នេះអាចចាត់ទុកជាលើកដំបូង ក្នុងប្រវត្តិសាស្ត្រ ដែលជំងឺមរណៈថ្មី Covid-19 ដែលកំពុងវាយលុកស្ទើរទូទាំងពិភពលោក ។ ក្នុងនោះ នៅក្នុងប្រទេសកម្ពុជាយើង ជាពិសេសនៅខេត្តសៀមរាប កំពុងប្រឈមបញ្ហានេះជាខ្លាំង ដែលរហូតដល់រាជរដ្ឋាភិបាលប្រកាសបិទសាលារៀននៅក្រុង-ខេត្តសៀមរាបបណ្តោះអាសន្ន ព្រោះតែវីរុសកូវីដ-១៩ នេះ ។
ទោះយ៉ាងណា នៅថ្ងៃសុក្រនេះ (ទី១៣ ខែមីនា ឆ្នាំ២០២០) ក្រសួងក្រសួងអប់រំ យុវជន និងកីឡា សម្រេច បង្កើតកម្មវិធីសិក្សា “ការរៀនតាមប្រព័ន្ធអេឡិចត្រូនិក (E-Learning) ឥតគិតថ្លៃលើមុខវិជ្ជាឯកទេសចំនួន៦រួមមាន៖ គណិតវិទ្យា គីមីវិទ្យា រូបវិទ្យា ប្រវត្តិវិទ្យា ជីវវិទ្យា និងភាសាខ្មែរ ដែលអាចឱ្យប្អូនៗសិស្សានុសិស្សទាំងអស់សិក្សាដោយខ្លួនឯងបាន ទាំងនៅលើបណ្តាញទំនាក់ទំនងសង្គមផ្លូវការ និងប្រព័ន្ធសិក្សាតាមអេឡិចត្រូនិករបស់ក្រសួងអប់រំ ។
សេចក្តីប្រកាសរបស់ក្រសួងបានបញ្ជាក់ឲ្យដឹងថា ការដាក់ឱ្យដំណើរការកម្មវិធីបង្រៀនតាមអេឡិចត្រូនិកនេះ គឺចាប់ពីថ្ងៃទី១៣ ខែមីនា ឆ្នាំ២០២០ តទៅ ដោយសិស្សានុសិស្សអាចសិក្សាបានតាមរយៈមធ្យោបាយដូចខាងក្រោម៖
១-បណ្ដាញ YouTube ផ្លូវការរបស់ក្រសួង៖ www.youtube.com/moeys ដែលនឹងមានវីដេអូ បង្រៀន ទាំងអស់ សម្រាប់សិស្សានុសិស្សអាចសិក្សាបានទៅតាមពេលវេលាជាក់ស្តែងរបស់ខ្លួន ។
២- ទំព័រហ្វេសប៊ុកផ្លូវការរបស់ក្រសួង៖ www.facebook.com/moeys.gov.kh ដែលនឹងធ្វើការផ្សព្វផ្សាយ ជារៀងរាល់ថ្ងៃ ដោយពេលព្រឹកសម្រាប់ថ្នាក់ទី៩ និងពេលរសៀលសម្រាប់ថ្នាក់ទី១២ ។
៣-មជ្ឈមណ្ឌលសិក្សាអេឡិចត្រូនិករបស់ក្រសួង៖ Elearning.moeys.gov.kh ដោយសិស្សានុសិស្សអាច ចូលទៅសិក្សាបានដោយចូលទៅជ្រើសរើសវគ្គសិក្សា ឬមេរៀនដែលត្រូវសិក្សាដោយឥតគិតថ្លៃ និងមិនចាំ បាច់ចុះឈ្មោះ (ចូលជាភ្ញៀវ)។
អាស្រ័យដូចបានជម្រាបជូនខាងលើនេះ សូមលោកគ្រូ អ្នកគ្រូ មាតាបិតា អ្នកអាណាព្យបាលសិស្សចូលរួមជំរុញលើកទឹកចិត្តប្អូនៗសិស្សានុសិស្សទាំងអស់ ជាពិសេសផ្តល់លក្ខខណ្ឌអំណោយផល ដើម្បីអាចបន្តសិក្សាតាមប្រព័ន្ធអេឡិចត្រូនិកបានជាប្រចាំ ដោយចូលទៅក្នុងគេហទំព័រ និងបណ្តាទំនាក់ទំនងសង្គម ដែលបានផ្តល់ជូនខាងលើតាមការគួរ៕ អត្ថបទ៖ លឹម ហុង
សូមអានបន្ថែមសេចក្តីប្រកាសរបស់ក្រសួងក្រសួងអប់រំ យុវជន និងកីឡា នៅខាងក្រោម៖