អ្នកស្រី Sophie ភរិយារបស់នាយករដ្ឋមន្រ្តីកាណាដា Justin Trudeau ត្រូវបានគេធ្វើតេស្តរកឃើញថា មានផ្ទុកវីរុសកូរ៉ូណា។ នេះបើតាមការបញ្ជាក់របស់ការិយាល័យនាយករដ្ឋមន្រ្តី កាលពីថ្ងៃព្រហស្បតិ៍ម្សិលមិញនេះ។
នៅក្នុងសេចក្តីប្រកាស បាននិយាយថា”អ្នកស្រី Sophie Gregoire Trudeau ត្រូវបានធ្វើតេស្តរកឃើញមានផ្ទុកវីរុស COVID-19 នៅថ្ងៃនេះ។ ការធ្វើតេស្តចេញលទ្ធផលវិជ្ជមាន”។
“ដោយមានការណែនាំផ្នែកវេជ្ជាសាស្រ្ត អ្នកស្រីនឹងស្នាក់នៅដាច់ដោយឡែកមួយរយៈ។ អ្នកស្រីមានស្ថានភាពល្អ និងទទួលយកការណែនាំទាំងអស់ ហើយរោគសញ្ញារបស់គាត់មិនធ្ងន់ធ្ងរនោះទេ”។
សេចក្តីប្រកាសបញ្ជាក់ទៀតថា នាយករដ្ឋមន្រ្តីកាណាដា វ័យ ៤៨ឆ្នាំ មានសុខភាពល្អ និងគ្មានរោគសញ្ញាទេ ប៉ុន្តែគាត់នឹងនៅតែស្ថិតនៅដាច់ដោយឡែករយៈពេល ១៤ថ្ងៃ ដែលនោះជាវិធានការប្រុងប្រយ័ត្នជាមុន។ លោកនឹងមិនត្រូវធ្វើតេស្តដើម្បីរកវីរុសនោះឡើយ។
“នាយករដ្ឋមន្រ្តីនឹងនៅតែបន្តបំពេញតួនាទីរបស់គាត់យ៉ាងពេញលេញដដែល ហើយនឹងត្រូវធ្វើការថ្លែងទៅកាន់ប្រជាពលរដ្ឋកាណាដា នៅថ្ងៃស្អែក”។
នាយករដ្ឋមន្រ្តីកាណាដា លោក Justin Trudeau និងភរិយារបស់គាត់បានប្រកាសដំបូងថា ពួកគេបានដាក់ខ្លួនឯងឲ្យនៅដាច់ដោយឡែក ខណៈភរិយាគាត់បានធ្វើតេស្តរកវីរុស ក្រោយពេលត្រឡប់មកពីការធ្វើការថ្លែងសន្ទរកថា។
រហូតមកដល់ពេលនេះ រោគសញ្ញារបស់អ្នកស្រី មានដូចជាគ្រុនក្តៅកម្រិតទាប។
សូមបញ្ជាក់ថា ប្រទេសកាណាដាមានអ្នកឆ្លងវីរុសកូរ៉ូណាសរុបជាង ១៣០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia