ភ្នំពេញ៖នគរបាលរាជធានីភ្នំពេញ រួមជាមួយនឹងនគរបាលមូលដ្ឋាន ដោយ មានការសម្របសម្រួលពីព្រះរាជអាជ្ញាផងនោះ បានចុះបង្ក្រាបករណីជួញដូរដោយខុសច្បាប់នូវសារធាតុញៀន នៅអតីតតំបន់បឹងកក់ ផ្លូវរថភ្លើង សង្កាត់ស្រះចក ខណ្ឌដូនពេញ ។
នៅថ្ងៃទី១២ ខែមីនា ឆ្នាំ២០២០ វេលាម៉ោង២២និង៥០នាទី ដោយបានការអនុញ្ញាតពីលោក សេង ហៀង ព្រះរាជអាជ្ញាររង នៃអយ្យការអមសាលាដំបូងរាជធានីភ្នំពេញ និងមានការចូលរួមពីលោក ផាន់ លីវ៉ា ជាក្រឡាបញ្ជីអម បានឲ្យមន្ត្រីអនុវត្តច្បាប់ នៃការិយាល័យប្រឆាំងគ្រឿងញៀន ចុះអនុវត្តបង្ក្រាបជាក់ស្តែង ករណីជួញដូរគ្រឿងញៀនខុសច្បាប់ នៅចំណុចលើផ្លូវបេតុង ភូមិ៣ ផ្លូវរថភ្លើង សង្កាត់ស្រះចក ខណ្ឌដូនពេញ ឃាត់ខ្លួនជនសង្ស័យម្នាក់ ឈ្មោះ អាន សៀវម៉ី ភេទស្រី អាយុ ២០ឆ្នាំ ជនជាតិខ្មែរ មុខរបរមិនពិតប្រាកដ ។
ដកហូតវត្ថុតាង ក្រាមសថ្លាមួយចំនួន និងបន្តឃាត់ខ្លួនជនសង្ស័យចំនួន២នាក់ទៀត ឈ្មោះ ជុំ សុខខឿន ភេទស្រី អាយុ ២៣ឆ្នាំ ជនជាតិខ្មែរ មុខរបរមិនពិតប្រាកដ និងឈ្មោះ សុខ រត្ន័ ភេទប្រុស អាយុ ២៥ឆ្នាំ ជនជាតិខ្មែរ មុខរបរមិនពិតប្រាកដ ។
ដកហូតវត្ថុតាងក្រាមសថ្លាចំនួន ៣៨កូនកញ្ចប់(តូច35 ធំ3)។ ជាបន្តឃាត់នៅចំណុចក្នុងផ្ទះសំណង់មិនរៀបរយ បានជនសង្ស័យចំនួ២នាក់ទៀតឈ្មោះ ដេត ឧត្តម ភេទប្រុស អាយុ ៣០ឆ្នាំ ជនជាតិខ្មែរ មុខរបរជាងបាញ់ថ្នាំរថយន្ត និងឈ្មោះ ឈឿន រក្សា ភេទប្រុស អាយុ ៣៦ឆ្នាំ ជនជាតិខ្មែរ មុខរបរនៅផ្ទះ ។ ដកហូតវត្ថុតាងក្រាមសថ្លាចំនួន ៣កូនកញ្ចប់ធំល្មម និងជញ្ជីងថ្លឹងគ្រឿងញៀនចំនួន១គ្រឿង។
ជាបន្តដោយបានការអនុញ្ញាតពីលោក សេង ហៀង ព្រះរាជអាជ្ញាររង បានឲ្យកម្លាំងសមត្ថកិច្ចបន្តធ្វើរដ្ឋបាលនៅចំណុចខាងលើ ឃាត់បានចំនួន៥១នាក់(ស្រី១នាក់) និងដកហូតម៉ូតូចំនួន២៣គ្រឿង។
បច្ចុប្បន្នជនសង្ស័យទាំងអស់ បាននាំមកការិយាល័យប្រឆាំងគ្រឿងញៀន ដើម្បីធ្វើការសាកសួរបន្ដតាមនីតិវិធី៕ ដោយ៖កូឡាប
