ក្រុងព្រះសីហនុ៖ គ្រោះថ្នាក់បណ្តាលមកពីរថយន្តស្ទូច នៅក្រុងព្រះសីហនុ។ ករណីនេះសមត្ថកិច្ចបញ្ជាក់ថា ជាគ្រោះថ្នាក់ការងារ មិនមែនជាគ្រោះថ្នាក់ចរាចរណ៍ទេ។
ហេតុការណ៍បានកើតឡើងនៅវេលាម៉ោងជិត៩ព្រឹកថ្ងៃទី១៦ មីនា ២០២០ សង្កាត់លេខ២ ក្រុងព្រះសីហនុ ម្តុំផ្លូវចុះពីអប្សរាថតរូបមកក្រោម បង្កឡើងដោយរថយន្ត១គ្រឿងម៉ាក KATO ពណ៌ លឿង គ្មានផ្លាកលេខ ជាកម្មសិទ្ធរបស់ឈ្មោះ តាយ ស្នាក់នៅ ភូមិ៣ សង្កាត់លេខ១ក្រុងព្រះសីហនុ ស្ទូចសម្ភារៈសំណង់ បានដួលរលំសង្កត់ មកលើយានយន្តមួយចំនួនរួមមាន៖
១, រថយន្តស្ទូចម៉ាក HOWO ពណ៌ ស ពាក់ផ្លាកលេខ ភ្នំពេញ3F-1339 ម្ចាស់ឈ្មោះ ជា រ៉ាវី ភេទប្រុស អាយុ ៣២ឆ្នាំ នៅខេត្តកំពង់ស្ពឺ ។
២, រថយន្តម៉ាក LEXUS RX300 ពណ៌ ទឹកមាស ពាក់ផ្លាកលេខ ភ្នំពេញ2N-1475 ម្ចាស់ឈ្មោះ CHEN EI HAO ភេទប្រុស អាយុ ៥៥ឆ្នាំ ជនជាតិចិន ស្នាក់នៅ កន្លែងកើតហេតុ ។
៣, ឡំប្រឺតាកង់៣ ពណ៌ ស ពាក់ផ្លាកលេខ ភ្នំពេញ1HA-1873 ម្ចាស់ឈ្មោះ ទឹម ភា ភេទប្រុស អាយុ ៤១ឆ្នាំ នៅខេត្តព្រៃវែង ។
៤, បង្គោលភ្លើងអគ្គិសនីខេត្តព្រះសីហនុ ចំនួន ១ដើម ។
ក្រោយហេតុការណ៍នេះ សមត្ថកិច្ចចម្រុះមាននគរបាល កងរាជអាវុធហត្ថនិងសមត្ថកិច្ចមូលដ្ឋាន សហការគ្នា អន្តរាគមន៍ដោះស្រាយបញ្ហាផ្សេងៗនិងសម្រួលចរាចរណ៍។
បើតាមសមត្ថកិច្ចបញ្ជាក់ថា ហេតុការណ៍នេះកើតឡើងដោយសារតែ ការបំពេញការងាររបស់រថយន្តស្ទូចមិនត្រឹមត្រូវតាមបច្ចេកទេស និងថាជាសំណាងហើយដែលគ្មានប៉ះពាល់ដល់អាយុជីវិតមនុស្ស។
បច្ចុប្បន្នវត្ថុតាង នគរបាលជំនាញចាត់ចែងនាំយកមករក្សាទុកដើម្បីដោះស្រាយបន្ត៕ ដោយ៖បញ្ញាស័ក្តិ
