ខេត្តកោះកុង៖ លោកឧកញ៉ា ទៀ វិចិត្រ អគ្គនាយកក្រុមហ៊ុន ជី.ធី.វី.ស៊ី, ស្ពីដបូត កម្ពុជា (G.T.V., SPEED BOAT CAMBODIA) និងជាប្រធានក្រុមការងារមនុស្សធម៌អូរបី(O3) ប្រចាំខេត្តព្រះសីហនុ មានប្រសាសន៍ថា ស្របពេលដែលធាតុអាកាសកំពុងឡើងកម្តៅខ្លាំង នារដូវប្រាំងឆ្នាំនេះ រូបលោកបានដឹកនាំក្រុមការងារចុះជួបសួរសុខទុក្ខ និងនាំយកជំនួយឧបត្ថម្ភរួមមាន៖ គ្រឿងឧបភោគបរិភោគ ម្ហូបអាហារ ថ្នាំពេទ្យ សម្ភារៈប្រើប្រាស់ និងថវិកាមួយចំនួនយកទៅផ្តល់ជូន វិរៈយុទ្ធជនកងទ័ពជើងទឹកប្រចាំការ នៅលើកោះមួយ ក្នុងដែនសមុទ្រកម្ពុជា មានឈ្មោះថាកោះកុងក្រៅ មានទីតាំងស្ថិតនៅក្នុងខេត្តកោះកុង។
លោកឧកញ៉ា ទៀ វិចិត្រ បញ្ជាក់ថា ជំនួយឧបត្ថម្ភខាងលើនេះ បាននាំយកទៅផ្តល់ជូន កាលពីព្រឹកថ្ងៃទី១៣ ខែមីនា ឆ្នាំ២០២០ ដោយមានអមដំណើរជាមួយ លោក ឧត្តមនាវីឯក ទៀ សុខា មេបញ្ជាការរងកងទ័ពជើងទឹក និងជាមេបញ្ជាការទីបញ្ជាការជួរមុខគណៈកម្មាធិការជាតិសន្តិសុខលម្ហសមុទ្រផងដែរបានចូលរួម។
លោកឧញ៉ា ទៀ វិចិត្រ បន្តថា ការបចុះសួរសុខទុក្ខកងទ័ពជើងទឹក នៃកងការពារកោះកុងក្រៅលេខ២ នៅពេលនេះ ក៏ដើម្បីជាការលើកទឹកចិត្តដល់ បងៗវីរកងទ័ពជើងទឹក នៅមុនពិធីបុណ្យចូលឆ្នាំប្រពៃណីជាតិខ្មែរ នឹងចូលមកដល់ក្នុងពេលឆាប់ៗនេះ។
នាឱកាសជួបសំណេះសំណាល និងជូនពរវីរយុទ្ធជនកងទ័ពជើងទឹក ដែលកំពុងឈរជើងតស៊ូការពារដែនកោះទាំងអស់ របស់កម្ពុជា លោកឧកញ៉ា ទៀ វិចិត្រ ក៏បានប្រកាសចេញថវិកាអស់រាប់ម៉ឺនដុល្លារទៀត ដើម្បីជួយសាងសង់អាគារទីបញ្ជាការកងការពារកោះកុងក្រៅលេខ២មួយខ្នង ជូនកងទ័ពនៅលើកោះខាងលើនេះ រហូតរួចរាល់ជាស្ថាពរ និងបានឧបត្ថម្ភថវិកាដាច់ដោយឡែកចំនួន១០០០ដុល្លារអាមេរិកផ្សេងទៀត ជូនកងទ័ពមួយរូប ដែលកំពុងមានជំងឺប្រចាំកាយ(ពិការ) សម្រាប់ប្រើប្រាស់បន្ថែមលើការព្យាបាលដោយអង្គភាពទ័ពកន្លងមក៕ ដោយ៖ ដែន សីមា