តាកែវ៖ ប្រជាពលរដ្ឋរស់នៅក្នុងក្រុងដូនកែវ ខេត្តតាកែវ ដែលធ្វើដំណើរឆ្លងកាត់តាមបណ្តោយផ្លូវជាតិលេខ ២ ផ្លូវនៅក្នុងក្រុង បានទទូចស្នើសុំឲ្យមន្ត្រីជំនាញនៃមន្ទីរសាធារណការណ៍និងដឹកជញ្ជូនខេត្តតាកែវ មេត្តាជួយចុះពិនិត្យលើការជួសជុល ពង្រីកផ្លូវនៅក្នុងក្រុងដូនកែវ ដោយក្រុមហ៊ុនម៉ៅការផ្តាច់មុខក្នុងខេត្តតាកែវនេះផង ព្រោះស្ថានភាពនៃការចាក់កៅស៊ូប្រភេទ AC នេះហាក់បីដូចជាស្តើងខ្លាំង មិនដូចទៅនិងការចាក់កៅស៊ូប្រភេទ AC ដូចគ្នាធ្វើផ្លូវជាតិលេខ២ កាលពីមុននោះឡើយដោយពីមុនសាច់កៅស៊ូប្រភេទ AC គឺមានកម្រាសដល់ទៅ ១តឹក២ ឯណោះ ហើយបើយកមកប្រៀបធៀបនិង ការជួសជុលកែលម្អ ពង្រីកផ្លូវក្នុងក្រុងដូនកែវនេះ គឺមានសភាពស្តើងខ្លាំង មែនទែន ពួកគាត់ជាពលរដ្ឋបាននាំគ្នានិយាយក្នុងនៃរិះគន់បន្តិចថា ប្រហែលជាក្រុមហ៊ុនទទួលគម្រោងពីខេត្ត រាប់ពាន់លានរៀលនេះ មានការចំណេញតិចហើយបានជាចាក់កៅស៊ូស្តើងបែបនេះ ។
ចំណែកឯការពង្រីកផ្លូវសងខាងមួយខ្សែទៀត នៅជួរមាត់បឹងតាកែវ មិនទាន់បានប៉ុន្មានផង ស្រាប់តែផ្លូវកៅស៊ូប្រភេទ AC មានរន្ធធ្លុះប្រហោងចូលទៅក្រោមទៅហើយ និងស្ថានភាពផ្លូវ មានទឹករលកថែមទៀត ដោយមិនមានរថយន្តធុនធ្ងន់បើកបរលើផ្លូវនេះផង ។ ពាក់ព័ន្ធជាមួយនិងការធ្វើផ្លូវហើយឆាប់ខូចទៅវិញនោះ បានធ្វើឲ្យប្រជាពលរដ្ឋក្នុងខេត្តតាកែវ សឹងតែបាត់បង់ជំនឿ ទៅលើការកសាងហេដ្ឋារចនាសម្ព័ន្ធក្នុងខេត្ត ដែលធ្វើឲ្យមានការខាតបង់ថវិកាជាតិយ៉ាងច្រើន ដូច្នេះសូមឲ្យក្រសួងពាក់ព័ន្ធ មេត្តាជួយចុះពិនិត្យលើបញ្ហានេះផង ៕ដោយ៖ តាកែវ