ខេត្តស្វាយរៀង៖មន្ទីរវប្បធម៌ និងវិចិត្រសិល្បៈខេត្តស្វាយរៀង នៅព្រឹកថ្ងៃទី១៣ ខែមីនា ឆ្នាំ២០២០នេះបានប្រារព្ធទិវាវប្បធម៌ជាតិ៣មីនា លើកទី២២ ឆ្នាំ២០២០ ក្រោមប្រធានបទ “យុវជន ដើម្បីវប្បធម៌ជាតិ” ក្រោមអធិបតីភាពលោកស្រី ឯក សុវណ្ណភារៈ អភិបាលរងខេត្តស្វាយរៀង លោកស្រី ឥន្ទ ណាគ្រី ប្រធានមន្ទីរវប្បធម៌ និងវិចិត្រសិល្បៈខេត្ត ព្រមទាំងអស់លោក លោកស្រី ជាប្រធាន អនុប្រធាន មន្ទីរ អង្គភាព ស្ថាប័ននានាជុំវិញខេត្ត លោកគ្រូ អ្នកគ្រូ ក្មួយៗ គរុសិស្ស និស្សិត សិស្សានុសិស្ស ជាច្រើននាក់ផងដែរ។
លោកស្រី ឥន្ទ ណាគ្រី ប្រធានមន្ទីរវប្បធម៌ និងវិចិត្រសិល្បៈខេត្តស្វាយរៀង បានមានប្រសាសន៍ឲ្យដឹងថា យោងតាមការអនុវត្តស្មារតីសារាចរណែនាំលេខ០៤សរ ចុះថ្ងៃទី២៦ ខែកុម្ភៈ ឆ្នាំ២០២០ របស់រាជរដ្ឋាភិបាលកម្ពុជា ស្តីពីការរៀបចំទិវាវប្បធម៌ជាតិ ៣មីនា លើកទី២២ ឆ្នាំ២០២០ ក្រោមប្រធានបទ យុវជនដើម្បីវប្បធម៌ជាតិ គឺក្នុងគោលបំណងបំផុសដល់ស្មារតី យុវជនឲ្យបង្កើតការស្រឡាញ់ និងមានស្មារតី ចូលរួមឲ្យកាន់តែសកម្មថែមទៀត ក្នុងការផ្ទេរទទួលនូវចំណេះដឹង ជំនាញ បច្ចេកទេស សិល្បៈវប្បធម៌ សំដៅរួមគ្នាលើកកម្ពស់ថែរក្សាការពារសម្បត្តិវប្បធម៌ជាតិ ឲ្យបានស្ថិតស្ថេរគង់វង្ស។
ក្នុងឱកាសនេះផងដែរ លោកស្រី ឯក សុវណ្ណភារៈ អភិបាលរងខេត្តបានមានប្រសាសន៍ថា ទិវាវប្បធម៌ជាតិ គឺជាទិវាដ៏សំខាន់មួយរបស់ប្រទេសជាតិ ដែលរាជរដ្ឋាភិបាលតែងតែយកចិត្តទុកដាក់រៀបចំឡើងជារៀងរាល់ឆ្នាំ ក្នុងគោលបំណងរំលឹកដល់គុណូបការៈ និងស្នាដៃដ៏ធំធេងរបស់បុព្វបុរសយើងដែលបានបន្សល់ទុកនូវមរតកដ៏សម្បូរបែបសម្រាប់យើងគ្រប់គ្នា ជាកូនចៅជំនាន់ក្រោយ និងគង់វង្សមានជាអាទិ៍ ប្រាង្គប្រាសាទ សិលាចរឹក អក្សរសាស្ត្រ សិល្បៈ របាំប្រពៃណី ទំនៀមទម្លាប់។ល។
លោកស្រីបានឲ្យដឹងទៀតថា សម្បត្តិវប្បធម៌ទាំងអស់នោះ កើតចេញពីកិច្ចខិតខំប្រឹងប្រែងនៃបុព្វបុរសខ្មែរយើង ហើយបានក្លាយជាដួងព្រលឹង ជាអត្តសញ្ញាណប្រកបដោយកិត្យានុភាពជាតិ និងមរតក ប្រកបដោយសក្តានុពលបំផុត ក្នុងការរួមចំណែកអភិវឌ្ឍន៍សេដ្ឋកិច្ចសង្គម។ វប្បធម៌ គឺជាមូលដ្ឋានគ្រឹះនៃការអភិវឌ្ឍសេដ្ឋកិច្ចសង្គម ដូចពាក្យស្លោក បានពោលថា “វប្បធម៌រលត់ ជាតិរលាយ វប្បធម៌ពណ្ណរាយជាតិថ្កើងថ្កើន”។ វប្បធម៌ ជាដួងព្រលឹងរបស់ជាតិ ហេតុនេះយើងទាំងគ្នា ពិសេសយុវជនដែលជាទំពាំងស្នងឫស្សី ត្រូវតែរួមគ្នាដើម្បីការពារថែរក្សា លើកតម្កើង ព្រោះទាំងអស់នេះ ជាមរតកដ៏តម្លៃរបស់ជាតិខ្មែរយើងដែលពុំអាចកាត់ថ្លៃបាន៕ដោយ៖ វ៉ៃកូ