ដូចដែលបងប្អូនមហាជនបានដឹងច្បាស់ហើយថា ជំងឺ Covid-19 បច្ចុប្បន្ន កំពុងរីករាលយ៉ាងលឿន ទៅកាន់ប្រទេសនានានៅលើពិភពលោក និងបានសម្លាប់មនុស្សអស់ជាង ២ពាន់នាក់រួចហើយ និងចំនួនអ្នកឆ្លងយ៉ាងច្រើន ។ ជាក់ស្តែង មកទល់ពេលនេះ នៅកម្ពុជាយើងបានរកឃើញវីរុសកូវីត ១៩ នេះ កើតទៅលើជនជាតិខ្មែរម្នាក់ និងជនបរទេសផ្សេងៗ នៅក្នុងខេត្តសៀមរាប និងរាជធានីភ្នំពេញ សរុបកើនឡើងចំនួន ៧ នាក់ហើយ ។
ប្រការនេះ គឺតម្រូវឲ្យក្រសួងអប់រំ និងកីឡា សម្រេចឲ្យផ្អាកការសិក្សាជាបណ្តោះអាសន្ន នៅគ្រប់គ្រឹះស្ថានសិក្សាទាំងរដ្ឋ និងឯកជនទាំងអស់នៅរាជធានីភ្នំពេញ និងសៀមរាប ផងដែរ ។
ដោយឡែក កាលពី១ម៉ោងមុននេះ តាមរយៈគណនីហ្វេសប៊ុកឯកឧត្តម ពេជ្រ ស្រស់ បានបង្ហោះគួរឲ្យចាប់អារម្មណ៍ ដោយស្នើរសុំដល់រដ្ឋាភិបាល សូមមេត្តាបិទ ក្លឹបកំសាន្ត KTV ផង ព្រោះថាកន្លែងទាំងអស់នឹង ងាយនឹងចម្លងជំងឺ ប្រភេទថ្មីកូវីដ១៩ខាងខ្លាំងណាស់ ។ ក្នុងនោះ ឯកឧត្តម ពេជ្រ ស្រស់ បានលើកឡើងយ៉ាងដូច្នេះថា៖
«សាលារៀនវ៉ាកងហើយ ខ្ញុំស្នើ សុំឲ្យរដ្ឋាភិបាលកម្ពុជាបញ្ជាឲ្យ ក្លឹបកំសាន្ត KTV វ៉ាកងផងដែរ ពីព្រោះកន្លែងKTVគឺងាយឆ្លង អារោគCOVID-19នឹងណាស់ ហើយក៏ដើម្បីថែរក្សាសុខភាព នារីបម្រើការងារនៅទីនោះដែរ ជា
ពិសេសកាត់ចំណាយរបស់ បុរសៗក្នុងការទប់ទល់នឹងជំងឺ ឈ្លោះគ្នាក្នុងផ្ទះ។ ពេជ្រ ស្រស់» ។
គួរឲ្យដឹងផងដែរថា ដើម្បីបង្ការឆ្លងវីរុស Covid-19 អ្នកជំនាញការផ្នែកសុខាភិបាលនៅថៃកាលពីថ្មីៗនេះ បានណែនាំឲ្យមនុស្សគួរជៀសវាងការចូលកន្លែងសាធារណៈ ជាពិសេសពិធីជួបជុំសប្បាយនានា ការចែករំលែកចំណីអាហារ ឬ បារី រួមគ្នា និងជាពិសេសនៅកន្លែងដែលមានលក្ខណៈស្និទ្ធស្នាល ៕ អត្ថបទ៖ លឹម ហុង
