ភ្នំពេញ៖ បន្ទាប់ពីមានគណនីហ្វេសប៊ុកឈ្មោះ San Prum ដែលបានចុះផ្សាយថា ផ្លុំជាតិអាល់កុលផ្សងនឹងគ្រោះថ្នាក់ COVID 19 ស្នងការដ្ឋាននគរបាលរាជធានីភ្នំពេញ បានបដិសេធទាំងស្រុងចំពោះការផុសនេះ ហើយថា ការផ្លុំដើម្បីត្រួតពិនិត្យជាតិអាល់កុល គឺឧបករណ៍១ ប្រើបានសម្រាប់តែមនុស្សម្នាក់ប៉ុណ្ណោះ ក្រោយពីពិនិត្យរួចឧបករណ៍នោះ ត្រូវបានបោះចោល ហើយអ្នកថ្មីគឺតែងតែប្រើប្រាស់ឧបករណ៍ថ្មីជានិច្ច។
ស្នងការដ្ឋាននគរបាលរាជធានីភ្នំពេញ នៅថ្ងៃទី១៣ខែមីនាឆ្នាំ២០២០នេះ បានចេញសេចក្តីបកស្រាយបំភ្លឺរបស់ក្រុមព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ ទៅនឹងគណនីហ្វេសប៊ុកមួយដែលមានឈ្មោះ San Prum ដែលបានចុះផ្សាយថា ( ផ្លុំជាតិអាល់កុលផ្សងនឹងគ្រោះថ្នាក់ COVID 19 ? ) ស្នងការនគរបាលរាជធានីភ្នំពេញ សូមធ្វើការបដិសេធទាំងស្រុងចំពោះការផុសនេះ ដែលអាចធ្វើឲ្យប្រជាពលរដ្ឋមានការយល់ច្រឡំ ។
កម្លាំងចម្រុះនៃស្នងការនគរបាលរាជធានីភ្នំពេញ តែងតែខិតខំបម្រើប្រជាពលរដ្ឋ ទាំងថ្ងៃ ទាំងយប់ ព្រោះតែដើម្បីការពារសុខសុវត្ថិភាពជូនប្រជាពលរដ្ឋ ជាពិសេសការរឹតបន្តឹងច្បាប់ចរាចរណ៍ផ្លូវគោក គឺក្នុងគោលបំណងដើម្បីកាត់បន្ថយគ្រោះថ្នាក់ចរាចរណ៍នៅពេលយប់ដោយការបើកបរក្នុងស្ថានភាពស្រវឹង ក៏ដូចជាមិនពាក់មួកសុវត្ថិភាព ។
ជាពិសេសរាល់ការផ្លុំដើម្បីត្រួតពិនិត្យជាតិអាល់កុល គឺឧបករណ៍១ ប្រើបានសម្រាប់តែមនុស្សម្នាក់ប៉ុណ្ណោះ ក្រោយពីពិនិត្យរួចឧបករណ៍នោះ ត្រូវបានបោះចោល ហើយអ្នកថ្មីគឺតែងតែប្រើប្រាស់ឧបករណ៍ថ្មីជានិច្ច ។
បើតាមការផ្សារលើផេកហ្វេសប៊ុក San Prum កាលពីថ្ងៃទី១២ខែមីនា បានឲ្យដឹងថា” ផ្លុំអាល់កុលផ្សងនឹងគ្រោះថ្នាក់Covid19???
រវាងស្រវឹងបើកបរនិងផ្លុំអាល់កុល បំពុងតែ១ច្រើននាក់ វាសុទ្ធតែជាបញ្ហាប្រឈមនឹងគ្រោះថ្នាក់ ដល់ជីវិតដូចគ្នា។ ក្នុងសម័យរោគឆ្លង Covid-19 មហាកាចសាហាវនេះ....តើសមត្ថកិច្ចចម្រុះ ត្រួតជាតិស្រវឹងពេលយប់ មានវិធីដោះស្រាយ ឲ្យបានល្អទេ????
សូមថ្នាក់ដឹកនាំ ខាងសុវត្ថិភពចរាចរណ៍ មេត្តា ជួយបកស្រាយផង….”៕ដោយ៖កូឡាប
