ភ្នំពេញ៖ រដ្ឋមន្ត្រីក្រសួងសាធារណការ បានប្រកាសថា ការថ្លឹងរថយន្តដឹកជញ្ជូននៅតាមបណ្តាស្ថានីយនឹងត្រូវប្រើប្រាស់ប្រព័ន្ធបច្ចេកវិទ្យា ដើម្បីរឹតបន្តឹង និងបង្កើនប្រសិទ្ធភាព ក្នុងការគ្រប់គ្រងរថយន្តដឹកលើសទម្ងន់ ព្រោះថារាជរដ្ឋាភិបាល បានខិតខំប្រឹងប្រែងរកថវិកា កសាងផ្លូវថ្នល់ដោយលំបាក។
ថ្ងៃពុធទី១១ ខែមីនា ឆ្នាំ២០២០ នៅទីស្ដីការក្រសួង លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំកិច្ចប្រជុំស្ដីអំពីវឌ្ឍនភាព នៃការគ្រប់គ្រង ដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ ដោយមានការចូលរួមពីសមាជិកសមាជិកា គណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ គណៈកម្មាធិការសម្របសម្រួល អចិន្រ្តៃយ៍ និងមន្ត្រីជំនាញពាក់ព័ន្ធក្រោមឱវាទក្រសួងផងដែរ។
លោករដ្ឋមន្រ្តី បានបញ្ជាក់ថា កិច្ចប្រជុំនេះ ធ្វើឡើងដើម្បីពិភាក្សាលើការងាររដ្ឋបាល ការងារហិរញ្ញវត្ថុ ការងារត្រួតពិនិត្យបច្ចេកទេសយានយន្ត និងដោះស្រាយបញ្ហាប្រឈម និងសំណូមពរទាំងឡាយ ដែលក្រុមការងារអនុវត្តជាក់ស្តែងបានលើកឡើង ក៏ដូចជាគម្រោងក្នុងការថ្លឹងរថយន្តដឹកជញ្ជូន នៅតាមបណ្តាស្ថានីយ ដែលនឹងប្រើប្រាស់ប្រព័ន្ធបច្ចេកវិទ្យា ដើម្បីរឹតបន្តឹង និងបង្កើនប្រសិទ្ធភាពក្នុងការគ្រប់គ្រងរថយន្តដឹកលើសទម្ងន់។
លោកទេសរដ្ឋមន្ត្រី បានក្រើនរំលឹកដល់មន្ត្រីតាមស្ថានីយជញ្ជីងទាំងអស់ ត្រូវគោរព និងអនុវត្តតាមច្បាប់ ឱ្យបានតឹងរ៉ឹងបំផុត ដើម្បីទប់ស្កាត់ការដឹកជញ្ជូនលើសទម្ងន់កម្រិតកំណត់ ដោយហេតុថា រាជរដ្ឋាភិបាល បានខិតខំប្រឹងប្រែងរកថវិកាកសាងផ្លូវថ្នល់ដោយលំបាក៕ដោយ៖បញ្ញាស័ក្តិ
