សៀមរាប៖ លោកអភិបាលខេត្តសៀមរាប បានមានប្រសាសន៍ថា ជំងឺកូវីដ១៩ស្រដៀងគ្នា ទៅនឹងជំងឺផ្តាសាយធំ បើយើងមានប្រព័ន្ធការពាររាងកាយល្អ ធ្វើអនាម័យជាប្រចាំជំងឺមិនងាយនឹងឆ្លងចូលបានទេ ។
លោក ទៀ សីហា អភិបាលនៃគណៈអភិបាលខេត្ត បានថ្លែងបែបនេះ នារសៀលថ្ងៃទី១៣ខែមីនាឆ្នាំ២០២០ នៅមន្ទីរពេទ្យខេត្តសៀមរាប បានរៀបចំសិក្ខាសាលាផ្សព្វផ្សាយវិធានការបង្ការ ការចម្លងជំងឺកូវីដ១៩ ដែលរៀបចំឡើងដោយសហភាពសហព័ន្ធយុវជនកម្ពុជាខេត្ត ដោយមានការ ចូលរួមពីមន្ត្រីជំនាញ ព្រមទាំងវត្តមានសិក្ខាកាមជាតំណាងមកពីបណ្តាមន្ទីរ អង្គភាព ស្ថាប័ននានាក្នុងខេត្ត សហភាពសហព័ន្ធយុវជនកម្ពុជាខេត្ត ផ្នែកឯកជននិងប្រតិបត្តិករទេចរណ៍ជាច្រើននាក់ផងដែរ។
លោក ទៀ សីហា បានអរគុណចំពោះថ្នាក់ដឹកនាំ និងមន្ត្រីរាជការនៃមន្ទីរសុខាភិបាលខេត្ត គ្រូពេទ្យ ដែលបានអនុវត្តការងារយ៉ាងសកម្ម ដោយប្រុងប្រយ័ត្នទប់ស្កាត់ការរីករាលដាលនៃកូវីដ-១៩ ធ្វើឲ្យខេត្តសៀមរាបយើងមានស្ថានភាពល្អប្រសើរជាងមុន ប្រជាពលរដ្ឋមិនមានការភ័យខ្លាចដូចការបំផុសព័ត៌មានមិនពិតនោះទេ ។
ទន្ទឹមនឹងនោះ អាជ្ញាធរខេត្តក៏បានយកចិត្តទុកដាក់ សហការជាមួយស្នងការដ្ឋាននគរបាលខេត្ត ពិនិត្យស្រាវជ្រាវ ទប់ស្កាត់ និងបានធ្វើការណែនាំចំពោះម្ចាស់គណនេយ្យហ្វេសប៊ុកមួយចំនួនតូចដែល “បំប៉ោងស្ថានភាព បំពុលដល់សង្គម បង្កើនការភ័យខ្លាច បង្កការរើសអើង ធ្វើបាបប្រជាពលរដ្ឋខេត្តសៀមរាប ដោយបង្ហោះព័ត៌មានមិនពិត ” ហើយបញ្ហាព័ត៌មានមិនពិតនេះ គឺជាជំងឺឆ្លងខ្លាំងជាងជំងឺម្ងឺកូវីដ១៩ទៅទៀត ដែលធ្វើឲ្យប្រជាពលរដ្ឋ បាក់បង់នូវអារម្មណ៍ស្មារតីទៀតផង ។ ជាមួយគ្នានេះ ឯកឧត្តម អភិបាលខេត្តក៏អំពាវនាវ និងណែនាំដល់បងប្អូននិងណែនាំអោយបន្តការថែរក្សាសុខភាព និងវិធានការការពាររបស់ក្រសួងសុខាភិបាល៕ដោយ៖កូឡាប
