ឆ្នាំជូត
រាសីស្រុតចុះ។ នៅថ្ងៃនេះមុនលោកអ្នកសម្រេចចិត្តអ្វីមួយតោងតែមានការប្រយ័ត្នប្រយែងបន្តិចពីព្រោះថាផលអាក្រក់ងាយកើតឡើងនាពេលក្រោយវិញផង។ក្រៅពីនេះស្ត្រីគប្បីប្រយ័ត្នបញ្ហាគ្រោះថ្នាក់ឬឧប្បត្តិហេតុណាមួយកើតឡើងផងដែរ។ដោយឡែកចំពោះការប្រកបការងារវិញលោកអ្នកត្រូវមានចិត្តត្រជាក់ ហើយប្រើគំនិតបន្តិចទើបមិនមានបញ្ហាចោទឡើង។អ្នកប្រកបរបររកស៊ីជួញដូរវិញមានការខ្សត់ខ្សោយក្នុងការរកផលចំណូលណាស់ដូច្នេះទាល់តែខិតខំខ្លាំងទើបអាចរកផលកម្រៃគ្រាន់ចិញ្ចឹមគ្រួសារទៅរួច។
រីឯគូស្នេហាប្រុសស្រីមានការសាំញ៉ាំនិងទាស់ទែងគ្នាច្រើនបន្តិចហើយទាល់តែចេះកាត់បន្ថយមោហៈទោសៈក្នុងខ្លួនខ្លះទើបប្រសើរហោង៕
ឆ្នាំឆ្លូវ
រាសីស្រុតចុះ។នៅថ្ងៃនេះដោយសារដំណើរជីវិតមិនល្អប្រសើរ ហេតុនេះរាល់ការសម្រេចចិត្តឬធ្វើអ្វីមួយតែងមានបញ្ហារាំងស្ទះនិងជះផលមិនល្អមួយចំនួនត្រឡប់មកវិញគប្បីមានការប្រយ័ត្នប្រយែងបន្តិចទើបប្រសើរ។អ្នកប្រកបរបររកស៊ីជួញដូរការរកផលចំណូលមិនត្រូវឱ្យអតិថិជនជំពាក់ប្រាក់ច្រើនទ្បើយប្រយ័ត្នជួបរឿងដូចពាក្យចាស់ថាពេលឱ្យជំពាក់ធូរដូចទឹកហូរ ឯការសងមកវិញតឹងដូចអូសឫស្សីបញ្ច្រាសចុងហើយស្រួលមិនស្រួលកើតមានជម្លោះវិវាទគ្នាថែមទៀត។
រីឯសម្ព័ន្ធស្នេហាកំលោះក្រមុំឬពោះម៉ាយមេម៉ាយក្តីមានភាពផុយស្រួយជម្លោះវិវាទ ណាស់គប្បីប្រយ័ត្នប្រយែង៕
ឆ្នាំខាល
រាសីល្អជាមធ្យម។ជីវិតរបស់មនុស្សយើងមិនមាននរណាម្នាក់បានតិចឬបានច្រើនរហូតទេគឺមានការប្រែប្រួលរហូត ដូចនេះបើទោះបីពេលនេះលោកអ្នកនៅជួបបញ្ហាជីវភាពលំបាកមិនត្រូវអស់សង្ឃឺមឡើយពីព្រោះថានៅថ្ងៃខាងមុខបើយើងខិតខំពុះពារនោះ ទោះមិនជួបសំណាងល្អក៏ជីវភាពគ្រាន់គាប់ប្រសើរជាងមុនដែរ។ចំពោះអ្នកប្រកបរបររកស៊ីជួញដូរនៅថ្ងៃនេះវិញទោះលោកអ្នកធ្វើអ្វីក៏ដោយតោងមានការប៉ាន់ប្រមាណហើយពុំត្រូវលោភលន់ឡើយ បើមិនដូច្នេះនឹងជួបរឿងសោកការជាក់ជាពុំខាន។
រីឯបញ្ហាសេចក្តីស្នេហាកំលោះក្រមុំមានការប្រឆាំងនិងរកាំចិត្តចំពោះគ្នាច្រើនដូចនេះទាល់តែចេះកាត់បន្ថយជម្លោះវិវាទទើបប្រសើរ៕
ឆ្នាំថោះ
រាសីស្រុតចុះ។នៅថ្ងៃនេះដំណើរជីវិតរបស់លោកអ្នកជួបរឿងល្អក់កករច្រើន ពិសេសការសម្រេចចិត្តរឿងអ្វីមួយតែងងាយទទួលរកគ្រោះថែមទៀត។អ្នកប្រកបការងាររាជការឬក្រុមហ៊ុនឯកជនកើតមានការរកាំចិត្តច្រើនហើយលោកអ្នកត្រូវចេះអត់ធ្មត់ខ្លះទើបគ្មានរឿងរ៉ាវចម្រូងចម្រាសទៅរួច។សម្រាប់អ្នកប្រកបរបររកស៊ីជួញដូរទោះជួញទីជិតឆ្ងាយជួបផលលំបាកក្នុងការរកចំណូលណាស់ហើយទាល់តែខិតខំខ្លាំងទើបអាចរកផលចំណូលចិញ្ចឹមឆ្នាំងបាយរស់។
រីឯសម្ព័ន្ធស្នេហាកំលោះក្រមុំកុំចង់ទុំមុនស្រគាលប្រយ័ត្នកើតរឿងធំគ្មាននរណាអាចជួយកើត៕
ឆ្នាំរោង
រាសីខ្ពស់ត្រដែត។នៅថ្ងៃនេះបើលោកអ្នកសម្រេចចិត្តអ្វីក៏តែងផ្តល់ជាផលមកវិញគ្រាន់ជាទីកក់ក្តៅជានិច្ច។សម្រាប់អ្នកប្រកបរបររកស៊ីជួញដូរក្នុងថ្ងៃនេះវិញមិនត្រូវយកភាពច្រណែនឈ្នានីសដាក់ចំពោះមុខឬបង្ករឿងថ្នាំងថ្នាក់ចំពោះអ្នកដទៃប្រយ័ត្នកើតឧបទ្រពចង្រៃការលក់ដូរកាន់តែមិនដាច់។
បញ្ហាស្នេហាកំលោះក្រមុំបើចង់ធ្វើការជ្រើសរើសគូស្រករតែងជួបគូព្រេងដូចសេចក្តីប្រាថ្នា៕
ឆ្នាំម្សាញ់
រាសីល្អជាមធ្យម។ក្នុងថ្ងៃនេះការប្រកបការងារអ្វីលោកអ្នកងាយទទួលរងប៉ះទង្គិចនិងបរាជ័យដូច្នេះហើយមុនធ្វើអ្វីមួយគួរគិតឱ្យបានគ្រប់ជ្រុងជ្រោយបើពុំនោះទេអាចទទួលរងផលលំបាកនៅគ្រាក្រោយជាក់ជាពុំខាន។ការប្រកបការងារលោកអ្នកចូរប្រយ័ត្នកើតមានជម្លោះវិវាទសម្តីបន្តិចបន្តួចហើយរីកជាធំរហូតឈានដល់ការប្រកាប់ប្រចាក់គ្នា។អ្នកប្រកបរបររកស៊ីជួញដូរបើចង់បោះទុនតូចធំតែងហុចផ្លែផ្កាមកវិញគ្រាន់គាប់ប្រសើរគួរសម។ការធ្វើដំណើរទីជិតឆ្ងាយជួបភាពសុខដុមនិងក្តីសោមនស្សជានិច្ច។
រីឯសម្ព័ន្ធស្នេហាប្រុសស្រីកំពុងមានភាពស្រស់ស្រាយប្រៀបដូចត្រីក្នុងទឹកនារដូវខែវស្សា៕
ឆ្នាំមមី
រាសីល្អជាមធ្យម។នៅថ្ងៃនេះឃើញថាលោកអ្នកមានការធូរចិត្តធូរកាយគួរសម ហើយទោះធ្វើអ្វីក៏តែងមានភាពសុខដុម។សម្រាប់អ្នកប្រកបរបររកស៊ីជួញដូរមុខជំនួញថ្ងៃនេះជួបការលំបាកក្នុងការរកផលចំណូលបន្តិចហើយក្រុមមនុស្សទៀតសោតជួបបញ្ហាប្រទាំងប្រទើសច្រើនពីព្រោះគេតាមព្យាបាទយាយីហើយពិសេសឱ្យប្រយ័ត្នសត្រូវចាស់បង្កជម្លោះវិវាទតែម្តង។ រីឯសេចក្តីស្នេហាប្រុសស្រីមានការខ្វាយខ្វល់ព្រោះតែការគិតច្រើនម្នាក់ឯង៕
ឆ្នាំមមែ
រាសីខ្ពស់ត្រដែត។នៅថ្ងៃនេះដំណើរជីវិតរបស់លោកអ្នកបានផ្លាស់ប្តូរមកល្អប្រសើរឡើងវិញ ហើយធ្វើអ្វីក៏តែងផ្តល់ផលល្អគ្រាន់ជាទីពេញចិត្តជាងមុនផង។ចំពោះអ្នកប្រកបរបររកស៊ីជួញដូរបើចង់បោះទុនតូចធំមិនទាស់ខុសអ្វីទេតែយ៉ាងណាត្រូវចេះពិនិត្យឱ្យបានគ្រប់ជ្រុងជ្រោយទើបមិនត្រូវអសាបង់ប្រាក់កាសដោយប្រការណាមួយ។
រីឯបញ្ហាស្នេហាកំលោះក្រមុំឬពោះម៉ាយមេម៉ាយក្តីមានការស្រុះស្រួលនិងផ្អែមល្ហែមល្អប្រពៃ៕
ឆ្នាំវក
រាសីខ្ពស់ត្រដែត។នៅថ្ងៃនេះដោយសារដួងរាសីឡើងខ្ពស់ ដូចនេះផ្តល់ផលល្អសម្រាប់ស្ត្រីក្នុងការចាត់ចែងការងារអ្វីមួយពីព្រោះថាផលល្អៗតែងហុចមកវិញផងដែរ។សម្រាប់ថ្ងៃនេះដែរដោយសារដួងរាសីឡើងខ្ពស់ដូចនេះអ្នកប្រកបរបររកស៊ីជួញដូរវិញមានការចម្រើនលូតលាស់និងមានជោគជ័យល្អប្រសើរ។ការធ្វើដំណើរឆ្ងាយជិតជួបភាពសុខដុមដូចសព្វមួយដង។
រីឯបញ្ហាសម្ព័ន្ធស្នេហាប្រុសស្រីបើចង់ផ្សំផ្គុំគ្រួសារជាឱកាសល្អបំផុតនិងបើមានជម្លោះវិវាទជាពេលវេលាល្អក្នុងការផ្សះផ្សាទៀតផង៕
ឆ្នាំរកា
រាសីល្អជាមធ្យម។នៅថ្ងៃនេះការរស់នៅងាយផ្ទុះបញ្ហាជារឿងរាវណាស់ដែរគប្បីប្រយ័ត្នប្រយែង។សម្រាប់ថ្ងៃនេះដែរអ្នកប្រកបការងាររាជការឬក្រុមហ៊ុនឯកជនក្តីពុំផ្តល់ជោគលាភល្អទេ ដូច្នេះទោះធ្វើអ្វីក៏មិនអាចធ្វេសប្រហែសឬធ្វើដោយក្តីក្តៅក្រហាយបានឡើយបើពុំនោះទេនឹងជួបផលអាក្រក់ណាមួយមកវិញ។អ្នកប្រកបរបររកស៊ីជួញដូរទោះការជួញទីជិតឆ្ងាយតែងមានផលកម្រៃហូរចូលមួយៗអញ្ជឹងដែរហើយកំពុងមានភាពសុខដុមប្រពៃ។
រីឯបញ្ហាស្នេហាកំលោះក្រមុំឬពោះម៉ាយមេម៉ាយក្តីមានភាពស្រុះស្រួលនិងផ្អែមល្ហែមល្អណាស់៕
ឆ្នាំច
រាសីស្រុតចុះ។ក្នុងថ្ងៃនេះដោយសារដួងរាសីស្រុតចុះ ដូចនេះបញ្ហាមិនល្អងាយរត់ចូលណាស់ផងម្ល៉ោះហើយលោកអ្នកត្រូវរក្សាភាពស្ងប់ស្ងៀមបន្តិចទើបគ្មានបញ្ហាមិនល្អណាមួយចោទឡើង។ចំពោះអ្នកប្រកបរបររកស៊ីជួញដូរមានការទិញចូលលក់ចេញគ្រាន់រស់រវើកផងដែរតែយ៉ាងណាចូរប្រយ័ត្នគ្រោះបាត់របស់របរនិងគ្រោះចាញ់បោកគេដោយប្រការណាមួយ។ការធ្វើដំណើរទីជិតឆ្ងាយពិសេសទិសបស្ចឹមមិនសូវមានសុវតិ្តភាពទេគួរបន្ថែមការប្រុងប្រយ័ត្នទើបប្រសើរ។
រីឯសេចក្តីស្នេហាកំលោះក្រមុំមានការប្រែប្រួលច្រើនពីព្រោះថាជួនផ្អែមល្ហែមជួនពាក់មុខយក្សដាក់គ្នា៕
ឆ្នាំកុរ
រាសីល្អជាមធ្យម។នៅថ្ងៃនេះផ្តល់ផលល្អទាំងផ្នែកការងារនិងដំណើរការបញ្ហាប្រាក់កាស។សម្រាប់អ្នកប្រកបរបររកស៊ីជួញដូរនៅថ្ងៃនេះវិញការរកផលចំណូលមានភាពសុខដុមនិងលោកអ្នកអាចរកផលកម្រៃចូលគ្រាន់បំពេញបំពង់អញ្ចឹងដែរ។ការធ្វើដំណើរឆ្ងាយជិតមិនសូវមានសុវត្តិភាពទេពិសេសឱ្យប្រយ័ត្នក្រុមមនុស្សបង្កហេតុតែម្តង។
រីឯបញ្ហាសេចក្តីស្នេហាប្រុសស្រីបើលោកអ្នកចង់ធ្វើការជ្រើសរើសគូស្រករជាឱកាសល្អប្រពៃបំផុត៕