កំពង់ឆ្នាំង ៖ យោងទៅតាមបណ្ដឹង របស់ម្ចាស់ដី ដែលបានប្ដឹង ដាក់ជូនទៅលោកព្រះរាជអាជ្ញាអមសាលាដំបូងខេត្តកំពង់ឆ្នាំងសមត្ថកិច្ចកងរាជអាវុធហត្ថខេត្ត ដឹកនាំដោយលោក ទី មនិន្ទ ព្រះរាជអាជ្ញារង អមសាលាដំបូងខេត្តកំពង់ឆ្នាំង នារសៀលថ្ងៃទី១២ខែមីនា ឆ្នាំ២០២០ បានចុះឃាត់គ្រឿងចក្រ កំពុងធ្វើសកម្មភាពលួចជីកយកអាចម៍ដីមួយកន្លែង ស្ថិតក្នុងភូមិដំបូកកកោះ ឃុំស្វាយជ្រុំ ស្រុករលាប្អៀរ ដោយពុំមាន ការអនុញ្ញាត្ត ពីម្ចាស់ដី។
ម្ចាស់ដី មាន ឈ្មោះ មិន ពុធជេដ្ឋានវណ្ណ ភេទប្រុស អាយុ៥១ ឆ្នាំ ជាមន្ត្រីរាជការផ្នែកសុខាភិបាល មានទីលំនៅរាជធានីភ្នំពេញ។ លោកថា បានទិញដីស្រែធ្វើស្រូវឡើងទឹក មួយកន្លែង ចំនួន ១ ហិកតា នៅចំណុចបឹងតម្រែក ស្ថិតក្នុងភូមិដំបូកកកោះ ឃុំស្វាយជ្រុំ ស្រុករលាប្អៀរ នៅក្នុងអំឡុងឆ្នាំ២០១៦ ហើយក៏បានកាន់កាប់អាស្រ័យផលរហូតមក ។
ស្រាប់តែនៅ ក្នុងអំឡុងពាក់កណ្តាលខែកុម្ភៈ ឆ្នាំ២០២០ មានឈ្មោះ ប៊ួយ មិញតាំ ភេទប្រុស អាយុ ៣២ ឆ្នាំ ជាជនជាតិវៀតណាម ប្រើប្រាស់អត្តសញ្ញាណប័ណ្ណសញ្ជាតិខ្មែរ បានដាក់គ្រឿងចក្រជា ច្រើនគ្រឿង ទៅជីកយកអាចម៍ដីរបស់គាត់ ដោយគ្មានការអនុញ្ញាត ទោះបីតែគាត់ហាមឃាត់យ៉ាងណាក៏ឈ្មោះប៊ួយ មិញតាំនេះមិនដែលស្ដាប់ដែរ។ក្រោយមកគាត់បានធ្វើពាក្យប្ដឹងទៅកាន់លោកមេឃុំស្វាយជ្រុំ ឱ្យ ជួយដោះស្រាយ លោកមេឃុំក៏បានកោះហៅឈ្មោះ បួយ មិនតាំ ទៅដោះស្រាយចំនួន ៣ លើកនៅសាលាឃុំ ប៉ុន្តែ មិនដែលចូលខ្លួនទៅដោះស្រាយ។
ម្ចាស់ដីរៀបរាប់ថាដោយហេតុនេះហើយទើបមកដាក់ ពាក្យប្ដឹងចូលទៅតុលាការដើម្បីចាត់ការតាមផ្លូវច្បាប់ ដោយទាមទារសំណងការខូចខាតចំនួន ២ រយលានរៀល ទាមទារឲ្យឈ្មោះនេះ ចាក់ដីលុប រណ្ដៅឱ្យដូចដើមវិញនិងសុំឲ្យ តុលាការ អនុវត្តទៅតាមផ្លូវច្បាប់ ។
លោក ព្រះរាជអាជ្ញារង បានឃាត់មេការម្នាក់ ដើម្បីយកទៅសាកសួរ ថាតើនរណាជាអ្នក បញ្ជាឲ្យជីកដីរបស់គេដោយគ្មានការអនុញ្ញាត។
ឈ្មោះ បួយ មិនតាំង ជាជនវៀតណាមប្រើប្រាស់ឈ្មោះខ្មែរ មានអត្តសញ្ញាណប័ណ្ណខ្មែរ បានទិញដីនៅតំបន់នោះ ដើម្បីអភិវឌ្ឍន៍ឲ្យប្រជាពលរដ្ឋរស់នៅផ្ទះបណ្ដែតទឹកឡើងគោក តាមគោលការរបស់ខេត្ត ។ ប៉ុន្តែ បាននិងកំពុង តែដាក់ គ្រឿងចក្រ ជីកកកាយយកអាចម៍ដីពីបឹងបុរាណ១កន្លែង ស្ថិតនៅក្នុងតំបន់២ គឺបឹងតម្រែកដែលត្រូវបានគេជីកយកអាចម៍ដីអស់ជាច្រើនសឹបហិកតា ដើម្បីយកមកចាក់លុបដីព្រៃលិចទឹកក្នុងតំបន់២នោះដែរ ក្នុងរូបភាពប្រែក្លាយទៅជាដីលំនៅដ្ឋាន ដោយរណ្ដៅដីនីមួយៗ ត្រូវបានគេជីកជំរៅពី៤ទៅ៥ ម៉ែត្រ៕ ដោយ៖បញ្ញាស័ក្តិ
