លោក Antonio Guterres អគ្គលេខាធិការអង្គការសហប្រជាជាតិ កាលពីថ្ងៃសុក្រ បានទាមទារឲ្យបុគ្គលិកទាំងអស់ ធ្វើការងារពួកគេពីផ្ទះមក ចាប់ពីថ្ងទី ១៦ ខែមីនា រហូតដល់ថ្ងៃទី ១២ ខែមេសា ដើម្បីបន្ធូរបន្ថយការរីករាលដាលនៃវីរុស COVID-19 នៅទីស្នាក់ការកណ្តាលរបស់អង្គការសហប្រជាជាតិនៅទីក្រុង New York។
“ខ្ញុំបានសម្រេចចិត្តថា ចាប់ពីថ្ងៃចន្ទ ទី ១៦ ខែមីនា បុគ្គលិកទាំងអស់តម្រូវឲ្យធ្វើការពីចំងាយ និងពីផ្ទះមក លើកលែងតែវត្តមានពួកនៅទីស្នាក់ងារមានភាពចាំបាច់ ដើម្បីធ្វើកិច្ចការសំខាន់នៅទីក្រុង New York និងជុំវិញពិភពលោក”។ នេះជាការបញ្ជាក់របស់លោក ក្នុងលិខិតផ្ញើទៅកាន់បុគ្គលិកទាំងអស់របស់ UN។
លោកថ្លែទៀតថា “ដោយមើលពីស្ថានភាពអភិវឌ្ឍន៍ នៅក្នុងគ្រួសារអង្គការសហប្រជាជាតិនៅទីក្រុង New York និងផ្អែកលើការពិគ្រោះយោបាលជាមួយនឹងថ្នាក់ដឹកនាំជាន់ខ្ពស់ រួមមានប្រធានវេជ្ជសាស្រ្ត ខ្ញុំបានសម្រេចចិត្តបង្កើតវិធានការនៅទីស្នាក់ការកណ្តាល ដើម្បីបន្ធូរបន្ថយការរីករាលដាលនៃវីរុស COVID-19″។
សូមបញ្ជាក់ថា កាលពីថ្ងៃសុក្រផងដែរ ប្រធានាធិបតីអាមេរិច ដូណាល់ ត្រាំ បានប្រកាសដាក់ប្រទេសក្នុងគ្រោះអាសន្ន ដើម្បីប្រយុទ្ធប្រឆាំងនឹងវីរុសកូរ៉ូណា ក្រោយពលរដ្ឋអាមេរិចចំនួន ៤១នាក់ស្លាប់ និងជាង ១.៧០០នាក់ឆ្លងវីរុស។
វីរុសកូរ៉ូណា កំពុងធ្វើឲ្យពិភពលោកមានការព្រួយបារម្ភយ៉ាងខ្លាំង ដោយសារតែឥទ្ធិពល និងការរាតត្បាតយ៉ាងលឿនរបស់វា។ តួលេខចុងក្រោយនៃអ្នកឆ្លងសរុបជុំវិញពិភពលោកមានចំនួនជាង ១៤៥.០០០ករណី ខណៈដែលអ្នកស្លាប់មានជាង ៥.៤០០នាក់។ អ្នកជាសះស្បើយមានជាង ៧០.០០០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Xinhua
