កំពង់ស្ពឺ៖ ស្នងការដ្ឋាននគរបាលខេត្តកំពង់ស្ពឺ បានរាយការណ៍ថា មានបុរសជើងខ្លាំងម្នាក់ឈ្មោះ ផាន ស៊ីហាក់ បើកបររថយន្តស៊េរីទំនើប លើសល្បឿនកំណត់ ហើយពេលនគរបាលឃាត់ ដើម្បីធ្វើការផាកពិន័យបែរជាស្រែកជេរប្រមាថ និងប្រាប់ថានគរបាលភ្លើៗ មិនមើលរថយន្ដ FROD WILDTRAK 2020ទេអី។
កាលពីរវេលាម៉ោង១៣និង៥០នាទី នារសៀលថៃ្ងសុក្រ ទី១៣ ខែមីនាឆ្នាំ២០២០ នៅលើផ្លូវជាតិលេខ ៤ ត្រង់ចំណុចភ្លើងស្ដុបមន្ទីរសាធារណការខេត្ដ តំបន់ទីប្រជុំជនកម្លាំងនគរបាលចរាចរណ៍ផ្លូវគោកខេត្តកំពង់ស្ពឺ បានធ្វើការត្រួតពិនិត្យរឹតបណ្តឹងការអនុវត្តន៍ច្បាប់ចរាចរណ៍ផ្លូវគោក ស្របពេលនោះមានរថយន្តមួយគ្រឿង ម៉ាក ford ពណ៌ស ពាក់ផ្លាកលេខ ភ្នំពេញ 2BJ-6575 បើកបរដោយឈ្មោះ ផា ស៊ីហាក់ ភេទប្រុស អាយុ ៣០ អសយដ្ឋាន នៅភូមិក្រាំងចេក ឃុំក្រាំងចេក ស្រុកឧដុង្គ ខេត្តកំពង់ស្ពឺ បើកបរក្នុងទិសដៅពីរកើតទៅលិច ដោយស្ថានភាពបើកបរលើសល្បឿនកំណត់ ក្នុងទីប្រជុំជន ច្បាប់ត្រូវឲ្យបើកបរ ល្បឿនលឿនបំផុត ៤០ គីឡូម៉ែត្រក្នុងមួយម៉ោង ប៉ុន្ដែលោក ផា ស៊ីហាក់ បើកល្បឿន៩០ គឺឡូម៉ែត្រក្នុងមួយម៉ោង ឧបករណ៍វាស់ល្បឿន។
លុះមកដល់ចំណុចត្រួតពិនិត្យភ្លើងស្តុបមន្ទីរសាធារណការខេត្ត សមត្ថកិច្ចនគរបាលចរាចរណ៍ បានបញ្ជាឱ្យរថយន្ដអែបចូលខាង ដើម្បីជម្រាបប្រាប់ និងណែនាំគាត់ទាក់ទងនឹងច្បាប់ចរាចរណ៍ផ្លូវគោក ស្រាប់តែកំពុងបញ្ជាឱ្យចូល បុរសអ្នកបើកបររថយន្ដ បានចុចកញ្ចក់ទម្លាក់ចុះស្រែកជេរ នគរបាលដែលកំពុងបញ្ជារថយន្តថា ភ្លើទេអី ភ្លើងស្ដុបពណ៌បៃតង បញ្ជាក់ប្រាប់ថា ឲ្យទៅមុខម្ដេចនគរបាលឆ្កួតមកឲ្យរថយន្ដចូលខាងទៅវិញ ដោយមិនទាន់ស្ដាប់ហេតុផលផង ជនបង្កឈ្មោះ ផា ស៊ីហាក់ បានចុះពីររថយន្ដបើកទ្វារសំដៅមករកនគរបាល ដែលកំពុងតែបញ្ជានៅខាងមុខរថយន្ដ ឃើញស្ថានភាពមិនស្រួលកងកម្លាំងនគរបាលចរាចរណ៍ ក៏បានចូលទៅធ្វើការសម្របសម្រួល ឲ្យគាត់បើករថយន្ដមកឈប់នៅម្ខាងផ្លូវសិនមក ដើម្បីពន្យល់និងឱ្យគាត់ពិនិត្យលើឧបករណ៍វាស់ល្បឿន ជនបង្កនៅតែរឹងទទឹងមិនស្ដាប់ ការពន្យល់ណែនាំពីសមត្ថកិច្ចនោះទេ ដោយស្រែកនិងទាញទូរស័ព្ទដៃតេអន្ដរាគមន៍រកបក្ខពួកខ្នងបង្អែកដើម្បីបញ្ជាមកនគរបាលឲ្យសុំទោសខ្លួនវិញ និងបាននិយាយថា មិនស្គាល់យើងទេអី ! !
ជាការសម្រេចចិត្ដ នគរបាលដែលឈរជើងនៅគោលដៅខាងលើបានគោរពស្នើសុំបញ្ជាថ្នាក់ដឹកនាំធ្វើការឃាត់រថយន្ដនិងបុរស (ជនបង្កករណីបទល្មើសចរាចរណ៍) នាំមកកាន់ស្នងការដ្ឋាននគរបាលខេត្តកំពង់ស្ពឺ ដើម្បីចាត់ការតាមនីតិវិធីច្បាប់។
សូមបញ្ជាក់ថា បុរសជាជនបង្កក្រោយការធ្វើតេស្តជាតិស្រវឹង រកឃើញមានជាតិអាកុល ០,៧៣ ក្នុងមួយលីត្រខ្យល់ ចំពោះវត្ថុតាងនិងអ្នកបើកបរឃាត់ទុកបណ្ដោះអាសន្ន នៅការិយាល័យចរាចរណ៍ផ្លូវគោក បុរសនេះពិតជាមានជាតិអាកុល ហួសការកំណត់មែន ទើបប្រាប់សេរីឡានខុស 2019 សោះ ថា 2020 ។ សូមបងប្អូនប្រជាពលរដ្ឋ មេត្តាចូលរួមគោរពច្បាប់ចរាចរណ៍ផ្លូវគោកទាំងអស់គ្នា ដើម្បីកម្ពុជា៕ដោយ៖កូឡាប
