មណ្ឌលគិរី៖ កងកម្លាំងសមត្ថកិច្ចចម្រុះបានចុះបង្ក្រាបបទល្មើសធនធានធម្មជាតិ ស្ថិតនៅចំណុចភូមិពូហ្យាម ឃុំសែនមនោរម្យ ស្រុកអូររាំង ខេត្តមណ្ឌលគិរី ដោយរុករកឃើញគំនរឈើចំនួន២កន្លែង មានចំនួនសរុប ៥៥ដុំ ដែលបម្រុងលោតឆត្រនាំចេញទៅក្រៅប្រទេស ប៉ុន្តែទោះយ៉ាងណា ក្នុងហេតុការណ៍ជាក់ស្តែង ក្រុមសមត្ថកិច្ចពុំបានចាប់ខ្លួនក្រុមឈ្មួញឈើទាំងនោះបានទេ គឺហាក់បីដូចជាក្រុមឈ្មួញឈើបានដឹងខ្លួនជាមុន ហើយរត់គេចបាត់អស់ នៅសល់តែឈើប្រណីតទាំងទុកឲ្យសមត្ថកិច្ចចម្រុះរឹបអូសទុកជាភស្តុតាង។
ស្នងការដ្ឋាននគរបាលខេត្តមណ្ឌលគិរី នៅថ្ងៃទី១៥ខែមីនាឆ្នាំ២០២០នេះ បានចេញប្រកាសព័ត៌មាន លើផេកហ្វេសប៊ុកផ្លូវការថា បានបញ្ជាក់ថា នៅរសៀលថ្ងៃសៅរ៍ ទី ១៤ ខែមីនា ឆ្នាំ២០២០ វេលាម៉ោង១៣និង៣០នាទី លោកឧត្តមសេនីយ៍ទោ ឡោ សុខា ស្នងការនគរបាលខេត្ត បានដឹកនាំកម្លាំងអន្តរាគមន៍របស់ស្នងការដ្ឋាននគរបាលខេត្ត សហការជាមួយម្លាំងអធិការដ្ឋាននគរបាលស្រុកអូររាំង រដ្ឋបាលព្រៃឈើខេត្ត កម្លាំងសង្កាត់រដ្ឋបាលព្រៃឈើស្រុកអូររាំង កម្លាំងកងរាជអាវុធហត្ថខេត្ត និងកម្លាំងកងរាជអាវុធហត្ថស្រុកអូររាំង ចុះបង្ក្រាបបទល្មើសធនធានធម្មជាតិ ស្ថិតនៅចំណុចភូមិពូហ្យាម ឃុំសែនមនោរម្យ ស្រុកអូររាំង ខេត្តមណ្ឌលគិរី ដោយរុករកឃើញគំនរឈើចំនួន២កន្លែង មានចំនួនសរុប ៥៥ដុំ។
បច្ចុប្បន្នឈើទាំងអស់ខាងលើនេះ កម្លាំងជំនាញកំពុងធ្វើការដឹកជញ្ជូន យកមករក្សាទុកនៅ សង្កាត់រដ្ឋបាលព្រៃឈើស្រុកអូររាំង ដើម្បីចាត់ការបន្តតាមនីតិវិធី ៕ដោយ៖បញ្ញាស័ក្តិ