សៀមរាប៖ផៃ ស៊ីផាន រដ្ឋមន្ត្រីប្រតិភូអមនាយករដ្ឋមន្ត្រី ប្រធានអង្គភាពអ្នកនាំពាក្យរាជរដ្ឋាភិបាល បានថ្លែងថាក្រុមការងាររបស់អង្គភាពអ្នកនាំពាក្យរាជរដ្ឋាភិបាលបានបញ្ចប់ បេសកកម្មដោយបរិបូណ៌ជាមួយការប្រមូលព័ត៌មានពិត និងផ្ទាល់ពីមន្ត្រីជំនាញខេត្តសៀមរាប។
លោកបានលើកឡើងថា ក្នុងជំនួបផ្ទាល់ជាមួយលោកលី រិទ្ធី អភិបាលរងខេត្តទទួលបន្ទុកអ្នកនាំពាក្យ រួមទាំងប្រធានមន្ទីរព័ត៌មាន តំណាងមន្ទីរសុខាភិបាល មន្ត្រី បុគ្គលិកមន្ទីរពេទ្យបង្អែកខេត្តសៀមរាបនារសៀលថ្ងៃទី១៣ ខែមីនា ឆ្នាំ២០២០នេះ ក្នុងកិច្ចជួយពង្រឹងយុទ្ធសាស្ត្រគ្រប់គ្រងមតិសាធារណៈក្នុងវិស័យព័ត៌មានឆ្លើយតបនឹងជម្ងឺផ្លូវដង្ហើមកូវីដ-១៩។ ជាមួយគ្នានោះដែរ ក្រុមការងារក៏ទទួលបានព័ត៌មានលម្អិតស្តីអំពីស្ថានភាព និងបច្ចុប្បន្នភាពពាក់ព័ន្ធជម្ងឺផ្លូវដង្ហើមប្រកបដោយការទទួលខុសត្រូវខ្ពស់។ ជាពិសេសការផ្តល់ចម្លើយពីប្រជាពលរដ្ឋក្នុងក្រុងសៀមរាប ដែលបានបង្ហាញ ភាពស្មោះត្រង់ក្លាហាន បើទោះបីជាមានការបារម្ភខ្លះក៏ដោយ ក៏ប៉ុន្តែមិនស្លន់ស្លោរហូតធ្លាក់ខ្លួនក្លាយជាចំណាប់ខ្មាំងនៃជម្ងឺភ័យខ្លាចតាមការញុះញង់ព័ត៌មានប្រឌិត របស់ជនខិលខូចមួយចំនួននោះឡើយ។
បេសកកម្មរបស់អង្គភាពអ្នកនាំពាក្យរាជរដ្ឋាភិបាល ក្នុងខេត្តសៀមរាបក្នុងគោលបំណងជម្រះមន្ទិល និងគ្រប់គ្រងសតិអារម្មណ៍ ព្រមទាំងលើកទឹកចិត្តប្រជាពលរដ្ឋអោយយល់ដឹងអំពីជម្ងឺផ្លូវដង្ហើមកូវីដ-១៩ពិតជាអាចព្យាបាលជាសះស្បើយ។
ក្រុមការងារបានចុះជួបជាមួយពលរដ្ឋមួយរូបស្ថិតក្រោម ការសង្ស័យ និងត្រួតពិនិត្យរបស់មន្ទីរពេទ្យបង្អែក ដែលត្រូវបានអនុញ្ញាតវិលត្រឡប់ទៅជួបជុំគ្រួសារ ក្រោយរកឃើញថាពុំមានផ្ទុកមេរោគកូវីដ-១៩។
ក្រុមការងារក៏បានចូលរួមចែកជូនម៉ាស់សុវត្ថិភាព និងប្រេងរំអិលសម្អាតដៃ (Alcohol Sanitising Gel) ដោយឥតគិតថ្លៃដែលឧបត្ថម្ភដោយក្រុមហ៊ុនធានារ៉ាប់រងជីវិត Manulife ចំនួនមួយម៉ឺនក្នុងមួយមុខ។ ជាមួយគ្នានោះ ក៏បានចែកចាយខិតប័ណ្ណផ្សព្វផ្សាយវិធីសម្អាត និងការពារជម្ងឺ Covid-19 ។ ជាពិសេស ក្រុមការងារបានជួបសម្ភាសន៍ផ្ទាល់ជាមួយអ្នកធ្វើដំណើរតាមដងផ្លូវសាធារណៈ ដែលបានយល់ដឹងអំពីផលវិបាក វិធីបង្ការ ការការពារដោយប្រុងប្រយ័ត្នតាមការអំពាវនាវរបស់ប្រមុខរាជរដ្ឋាភិបាលកម្ពុជាសម្តេចតេជោហ៊ុន សែន ។
ជាថ្មីម្តងទៀត ក្រុមការងារអង្គភាពអ្នកនាំពាក្យរាជរដ្ឋាភិបាលក្រោមការដឹកនាំរបស់លោក ផៃ ស៊ីផាន សូមថ្លែងអំណរគុណចំពោះសម្តេចហ៊ុន សែន បានផ្តល់ពេលវេលាសមស្រប និងចំកាលៈទេសៈដើម្បីសិក្សាស្វែងយល់អំពីស្ថានភាពជាក់ស្តែងនៃជម្ងឺកូវីដ-១៩ក្នុងខេត្តសៀមរាប។
លោកផៃ ស៊ីផាន រដ្ឋមន្ត្រីប្រតិភូអមនាយករដ្ឋមន្ត្រី ប្រធានអង្គភាពអ្នកនាំពាក្យរាជរដ្ឋាភិបាល មានប្រសាសន៍ថា ជំងឺឆ្លងដោយវីរុសកូវីដ-១៩អាចព្យាបាលបាន តែការភ័យខ្លាច គឺជាជំងឺដ៏កាចសាហាវជាងកូវិត-១៩ទៅទៀត ដូច្នេះកត្តាសំខាន់ដែលត្រូវយកចិត្តទុកដាក់នៅក្នុងវិបត្តិនេះ គឺការថែរក្សាសុវត្ថិភាពផ្លូវចិត្តជូនប្រជាពលរដ្ឋ ព្រោះថាករណីកូវីដ-១៩ មកដល់ពេលនេះ នៅកម្ពុជាពុំទាន់មានករណីស្លាប់នៅឡើយទេ ក៏ប៉ុន្តែ ដោយសារតែការបញ្ចេញព័ត៌មានមិនពិត បានធ្វើឲ្យករណីកូវីដ-១៩ ក្លាយជាវិបត្តិនៃការភ័យខ្លាចបង្កគ្រោះថ្នាក់ដល់សង្គម។
លោកផៃ ស៊ីផាន មានប្រសាសន៍ទៀតថា ក្នុងដំណាក់ការនៃវិបត្តិកូវីដ-១៩ ការពង្រឹងវិស័យព័ត៌មាន ដើម្បីថែរក្សាសុវត្ថិភាពផ្លូវចិត្តជូនប្រជាពលរដ្ឋ គឺជាកត្តាសំខាន់ខ្លាំងណាស់ ហើយអ្វីដែលត្រូវធ្វើឲ្យមានប្រសិទ្ធភាព គឺការផ្សព្វផ្សាយឲ្យប្រជាជន មហាជន គ្រប់ស្រទាប់ជាន់ថ្នាក់ ទាំងនៅទីក្រុងនិងជនបទ បានយល់ បានជឿ និងចូលរួមទប់ស្កាត់ការរីករាលដាលនៃវីរុសនេះ ក្រោមការចាត់តាំងសកម្មភាព នៃការធ្វើសន្និសីទសារព័ត៌មាន ការផ្សព្វផ្សាយតាមរយៈវេទិកាសាធារណៈ ។
លោក ផៃ ស៊ីផាន មានប្រសាសន៍បន្ថែមទៀតថា ជាពិសេសត្រូវសកម្មបង្កើនការយកចិត្តទុកដាក់បន្ថែមលើកម្មវិធីសន្ទនាមតិ ដែលមានស្រាប់នៅក្នុងកម្មវិធីទូរទស្សន៍អនឡាញ និងវិទ្យុហ្វេសអឹម នៃមន្ទីរព័ត៌មានខេត្ត ដោយការអញ្ជើញមន្ត្រីជំនាញសុខាភិបាល ឆ្លើយតបចម្ងល់តាមទូរស័ព្ទ ជាមួយប្រជាពលរដ្ឋ និងបន្តការផ្សព្វផ្សាយព័ត៌មានបច្ចុប្បន្នភាព នៃការតាមដានស្ថានភាពវិបត្តិកូវីដ-១៩ ជូនប្រជាពលរដ្ឋឲ្យបានញឹកញាប់ ដែលអាចបញ្ជាក់ប្រាប់ជូនប្រជាពលរដ្ឋថា ព័ត៌មានពិតនៅទីនេះ ចៀសវាងការស្តាប់ ការមើល ហើយទទួលយកព័ត៌មានដែលគ្មានប្រភពច្បាស់លាស់ ព័ត៌មានមិនពិត បង្កើតការភ័យខ្លាចនោះ ដូច្នេះបើប្រជាជនទទួលបានសុវត្តិភាពផ្លូវចិត្ត គឺជាប្រក្រតីភាពក្នុងជីវភាពរស់នៅរបស់ប្រជាជន មិនភ័យខ្លាចចំពោះវិបត្តិកូវីដ-១៩ តែប្រុងប្រយ័ត្នការពារសុខភាពបានល្អប្រសើរ៕ដោយ៖កូឡាប