើឡើងក្រោមវត្តមានរបស់ លោកឧបនាយករដ្ឋមន្ត្រី ហោ ណាំហុង ប្រធានគណៈកម្មាធិការ សម្របសម្រួល អន្តររដ្ឋាភិបាលកម្ពុជា-ចិននិងលោក ស្យុងប៉ ឯកអគ្គរដ្ឋទូតសាធារណរដ្ឋប្រជាមានិតចិនប្រចាំកម្ពុជា កាលព្រឹកថ្ងៃទី១៧ ខែមករា ឆ្នាំ២០១៨ នៅទីស្តីការគណៈរដ្ឋមន្ត្រី។
លោក ស្យុងប៉ មានប្រសាសន៍ថា សម្ភារៈជំនួយឥតសំណងលើកនេះ គឺរដ្ឋាភិបាលចិនផ្ដល់ជូនកម្ពុជា បន្ទាប់ពីសន្និសិទកំពូលមេគង្គឡានឆាង លើកទី២ ដែលរៀបចំនៅកម្ពុជា ដែលថ្នាក់ដឹកនាំប្រទេសទាំងពីរ បានឯកភាពគ្នានៅឆ្នាំ២០១៧កន្លងមក។ លោកបញ្ជាក់ថា ភាគីចិនសង្ឃឹមថា ការផ្ដលជំនួយឥតសំណងទាំងអស់នេះ នឹងជួយកែលម្អ និងសម្រួលដល់ការងាររបស់មន្ដ្រីរាជការបស់កម្ពុជា ហើយជាផ្នែកមួយ ទាក់ទងនិងសន្និសីទអន្តររដ្ឋាភិបាលកម្ពុជា-ចិននៅឆ្នាំ២០១៨នេះដែរ។ លោកបានចាត់ទុកសន្និសីទ ក្រោមអតិបតីរបស់លោកឧបនាយករដ្ឋមន្ត្រី ហោណាំហុង និងលោក យ៉ាង ជាឈី សមាជិកក្រុមប្រឹក្សារដ្ឋាភិបាលចិន គឺជាគំរូដ៏ល្អមួយ សម្រាប់ប្រទេសកម្ពុជានិងប្រទេសចិន ក្នុងការពិភ្សាលើគ្រប់វិស័យ។
ក្នុងឱកាសនោះដែរ លោកឧបនាយករដ្ឋមន្ដ្រី ហោ ណាំហុង បានថ្លែងអំណរគុណ ចំពោះរដ្ឋាភិបាលចិន ដែលបានផ្ដល់ជំនួយជាគ្រឿងអេឡិចត្រូនិចជាច្រើនដែលមានទឹកប្រាក់សរុប១លានយ័ន សម្រាប់ការងារ គណៈកម្មាធិការ ដែលបានចូលរួមសម្រួល ការងាររបស់គណៈកម្មាធិការអន្តររដ្ឋាភិបាលកម្ពុជា-ចិន ដ៏សំខាន់ ដើម្បីអនុវត្តន៍ភាពជាដៃគូរយុទ្ធសាស្ត្រ គ្រប់ជ្រុងជ្រោយកម្ពុជា-ចិន។
គួរបញ្ជាក់ថា ការផ្ដល់ជំនួយសម្ភារៈនេះ គឺបានសម្រួលការងាររបស់គណៈកម្មាធិការអន្តររដ្ឋាភិបាលកម្ពុជា-ចិន ដើម្បី អនុវត្ដន៍ភាពជាដៃគូរយុទ្ធសាស្ដ្រគ្រប់ជ្រុងជ្រោយកម្ពុជា-ចិន ហើយសម្ភារៈដែលរដ្ឋាភិបាលចិនផ្ដល់ជូននេះ រួមមាន ម៉ាស៊ីនថតសម្លេង កុំព្យុទ័រ កុំព្យូទ័រយួរដៃ ម៉ាស៊ីនព្រីន និងសម្ភារៈការិយាល័យសំខាន់ៗជាច្រើនទៀត ព្រមទាំងរថយន្ត pick Up ចំនួនមួយគ្រឿង ដែលមានទឹកប្រាក់សរុបចំនួន១លានយ័ន ជូនគណៈកម្មាធិការសម្រួបសម្រួលអន្តររដ្ឋាភិបាលកម្ពុជា ចិន។
គណៈកម្មាធិការ សម្របសម្រួលអន្តររដ្ឋាភិបាលកម្ពុជា-ចិន មានតំណាងក្រសួងស្ថាប័នជាង២០ បានចូលរួម ។គណៈកម្មាធិការនេះ ប្រជុំ១ឆ្នាំម្តង នៅទីក្រុងភ្នំពេញ និងទីក្រុងប៉េកាំង ដឹកនាំដោយលោកឧបនាយករដ្ឋមន្ត្រី ហោណាំហុង និងលោក យ៉ាង ជាឈី សមាជិកក្រុមប្រឹក្សារដ្ឋាភិបាលចិន៕ ដោយ៖បញ្ញាស័ក្តិ