ភ្នំពេញ៖ ក្រសួងសាធារណការ និងដឹកជញ្ជូន បានប្រកាសផ្អាកដោយមិនអនុញ្ញាតឱ្យនាវាដឹកអ្នកដំណើរ ឬអ្នកទេសចរចូលមកកម្ពុជាតទៀតទេ ដើម្បីទប់ស្កាត់ការឆ្លងរីករាលដាលជំងឺរលាកសួតប្រភេទថ្មី បណ្តាលមកពីវីរុសCOVID-19 ។
លិខិតរបស់ក្រសួងសាធារណការ និងដឹកជញ្ជូន ដែលចុះហត្ថលេខាដោយលោកអគ្គនាយក ម៉ក់ ស៊ីដេត នៅថ្ងៃទី១៣ ខែមីនា ឆ្នាំ២០២០នេះឲ្យដឹងថា អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ ជម្រាបជូន ម្ចាស់នាវា និងភ្នាក់ងារនាវា នៃនាវាដឹកអ្នកដំណើរ ឬអ្នកទេសចរ ស្តីពីការផ្អាកអនុញ្ញាតចូលនៃនាវាដឹកអ្នកដំណើរ ឬអ្នកទេសចរមកក្នុងព្រះរាជាណាចក្រកម្ពុជា ដោយយោងតាមការចាំបាច់ក្នុងការបង្ការការរីករាលដាលនៃជំងឺឆ្លង COVID-19 ពីអ្នកដំណើរបរទេស ដែលធ្វើដំណើរតាមនាវា អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ សម្រេចផ្អាកការអនុញ្ញាតចូល នៃនាវាដឹកអ្នកដំណើរ ឬអ្នកទេសចរ ចូលមកក្នុងព្រះរាជាណាចក្រកម្ពុជាថ្ងៃនេះ តទៅ រហូតដល់មានការសម្រេចជាថ្មី។
អាស្រ័យហេតុដូចបានជម្រាបជូនខាងលើ សូមលោក លោកស្រីជាប្រធាន ឬតំណាងក្រុមហ៊ុន ភ្នាក់ងារនាវា នៃនាវាដឹកអ្នកដំណើរ ឬអ្នកទេសចរទាំងអស់ ជ្រាបជាព័ត៌មាន និងអនុវត្តប្រកបដោយប្រសិទ្ធភាព ៕ ដោយ ៖ កូឡាប