ភ្នំពេញ៖ អង្គការអាដហុក ADHOC-Cambodia នៅថ្ងៃទី១៦ខែមីនានេះ បានចេញប្រកាសព័ត៌មានលើបណ្តាញសង្គមហ្វេសប៊ុកថា លោក អ៊ួច ឡេង ប្រធានអង្គការក្រុមកិច្ចការ ពិសេសសិទ្ធិមនុស្សកម្ពុជា និងសកម្មជនព្រៃឈើ៣រូបទៀត ត្រូវបានដោះលែងហើយ នៅវេលាម៉ោង១២ និង៣០នាទី ថ្ងៃទី១៦ ខែមីនា ឆ្នាំ២០២០ នេះ ដោយធ្វើកិច្ចសន្យា តម្រូវឱ្យលោក អ៊ួច ឡេង ចុះបញ្ជីនៅក្រសួងជាមុនសិន មុននឹងធ្វើសកម្មភាពបន្តទៀត ។
លោកទាំង៤នាក់ មិនទាន់មានការចោទប្រកាន់នៅឡើយ ដោយមិនទាន់មានតម្រុយពិរុទ្ធភាពគ្រប់គ្រាន់ និងបំបែកសំណុំរឿងមួយទៀត ដើម្បីស៊ើបអង្កេតទាក់ទងទៅនឹងការប្រើហិង្សាវាយដំ មកលើក្រុមសកម្មជនការពារព្រៃឈើ ។
លោកមុត ចន្ថា នាយខុទ្ទកាល័យលោកកឹម សុខា បានសរសេរសារនៅថ្ងៃទី១៦មីនានេះ”សូមសម្តែងនូវការត្រេកអរ ជាមួយសកម្មជនសិទ្ធិមនុស្ស និងបរិស្ថានទាំងបួនរូប ដែលត្រូវបានដោះលែង តែត្រូវបានដាក់ឲ្យស្ថិតក្រោមការត្រួតពិនិត្យតាមផ្លូវតុលាការ។ យើងនៅតែទាមទារឲ្យទម្លាក់ចោលបទចោទប្រកាន់ និងមានវិធានការចំពោះសន្តិសុខក្រុមហ៊ុន Think Biotech Co., Ltd. ដែលត្រូវបានគេយល់ថាបានចាប់ និងបង្ខាំងសកម្មជនទាំងបួនរូបដោយបំពានច្បាប់”។
ចំណែកលោក ពេជ្រ ស្រស់ Pich Sros ប្រធានគណបក្សយុវជនកម្ពុជា បានលើកឡើងថា “អបអរសាទរ សកម្មជនបរិស្ថានទាំងបួនរូប ត្រូវបានដោះលែងហើយ ! ! ! នៅវេលាម៉ោង ១២ ថ្ងៃត្រង់ទី១៦ ខែមីនា ឆ្នាំ២០២០ លោក អ៊ួច ឡេង និងសកម្មជនបរិស្ថានព្រៃឈើ ៣នាក់ទៀត ត្រូវបានសាលាដំបូងខេត្តក្រចេះ ធ្វើការដោះលែងឲ្យមានសេរីភាព តែស្ថិតនៅក្រោមការត្រួតពិនិត្យរបស់តុលាការ “។
បណ្តាញសង្គមហ្វេសប៊ុក បានលើកឡើងថា អាអ្នកកាប់បំផ្លាញព្រៃមិនចាប់ បែរជាចាប់អ្នកការពារព្រៃឈើ និងបរិស្ថានទៅវិញ។ ក្នុងពេលតវ៉ានៅមុខតុលាការនោះ ក្រុមប្រជាពលរដ្ឋបានសរសេរបដា ដើម្បីទាមទាឲ្យមានការដោះលែងក្រុមអ្នកបរិស្ថាន ឲ្យមានសេរីភាពវិញ។
ក្រុមសកម្មជនបរិស្ថាន សមាគម និងអង្គការសង្គមស៊ីវិល បានចេញសេចក្តីថ្លែងការណ៍រួមស្តីពី ការឃាត់ខ្លួនលោក អ៊ូច ឡេង ប្រធានអង្គការ ក្រុមកិច្ចការពិសេសសិទិ្ធមនុស្សកម្ពុជា និងសកម្មជនបរិស្ថានបីរូបទៀត។ យើងខ្ញុំជា ក្រុមសកម្មជនបរិស្ថាន សមាគម និងអង្គការសង្គមស៊ីវិលដែលកំពុងធ្វើការងារលើវិស័យសិទ្ធិមនុស្ស ព្រៃឈើ និងបរិស្ថានសូមធ្វើការថ្កោលទោសចំពោះ ក្រុមហ៊ុនស៊ីងបាយអូថេក (ខេមបូឌា) ខូអិលធីឌី (Think Biotech Co., Ltd) ដែលបានប្រើកងកម្លាំងសន្តិសុខដោយមិនសមហេតុផលក្នុងការឃាត់ខ្លួនសកម្មជនបរិស្ថាន និងព្រៃឈើចំនួន៤ នាក់ រួមមានលោក អ៊ូច ឡេង ប្រធានអង្គការ ក្រុមកិច្ចការពិសេសសិទិ្ធមនុស្សកម្ពុជា និងជាម្ចាស់ពានរង្វាន់វីរៈជនបរិស្ថាន Goldman Environmental Prize ឆ្នាំ២០១៦, លោក ខេម សុខឃី និងលោក ស្រី ថី ដែលជាសមាជិកបណ្តាញសហគមន៍ព្រៃឡង់, និងលោក មេន ម៉ាត់ សកម្មជនបរិស្ថានដែលត្រូវបានទទួល រងអំពើហិង្សាពីសំណាក់កម្មករក្រុមហ៊ុន នៅក្នុងបរិវេណ និងស្ថិតនៅក្រោមការទទួលខុសត្រូវរបស់ក្រុមហ៊ុន មុនពេលពួកគេត្រូវបានបញ្ជូន ទៅកាន់អធិការដ្ឋាននគរបាលស្រុកសំបូរ ខេត្តក្រចេះ។
នៅវេលាម៉ោងប្រមាណ៩ ព្រឹក នាថ្ងៃទី១៣ ខែមីនា ឆ្នាំ២០២០ អ្នកទាំងបួននាក់ខាងលើ ត្រូវបានសន្តិសុខ របស់ ក្រុមហ៊ុនស៊ីងបាយអូថេក ឃាត់ខ្លួននិងនាំចូលទៅក្នុងក្រុមហ៊ុន នៅចំណុចដំបូកស ភូមិរមួល ឃុំកំពង់ចាម ស្រុកសំបូរ ខេត្តក្រចេះ។ ពួកគេត្រូវបានក្រុមហ៊ុនសាកសួរ និងមិនអនុញ្ញាតឱ្យចេញពីទីតាំងក្រុមហ៊ុន ចាប់តាំងពីម៉ោងប្រមាណ៩ព្រឹក ដោយមិនទទួលបានដំណឹងអ្វីទាល់តែសោះ រហូតដល់ម៉ោងប្រមាណ៤ រសៀល ទើបទទួលបានដំណឹងថាពួកគេទាំង៤ នាក់ត្រូវបានក្រុមហ៊ុនប្រគល់ជូនមន្ត្រីប៉ូលីស នៃអធិការដ្ឋានស្រុកសំបូរ។
មុនពេលកើតហេតុ គឺនៅថ្ងៃទី១២ ខែមីនា ឆ្នាំ២០២០ អ្នកទាំង៤ នាក់ខាងលើបានធ្វើដំណើរដោយម៉ូតូទៅឃ្លាំមើល និងស៊ើបអង្កេតសកម្មភាព កាប់ឈើខុសច្បាប់នៅក្នុងតំបន់ព្រៃឡង់ ខេត្តក្រចេះ។ លុះដល់ពេលល្ងាច ពួកគេក៏សម្រេចចិត្តស្នាក់នៅផ្ទះរបស់ពលរដ្ឋ ដែលស្ថិតនៅចំណុចដំបូកស ភូមិរមួល ឃុំកំពង់ចាម ស្រុកសំបូរ ខេត្តក្រចេះ នៅជាប់របងក្រុមហ៊ុនស៊ីងបាយអូថេក។ នៅព្រឹកបន្ទាប់ ថ្ងៃទី១៣ ខែមីនា ម៉ោងប្រមាណ៩ ព្រឹក ស្រាប់តែមានក្រុមសន្ដិសុខក្រុមហ៊ុនមកសាកសួរនិងនាំខ្លួនអ្នកទាំង៤ ចូលទៅក្នុងក្រុមហ៊ុន។ លើសពីនេះ សកម្មជនបរិស្ថានម្នាក់ឈ្មោះ មេន ម៉ាត់ ត្រូវបានរាយការណ៍មកថា បានទទួលរងអំពើហិង្សាពីសំណាក់កម្មករក្រុមហ៊ុន២នាក់។
ការឃាត់ខ្លួនសកម្មជនបរិស្ថានទាំង៤ នាក់ តាមរយៈការប្រើកម្លាំងសន្តិសុខរបស់ ក្រុមហ៊ុនស៊ីងបាយអូថេក គឺជាការប្រើអំណាចដោយបំពាន និងជាការឃាត់ខ្លួនដោយផ្ទុយពីនីតិវិធីព្រហ្មទណ្ឌនៃព្រះរាជាណាចក្រកម្ពុជា ហើយក្រុមហ៊ុនត្រូវទទួលខុសត្រូវ ចំពោះអំពើហិង្សាដែលកើតឡើងពីសំណាក់កម្មករក្រុមហ៊ុនលើលោក មេន ម៉ាត់ នៅក្នុងបរិវេណក្រុមហ៊ុន នៅមុនពេលដែលបានបញ្ជូនពួកគាត់ទៅឱ្យនគរបាលនៃអធិការដ្ឋាន ស្រុកសំបូរ ខេត្តក្រចេះ។
មកដល់រសៀលថ្ងៃទី១៤ ខែមីនា ពួកគាត់មិនទាន់ត្រូវបានដោះលែង និងស្ថិតនៅក្រោមការឃាត់ខ្លួននៅក្នុងអធិការដ្ឋាននគរបាល ស្រុកសំបូរ នៅឡើយ។ សកម្មភាពនេះ គឺជារូបភាពនៃការគំរាមកំហែងដល់សកម្មជនបរិស្ថាននិងព្រៃឈើ ដែលគ្រាន់តែធ្វើសកម្មភាព ដោយសន្តិវិធីក្នុងការឃ្លាំមើល និងរាយការណ៍អំពីសកម្មភាព នៃការកាប់បំផ្លាញព្រៃឈើនៅតំបន់ព្រៃឡង់ និងតំបន់ផ្សេងទៀត ស្របតាមសិទ្ធិដែលបានធានា ដោយរដ្ឋធម្មនុញ្ញនៃព្រះរាជាណាចក្រកម្ពុជា និងច្បាប់ ស្តីពីកិច្ចគាំពារបរិស្ថាន និងគ្រប់គ្រងធនធានធម្មជាតិ ដែលបានលើកទឹកចិត្តនិងលទ្ធភាព ឱ្យសាធារណជនចូលរួម ក្នុងកិច្ចការពារបរិស្ថាន និងការពារធនធានធម្មជាតិ។
យើងទាំងអស់គ្នា ទទួលស្គាល់និងកោតសរសើរចំពោះលោក អ៊ូច ឡេង និងសកម្មជនបរិស្ថាននិងព្រៃឈើទាំងបីនាក់ ដែលកំពុងត្រូវបានបន្តឃាត់ខ្លួន នៅអធិការដ្ឋានប៉ូលីស ស្រុកសំបូរ ខេត្តក្រចេះ ចំពោះវីរៈភាពរបស់ពួកគេ ក្នុងការការពារព្រៃឈើ ការឃ្លាំមើល និងការរាយការណ៍អំពីវិនាសកម្មព្រៃឈើនៅកម្ពុជា។ សកម្មភាពរបស់ពួកគេ បានចូលរួមចំណែកយ៉ាងសំខាន់ ក្នុងបុព្វហេតុការពារនិងអភិរក្សព្រៃឈើ និងធនធានធម្មជាតិ ដើម្បីរួមចំណែកក្នុងការកាត់បន្ថយការប្រែប្រួល អាកាសធាតុសាកល និងរក្សាជីវៈចម្រុះស្របតាមគោលដៅអភិវឌ្ឍន៍ប្រកបដោយចីរភាព។
ជាថ្មីម្តងទៀត យើងសូមអំពាវនាវឱ្យនគរបាល នៃអធិការដ្ឋានស្រុកសំបូរ ខេត្តក្រចេះ សូមរក្សាសុវត្ថិភាព និងដោះលែងសកម្មជនបរិស្ថានទាំង៤ នាក់ខាងលើ ដោយគ្មានលក្ខខណ្ឌ។ យើងក៏ស្នើឱ្យប៉ូលីសនៃអធិការដ្ឋានស្រុក និងខេត្តក្រចេះ ធ្វើការស៊ើបអង្កេតចំពោះភាពមិនប្រក្រតី នៃការឃាត់ខ្លួនសកម្មជនបរិស្ថាន របស់ក្រុមហ៊ុនស៊ីងបាយអូថេក និងស្វែងរកជនដៃដល់ទាំង២នាក់ និងអ្នកពាក់ព័ន្ធ ដែលបានប្រើអំពើហិង្សាលើលោក មេន ម៉ាត់ មកផ្តន្ទាទោសតាមនីតិវិធីច្បាប់ជាធរមានដើម្បីការពារសិទ្ធិរបស់ជនរងគ្រោះ៕ដោយ៖កូឡាប
