ភ្នំពេញ៖ នៅថ្ងៃទី១៣ ខែមីនា ឆ្នាំ២០២០ លោកឧត្តមសេនីយ៍ឯក ជា ពៅ បានចុះធ្វើបាឋកថាស្តីពី “ទិដ្ឋភាពទូទៅនៃបទល្មើសបច្ចេកវិទ្យា” នៅស្នងការដ្ឋាននគរបាលរាជធានីភ្នំពេញ ដោយមានការចូលរួមពីសិក្ខាកាមជាមន្ត្រីនគរបាលជាតិចំនួន ១៣រូប ដែលបានសិក្សាថ្នាក់មហាវិទ្យាល័យជំនាញសន្តិសុខស្រាវជ្រាវ រយៈពេល ៥ឆ្នាំ ហើយកំពុងមកធ្វើកម្មសិក្សាបញ្ចប់វគ្គនៅស្នងការដ្ឋាននគរបាលរាជធានីភ្នំពេញ។
លោកឧត្តមសេនីយ៍ឯក ជា ពៅ បានមានប្រសាសន៍ថា បទបាឋកថានេះធ្វើឡើងក្នុងគោលបំណងដើម្បីឱ្យកងកម្លាំងនគរបាល យល់ដឹងអំពី ទិដ្ឋភាពទូទៅ តួនាទីភារកិច្ច របស់នាយកដ្ឋានប្រឆាំងបទល្មើសបច្ចេកវិទ្យា ក៏ដូចជាដើម្បីបង្កើនសម្ថភាពកងកម្លាំងនគរបាលឱ្យកាន់តែយល់ដឹងសុីជម្រៅ ទាក់ទងនឹងការប្រើប្រាស់បច្ចេកវិទ្យា ការកំណត់បទល្មើសតាមប្រព័ន្ធបច្ចេកវិទ្យា ដែលមានការវិវឌ្ឍន៍យ៉ាងឆាប់រហ័សនាពេលបច្ចុប្បន្ន។
ទន្ទឹមនឹងនេះផងដែរ លោកក៏បានលើកឡើងដោយសង្កត់ធ្ងន់ទាក់ទងទៅនឹងការផ្សព្វផ្សាយព័ត៌មានក្លែងក្លាយ ដែលសិក្ខាកាម ត្រូវចេះស្រាវជ្រាវ វិភាគ តាមដាន និងមានការប្រុងប្រយ័ត្នចំពោះព័ត៌មានក្លែងក្លាយទាំងនោះ ដែលបានធ្វើការផ្សព្វផ្សាយបំពុលសង្គម ក្នុងគោលបំណងធ្វើឱ្យប្រជាពលរដ្ឋមានការភាន់ច្រឡំ ព្រោះថាព័ត៌មានក្លែងក្លាយ គឺវាធ្វើឱ្យគ្រោះថ្នាក់ដល់សង្គមជាងជំងឺកូវីដ១៩ទៅទៀត៕ ដោយ៖កូឡាប