លោក Bill Gates សហស្ថាបនិកក្រុមហ៊ុនបច្ចេកវិទ្យាយក្ស Microsoft បានលាឈប់ពីសមាជិក្រុមប្រឹក្សា កាលពីថ្ងៃសុក្រ ដើម្បីយកពេលវេលាផ្តោតលើកិច្ចការមនុស្សធម៌ទាក់ទងនឹង សុខភាព ការអប់រំ និងការប្រែប្រួលអាកាសធាតុពិភពលោក។
មហាសេដ្ឋីរូបនេះ និងភរិយារបស់គាត់ឈ្មោះ Melinda បានបង្កើតមូលនិធីដ៏ធំមួយឈ្មោះថា Gates Foundation ដែលមានទ្រព្យសម្បតិ្តរាប់ពាន់លានដុល្លារ និងបានផ្តល់មូលនិធិដល់កម្មវិធីសុខភាពពិភពលោក ដើម្បីប្រយុទ្ធប្រឆាំងនឹងជំងឺ និងភាពក្រីក្រ។
លោក Bill Gates បានលាឈប់ពីតំណែងនាយកប្រតិបត្តិពេញម៉ោងនៅក្រុមហ៊ុន Microsoft ក្នុងឆ្នាំ ២០០៨ ប៉ុន្តែពេលនោះ លោកនៅតែជាប្រធានក្រុមប្រឹក្សារហូតដល់ឆ្នាំ ២០១៤ លោកគឺជាសមាជិកក្រុមប្រឹក្សា។
ប្រធានប្រតិបត្តិ ក្រុមហ៊ុន លោក Satya Nadella បាននិយាយថា “វាគឺជាកិត្តិយស និងឯកសិទ្ធិដ៏ធំធេង ដែលបានធ្វើកិច្ចការ និងរៀនសូត្រពីលោក Bill ក្នុងរយៈពេលប៉ុន្មានឆ្នាំកន្លងមកនេះ”។
សូមបញ្ជាក់ថា លោក Bill Gates បច្ចុប្បន្នគឺជាមហាសេដ្ឋីលេខ ២ ក្នុងពិភពលោក ដោយលោកមានទ្រព្យសម្បត្តិសរុបចំនួន១១២,៨ពាន់លានដុល្លារ ខណៈដែលតំណែងលេខមួយបានទៅលើប្រធានក្រុមហ៊ុន Amazon លោក Jeff Bezos ដែលមានទ្រព្យសម្បត្តិសរុបចំនួន ១២៣,៩ពាន់លានដុល្លារ៕
អត្ថបទប្រែសម្រួលដោយ៖ សុភ័ក្រ
ប្រភព៖ Xinhua