ភ្នំពេញ ៖ ស្នងការដ្ឋាននគរបាលរាជធានីភ្នំពេញ បានចេញប្រកាសពីលទ្ធផលត្រួតពិនិត្យរឹតបន្តឹងច្បាប់ចរាចរណ៍ផ្លូវគោក នៅយប់ថ្ងៃព្រហស្បតិ៍ ទី១២ ខែមីនា ឆ្នាំ២០២០ គឺបាន ឃាត់បានរថយន្ត ១៣ គ្រឿង, ឃាត់បានម៉ូតូ ២៥៥ គ្រឿង សរុបឃាត់បានរថយន្ត និងម៉ូតូ ចំនួន ២៦៨ គ្រឿង , អ្នកបើកបររថយន្តក្នុងស្ថានភាពស្រវឹង ១៣ នាក់, អ្នកបើកបរម៉ូតូក្នុងស្ថានភាពស្រវឹង ៣១ នាក់ , អ្នកបើកបរអត់ពាក់មួកសុវត្ថិភាព និងអត់កញ្ចក់ ២៣៣ នាក់ និងករណីគ្រឿងញៀន ១០ នាក់។
លោកឧត្តមសេនីយ៍ឯក ស ថេត បានជំរុញឱ្យមានការអនុវត្ត រឹតបន្តឹងច្បាប់ចរាចរណ៍ផ្លូវគោកឱ្យបានតឹងរ៉ឹងបំផុត មិនត្រូវរាថយនោះឡើយ។ ត្រូវធ្វើសកម្មភាពឱ្យបានហ្មត់ចត់ អនុវត្តស្មើភាពគ្នា គ្មានការអន្តរាគមន៍នោះឡើយ ចំពោះអ្នកបើកបរល្មើសច្បាប់ចរាចរណ៍។ នៅយប់ថ្ងៃទី៣ ត្រូវធ្វើឱ្យបានល្អជាងមុនថែមទៀត។
ក្រោយពីមានការចុះអនុវត្តច្បាប់ចរាចរណ៍ផ្លូវគោកនៅយប់ដំបូង គឺពិនិត្យឃើញថា កម្លាំងនគរបាលអនុវត្តច្បាប់បំពេញភារកិច្ចនៅខ្វះចន្លោះមួយចំនួន អនុវត្តការងារ បច្ចេកទេសជំនាញមិនទាន់សមស្របនោះឡើយ។ នេះបើតាមការលើកឡើងរបស់ លោក ឧត្តមសេនីយ៍ឯក ស ថេត កិច្ចការងារនេះ ត្រូវកែប្រែសម្រួលឡើងវិញ ចាត់បែងចែងកម្លាំងឱ្យមានការទទួលខុសត្រូវរៀងៗខ្លួន អនុវត្តការងារឱ្យមានប្រសិទ្ធភាពនិងតម្លាភាព និងការគោរពច្បាប់ ។ នៅយប់ថ្ងៃទី២ នៃការរឹតបន្តឹងអនុវត្តច្បាប់ចរាចរណ៍ ក៏មានលោកឧត្តមសេនីយ៍ត្រី សរ សំណាង ស្នងការរង ( រងរបួសស្រាល) លោកអនុសេនីយ៍ឯក លាង បណ្ឌិត នាយរងផ្នែក នៃការិយាល័យអន្តរាគមន៍ពិសេស (រងរបួសធ្ងន់ត្រង់ក្បាល) លោកព្រិន្ទបាលទោ ហុង សង្វាត មន្ត្រីនៃការិយាល័យអន្តរាមន៍ ( រងរបួសស្រាល ) ដែលបង្កដោយបុរសម្នាក់ឈ្មោះ ឆាយ គឹមហួង អនុប្រធានការិយាល័យក្រសួងទេសចរណ៍ បើកបរក្នុងស្ថានភាពស្រវឹងខ្លាំង (មានកម្រិតជាតិអាកុល ០,៧៨មិល្លីត្រខ្យល់ ) មកបុកកម្លាំងចម្រុះនៅវេលាម៉ោង២២និង៥០នាទីយប់ ស្របពេលដែលលោកស្នងការរងកំពុងដឹកនាំកម្លាំងប្រជុំជួរ ដើម្បីអនុវត្តរឹតបន្តឹងច្បាប់ចរាចរណ៍ផ្លូវគោក នៅតាមបណ្តោយមហាវិថីព្រះមុនីវង្ស មុខវត្តកោះ ខណ្ឌដូនពេញ។
ចំណែកនៅយប់ ថ្ងៃទី៣ ដែលជាថ្ងៃទី១២ ខែមីនា ឆ្នាំ២០២០កម្លាំងចម្រុះបានអនុវត្តរឹតបន្តឹងច្បាប់ចរាចរណ៍ផ្លូវគោកដោយ ឃាត់បានរថយន្ត ១៣ គ្រឿង និង ឃាត់បានម៉ូតូ ២៥៥ គ្រឿង សរុបឃាត់បានរថយន្ត និងម៉ូតូ ចំនួន ២៦៨ គ្រឿង ហើយអ្នកបើកបររថយន្តក្នុងស្ថានភាពស្រវឹងមានចំនួន ១៣ នាក់ និងអ្នកបើកបរម៉ូតូក្នុងស្ថានភាពស្រវឹងមានចំនួន ៣១ នាក់, អ្នកបើកបរអត់ពាក់មួកសុវត្ថិភាព និងអត់កញ្ចក់ចំនួន ២៣៣ នាក់ ។ ក្នុងនោះក៏មានករណីគ្រឿងញៀនចំនួន ១០ នាក់ផងដែរ ។
គួរបញ្ជាក់ដែរថា ការចុះអនុវត្តរឹតបន្តឹងច្បាប់ចរាចរណ៍ផ្លូវគោក នៅក្នុងរាជធានីភ្នំពេញអនុវត្តទៅលើអ្នកបើកបរក្រោមឥទ្ធិពលគ្រឿងស្រវឹង និង អ្នកបើកល្បឿនលឿននៅពេលយប់។ អត្រាគ្រោះថ្នាក់ចរាចរណ៍នៅពេលយប់បានកើនឡើងគួរឱ្យព្រួយបារម្ភ ផ្តើមចេញពីអ្នកបើកបរស្រវឹងស្រា ៕ដោយ៖បញ្ញាស័ក្តិ
