កណ្តាល៖ សាលាដំបូងខេត្តកណ្តាល នៅថ្ងៃទី១៣មីនានេះ បានដីកាឃុំខ្លួនជនល្មើស២នាក់ ក្នុងម្នាក់ ពាក់ព័ន្ធករណី លួចមានស្ថានទម្ងន់ទោស(គាស់ផ្ទះលួចទូរស័ព្ទចំនួន ១៤៥គ្រឿង) និងម្នាក់ទៀត ពាក់ព័ន្ធករណីទទួលផលចោរកម្ម ទិញទូរស័ព្ទពីចោរ។
សូមបញ្ជាក់ថា នៅថ្ងៃទី៧ ខែមីនា ឆ្នាំ២០២០ កម្លាំងកងរាជអាវុធហត្ថ ខេត្តកណ្តាល សហការជាមួយកម្លាំងកងរាជអាវុធហត្ថរាជធានីភ្នំពេញ បានឃាត់ខ្លួនជនសង្ស័យ ១នាក់ នៅចំណុចភូមិសាមគ្គី សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ តាមដីកាបញ្ជាឲ្យចូលខ្លួនរបស់សាលាដំបូងខេត្តកណ្តាល ពាក់ព័ន្ធករណី លួចមានស្ថានទម្ងន់ទោស(គាស់ផ្ទះលួចទូរស័ព្ទ) ដែលប្រព្រឹត្តក្នុងឆ្នាំ២០១៩ និង ឆ្នាំ២០២០ ក្នុងភូមិសាស្ត្រខេត្តកណ្តាល។
ជនសង្ស័យឈ្មោះ ថា ភេទប្រុស អាយុ៣៩ឆ្នាំ មុខរបរមិនពិតប្រាកដ ស្នាក់នៅផ្ទះជួលក្នុងសង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។
តាមចម្លើយសារភាពរបស់ជនសង្ស័យឈ្មោះ ថា និងដោយមានការសម្របសម្រួល នីតិវិធីពីលោកព្រះរាជអាជ្ញាអមសាលាដំបូងខេត្តកណ្តាល នៅថ្ងៃទី៨ ខែមីនា ឆ្នាំ២០២០ កម្លាំងកងរាជអាវុធហត្ថខេត្តកណ្តាល បានសហការជាមួយកម្លាំងកងរាជអាវុធហត្ថរាជធានីភ្នំពេញ បន្តឃាត់ខ្លួនជនសង្ស័យ១នាក់ទៀត ពាក់ព័ន្ធករណីទទួលផលចោរកម្ម ជនសង្ស័យឈ្មោះ អូន ភេទប្រុស អាយុ៤០ឆ្នាំ មុខរបរលក់ទូរស័ព្ទ មានទីលំនៅសង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។
វត្ថុតាងដកហូត ម៉ូតូ ចំនួន ១គ្រឿងទូរស័ព្ទ ចំនួន ១៤៥គ្រឿងខោអាវមួយចំនួន។
បច្ចុប្បន្ន ជនសង្ស័យ និងវត្ថុតាង ជំនាញអាវុធហត្ថខេត្ត បានកសាងសំណុំរឿងបញ្ជូនទៅ សាលាដំបូងខេត្តតាមនីតិវិធី៕ ដោយ៖កូឡាប
