ខេត្តស្វាយរៀងៈ មនុស្សប្រុសស្រី៣នាក់ បានរងរបួសយ៉ាងដំណំ នៅក្នុងករណីគ្រោះថ្នាក់ចរាចណ៍មួយ រវាងរថយន្តនិងម៉ូតូ ដែលហេតុការណ៍ខាងលើនេះ បានកើតឡើងកាលពីវេលាម៉ោង ១៩ និង ២០ នាទីយប់ថ្ងៃទី ១១ ខែ មីនា ឆ្នាំ ២០២០ នៅលើផ្លូវលេខ១៣ ត្រង់ ចំណុច ភូមិត្រពាំងក្រែត ឃុំ ជ្រុងពពេល ស្រុក រំដួល រវាងម៉ូតូនិងរថយន្ត ក្នុងទិសដៅស្របគ្នាពីត្បូងទៅជើង។
សមត្ថកិច្ចបានឱ្យដឹងថាៈ អ្នកបើកបររថយន្តឈ្មោះ ពិន ធា ភេទប្រុសអាយុ ៣៥ឆ្នាំ មុខរបរ រត់តាក់ស៊ី មានទីលំនៅភូមិ នាងចាន់ ឃុំ ជ្រុងពពេល ស្រុករំដួល ខេត្តស្វាយរៀង ជិះរថយន្តម៉ាក ហាយលែនឌ័រ ពណ៌ទឹកប្រាក់ ផលិតឆ្នាំ ២០០៣ ពាក់ផ្លាកលេខ ស្វាយរៀង 2B.1239 បើកក្នុងទិសដៅពីត្បូង ទៅជើងមកដល់ចំណុចកើតហេតុ បានបត់ឆ្វេង ពេលនោះក៏មានម៉ូតូមួយគ្រឿងទៀត ដែលមកពីក្រោយ ស្របទិសគ្នាបានវ៉ាជែងរថយន្ត ហើយក៏បានបុករថយន្តផ្នែកខាងមុខ បណ្តាលឲ្យដួល។ រថយន្តខូចខាតធ្ងន់។
ប្រភពដដែលបានបន្តថាៈ អ្នកបើកបរម៉ូតូឈ្មោះ សាំ សារឿន ភេទ ប្រុស អាយុ ២៥ ឆ្នាំ មុខរបរ កសិកររស់នៅភូមិ ត្រពាំងក្នុង ឃុំថ្នាធ្នង់ ស្រុករំដួលខេត្ត ស្វាយរៀង ជិះម៉ូតូម៉ាក ហុងដា សេ១២៥ពណ៌ខ្មៅ ផលិតឆ្នាំ ២០១៧ ពាក់ផ្លាកលេខស្វាយរៀង 1K .3158 ពាក់មួកសុវត្ថិភាព រងរបួសស្រាលម៉ូតូខូចខាតធ្ងន់។ ដឹកអ្នករួមដំណើ ២នាក់ ទី១ ឈ្មោះ ពេទ្យ អូន ភេទស្រី អាយុ ៣៤ ឆ្នាំ មុខរបរ កម្មករ មិនពាក់មួកសុវត្ថិភាព រងរបួសស្រាល ទី២ ឈ្មោះ យឹម ឌីណា ភេទប្រុស អាយុ ២៣ ឆ្នាំ កសិករ មិនពាក់មួកសុវត្ថិភាព រងរបួស្រាល អ្នករួមដំណើទាំងពីររស់នៅភូមិឃុំជាមួយអ្នកបើកម៉ូតូ។ មូលហេតុ គឺដោយសាររថយន្តបត់ឆ្វេងខ្វះការប្រុងប្រយ័ត្ន។
បច្ចុប្បន្ន អ្នករងរបួសបញ្ជូនទៅសម្រាកព្យាបាល នៅមន្ទីរពេទ្យបង្អែកខេត្តស្វាយរៀង រីឯមធ្យោបាយយកមករក្សាទុកនៅ អធិការដ្ឋាននគរបាលស្រុករំដួល ដើម្បីចាត់ការបន្តទៅតាមផ្លូវច្បាប់៕ដោយ៖ វ៉ៃកូ
