មន្រ្តីការទូតចិនម្នាក់បានធ្វើការអះអាងថា យោធាអាមេរិចប្រហែលជាអ្នកនាំយកវីរុសកូរ៉ូណាមកចិន។ ទោះយ៉ាងណា លោកមិនបានផ្តល់ភស្ថុតាងលើការអះអាងនោះឡើយ។
លោក Zhao Lijian អ្នកនាំពាក្យក្រសួងការប្រទេសចិន បានធ្វើការអះអាងបែបនេះនៅលើបណ្តាញសង្គម Twitter កាលពីថ្ងៃព្រហស្បតិ៍។ កាលពីពេលកន្លងទៅធ្លាប់មានការលើកឡើងនៅលើបណ្តាញសង្គមចិនថា អាមេរិចជាអ្នកបង្កើតវីរុស។
ប្រធានមជ្ឈមណ្ឌលបង្ការ និងគ្រប់គ្រងជំងឺរបស់ចិន ធ្លាប់បានអះអាងដោយខ្លួនឯងថា ប្រភពនៃវីរុសនោះគឺមកពីសត្វព្រៃដែលគេលក់នៅទីផ្សារ ក្នុងទីក្រុងវូហាន។
ប៉ុន្តែកាលពីប៉ុន្មានថ្ងៃថ្មីៗនេះ មន្រ្តីចិន និងអ្នកជំនាញសុខាភិបាល បានអះអាងថា វីរុសប្រហែលមានប្រភពចេញពីកន្លែងផ្សេង ខណៈដែលទីក្រុងប៉េកាំងខឹងសម្បារយ៉ាងខ្លាំង និងបានវាយបកត្រឡប់ទៅអាមេរិចវិញ ក្រោយពេលមន្រ្តីអាមេរិចបានហៅវីរុសនោះថា “វូហានវីរុស”។
នៅលើ Twitter លោក Zhao Lijian បានបង្ហោះវីដេអូរបស់ប្រធានមជ្ឈមណ្ឌលបង្ការ និងគ្រប់គ្រងជំងឺរបស់អាមេរិច (CDC) ដែលបានធ្វើការបកស្រាយនៅក្នុងសភាថា ប្រជាជនអាមេរិចមួយចំនួនដែលត្រូវគេជឿជាក់ថា ស្លាប់ដោយសារជំងឺផ្តាសាយ គឺមានផ្ទុកវីរុសកូរ៉ូណា (COVID-19)។
ជុំវិញការបកស្រាយរបស់ប្រធាន CDC អាមេរិច ត្រូវបានលោក Zhao Lijian ដាក់សំណួរថា តើអ្នកជំងឺសូន្យនៅអាមេរិចាប់ផ្តើមមាននៅពេលណា? តើមនុស្សប៉ុន្មាននាក់ឆ្លងវីរុស? តើមន្ទីរពេទ្យទាំងនោះឈ្មោះអ្វី?
លោកលើកឡើងថា “យោធាអាមេរិចប្រហែលជាអ្នកនាំយកវីរុសមកកាន់វូហាន វាច្បាស់ណាស់។ ផ្សព្វផ្សាយទិនន្ន័យរបស់អ្នក (អាមេរិច)ជាសាធារណៈមក។ អាមេរិចជំពាក់យើង នូវការបកស្រាយ”។
មន្រ្តីចិនខ្លួនឯង ធ្លាប់រងការចោទប្រកាន់ថា បានប៉ុនប៉ងលាក់ព័ត៌មាននៃការផ្ទុកវីរុស ខណៈដែលប៉ូលិសនៅក្នុងទីក្រុងវូហាន ស្តីបន្ទោស និងបំបិតមាត់វេជ្ជបណ្ឌិត ដែលបានប្រកាសអាសន្នពីវីរុស កាលពីដើមខែធ្នូ។
មន្រ្តីអាមេរិច បានធ្វើឲ្យចិនខឹងសម្បារ ដោយបានធ្វើការហៅវីរុសនោះថាជា “វូហានវីរុស”។
ចំពោះការហៅវីរុសថាជាវីរុសវូហាន ដោយមន្រ្តីអាមេរិច ត្រូវបានក្រសួងការប្រទេសចិនច្រានចោលពាក្យនោះ និងបានចាត់ទុកវាថា ជាការប្រមាថមើលងាយ និងមិនគោរពចំពោះវិទ្យាសាស្រ្ត។
សូមបញ្ជាក់ថា ចំនួនអ្នកស្លាប់ដោយសារវីរុសមរណៈខាងលើ បានកើនឡើងដល់ជិត ៥.០០០នាក់ ខណៈការឆ្លងមានជាង ១០០.០០០ករណី៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
