(ក្រសួងផែនការ)៖ នាព្រឹកថ្ងៃសុក្រ ទី១៣ ខែមីនា ឆ្នាំ២០២០នេះ លោក ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ បានបើកកិច្ចប្រជុំផ្សព្វផ្សាយសារាចរណែនាំរបស់ក្រសួងសេដ្ឋកិច្ច និងហិរញ្ញវត្ថុ ស្តីពីការធ្វើវិចារណកម្ម និងការពង្រឹងប្រសិទ្ធភាពចំណាយ សម្រាប់អនុវត្តច្បាប់ស្តីពីហិរញ្ញវត្ថុសម្រាប់គ្រប់គ្រងឆ្នាំ២០២០ ។
មានប្រសាសន៍ក្នុងឱកាសនេះ លោកកិត្តិសេដ្ឋាបណ្ឌិត ទេសរដ្ឋមន្ត្រី បានសង្កត់ធ្ងន់ដល់ថ្នាក់ដឹកនាំ អង្គភាពពាក់ព័ន្ធក្រោមឱវាទក្រសួងទាំងអស់ ត្រូវតែអនុវត្តឲ្យបានម៉ឺងម៉ាត់តាមសារាចរណែនាំនេះ ជាពិសេសចូលរួមគោរពអនុវត្តឲ្យបានតាមអនុសាសន៍ដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី រួមគ្នាជាមួយរាជរដ្ឋាភិបាលកម្ពុជា ក្នុងការប្រយុទ្ធប្រឆាំងនឹងការរីករាលដាលនៃជំងឺ COVID-19 និងទប់ទល់ផលប៉ះពាល់អវិជ្ជមានមកលើសេដ្ឋកិច្ចជាតិ ។
លោកកិត្តិសេដ្ឋាបណ្ឌិត បានណែនាំដល់តាមបណ្តាអង្គភាពទាំងអស់ ក្នុងកិច្ចប្រជុំ សូមជួយណែនាំដល់មន្ត្រីរាជការយើងទាំងអស់ ត្រូវយកចិត្តទុកដាក់ មានការប្រុងប្រយ័ត្នខ្ពស់ចំពោះសុខភាព អនាម័យផ្ទាល់ខ្លួន ជាពិសេសក្នុងការទប់ស្កាត់ជំងឺឆ្លងកូវីឌ-១៩ និងជំងឺឆ្លងផ្សេងៗទៀត៕ដោយ៖កូឡាប
