ភ្នំពេញ៖ ក្រសួងសាធារណការ និងដឹកជញ្ជូន បានចេញសេចក្តីប្រកាសព័ត៌មាន ឲ្យផ្អាកការអនុញ្ញាតចូលនៃនាវាដឹកអ្នកដឹកដំណើរ ឬដឹកអ្នកទេសចរ មកប្រទេសកម្ពុជា ដើម្បីទប់ស្កាត់នៃការរីករាលដាល នៃជំងឺឆ្លងកូវីដ១៩ តាមច្រកអន្តរជាតិក្អមសំណ ខេត្តកណ្តាល។
សេចក្តីប្រកាសព័ត៌មានរបស់ក្រសួងសាធារណការ គឺសម្រេចផ្អាកតែ ច្រកអន្តរជាតិក្អមសំណ ក្នុងខេត្តកណ្តាលតែប៉ុណ្ណោះ។
ការសម្រេចផ្អាកនេះ ធ្វើឡើងក្រោយពេលកម្ពុជារកឃើញភ្ញៀវបរទេសជនជាតិអង់គ្លេសចំនួន ៣នាក់ហើយដែលបានធ្វើដំណើរតាមនាវាទេសចរណ៍មានផ្ទុកជំងឺកូវីដ-១៩ ឬ កូរ៉ូណា ក្រោយពេលនាវានោះបានចុះចតនៅទីរួមខេត្តកំពង់ចាម។
ក្នុងលិខិតជម្រាបជូនម្ចាស់នាវា និងភ្នាក់ងារនាវាដឹកអ្នកដំណើរ ឬដឹកភ្ញៀវទេសចរ របស់អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ នៃក្រសួងសាធារណការ និងដឹកជញ្ជូន នៅថ្ងៃទី១៣មីនានេះ បានបញ្ជាក់ថា ការសម្រេចផ្អាកមិនឱ្យនាវាដឹកអ្នកដំណើរ ឬភ្ញៀវទេសចរចូលកម្ពុជា តាមច្រកក្អមសំណនេះ ចាប់អនុវត្តពីថ្ងៃនេះតទៅ រហូតដល់មានការសម្រេចជាថ្មី។
លិខិតដដែលបានសរសេរទៀតថា អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ សម្រេចផ្អាកជាបណ្តោះអាសន្ន លើការអនុញ្ញាតចូលនាវាទេសចរណ៍មកព្រះរាជាណាចក្រកម្ពុជា តាមច្រកអន្តរជាតិក្អមសំណ ពីថ្ងៃនេះតទៅ រហូតដល់មានសេចក្តីសម្រេចជាថ្មី។
លិខិតដដែលនេះ ក៏បានប្រកាសនារាករណ៍ ឬលុបចោល លើខ្លឹមសារលិខិតចុះលេខ៥៧០ សក. ដជទ ចុះថ្ងៃទី១៣ ខែមីនា ឆ្នាំ២០២០ នៅមុននេះបន្តិច។ ខ្លឹមសារលិខិតទី១ លិខិតលេខ៥៧០ សក. ដជទ របស់អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ គឺបានសម្រេចផ្អាកមិនឱ្យនាវាដឹកអ្នកដំណើរ ឬនាវាដឹកភ្ញៀវទេសចរទាំងអស់ ចូលមកកម្ពុជាជាបណ្តោះអាសន្នតែម្តង។ លិខិតនោះបានបញ្ជាក់ពីមូលហេតុចាំបាច់ក្នុងការសម្រេចផ្អាកនោះថា ដើម្បីទប់ស្កាត់ការរីករាលដាលនៃជំងឺកូរ៉ូណាបន្ថែមទៀត។
ក្រសួងសុខាភិបាលបានចេញសេចក្តីប្រកាសព័ត៌មាន បញ្ជាក់ថា សំណាកចេញដោយវិទ្យាស្ថានប៉ាស្ទ័រកម្ពុជា ដោយពិនិត្យលើអ្នកដំណើរលើនាវាទេសចរណ៍មួយគ្រឿងឈ្មោះ Viking Cruise Journey បានចូលចតនៅក្នុងខេត្ដកំពង់ចាម មានចំនួនសរុប៦៤នាក់ ហើយជាលទ្ធផលរកឃើញថាជនជាតិអង់គ្លេស៣នាក់ ក្នុងនោះស្រីពីរនាក់ មានផ្ទុកជំងឺឆ្លង COVID-19។ ស្រ្តីអង់គ្លេសម្នាក់រកឃើញថាមានផ្ទុកជំងឺរលាកផ្លូវដង្ហើមនេះកាលពីថ្ងៃទី១០ ខែមីនា ដោយឡែកប្តីប្រពន្ធពីរនាក់ទៀត ត្រូវបានរកឃើញថាផ្ទុកជំងឺកូរ៉ូណានៅថ្ងៃទី១២ ខែមីនា៕
