ខេត្តស្វាយរៀងៈលោកស្រីកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី និងជារដ្ឋមន្ដ្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចតំណាងដ៏ខ្ពង់ខ្ពស់សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៅព្រឹកថ្ងៃទី១៦ ខែមីនា ឆ្នាំ២០២០នេះ បានមានប្រសាសន៍ថាៈ ប្រជាពលរដ្ឋត្រូវចេះការពារខ្លួនដោយធ្វើអនាម័យជាប្រចាំដើម្បីបង្ការជំងឺឆ្លង COVID-19 ខណៈដែល ១៤៤ប្រទេស នៅលើពិភពលោកកំពុងតែជួបនឹងបញ្ហាដោយសារវីរុសនេះ។
លោកស្រីបានមានប្រសាសន៍ដូច្នេះ ក្នុងឱកាសដែលលោកស្រីបានអញ្ជើញ ជាអធិបតីក្នុងពិធីកាត់ឬសសីមា និងសម្ពោធសមិទ្ធផលនៅក្នុងវត្តពោធិ៍ឧត្តម (ហៅវត្តអណ្តូងត្របែក) ស្ថិតក្នុងភូមិអណ្តូងត្របែក ឃុំអណ្តូងត្របែក ស្រុករមាសហែក ខេត្តស្វាយរៀង ដែលមានប្រជាពលរដ្ឋចូលរួមប្រមាណ ១០០០នាក់។
លោកស្រីកិត្តិសង្គហបណ្ឌិត ម៉ែន សំអន មានប្រសាសន៍ផ្តាំផ្ញើសាកសួរសុខទុក្ខ ពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងពាំនាំនូវការផ្តាំផ្ញើពីសំណាក់សម្តេចវិបុលសេនាភក្តី សាយ ឈុំ និងលោកស្រី អ៊ូ សាន នូវការសាកសួរសុខទុក និងសេចក្តីនឹករលឹកចំពោះបងប្អូនទាំងអស់គ្នាដែលមានវត្តមាននាថ្ងៃនេះ។
លោកស្រីបានថ្លែងអំណរព្រះគុណចំពោះ ព្រះមុន្នីចន្ទធម្មោ នេត សែម ព្រះចៅអធិការវត្តពោធិ៍ឧត្តម និងអតីតគណៈកម្មការ និងព្រះចៅអធិការវត្តគ្រប់ជំនាន់ សម្តេចវិបុលសេនាភក្តី សាយ ឈុំ និងលោកជំទាវ អ៊ូ សាន (សម្តេច និងលោកស្រី គឺជាអ្នកផ្តើមបុណ្យ) ព្រមទាំងសប្បុរសជនជាច្រើនទៀត រួមជាមួយ នឹងថ្នាក់ដឹកនាំខេត្តគ្រប់លំដាប់ថ្នាក់ និងអង្គភាពជុំវិញខេត្តស្វាយរៀង ដែលបានរួមសាមគ្គី គ្នាដោយបានចលនាគៀរគរថវិកាមកកសាង ព្រះវិហារ ដងទង់ សាលាបាលី វច្ចកុដិ និងចាក់ដីបំពេញក្នុងវត្ត ដែលបានចំណាយអស់ថវិកា ៣៥០.០០០$ ដូចដែលយើងទាំងអស់ គ្នាបាននឹងកំពុងរៀបចំពិធីនាពេលនេះ។
លោកស្រីបានបន្តថា សម្តេចប្រមុខរាជរដ្ឋាភិបាល ក៏បានគិតគូរប្រាក់ខែដល់កម្មករ-កម្មការិនីរោងចក្រ ដែលជាប់គាំងពុំមានដំណើរការ ក្នុងអំឡុងពេលវត្ថុធាតុដើមផ្គត់ផ្គង់មិនទាន់ នៅពេលដែលមានការវាយលុកពី វីរុសកូរូណា COVID-19 នេះ គឺរដ្ឋាភិបាលបានចេញ ២០ភាគរយ ចំណែកឯម្ចាស់រោងចក្របានចេញ ៤០ភាគរយរួមជាមួយនឹង ការទទួលបាននូវការបណ្តុះបណ្តាល ជំនាញពីមន្ទីរការងារខេត្តស្វាយរៀងផងដែរ។
លោកស្រីកិត្តិសង្គហបណ្ឌិតបានអំពាវនាវ ដល់បងប្អូនប្រជាពលរដ្ឋនូវចំណុច សំខាន់មួយចំនួនដូចខាងក្រោម៖
១- ការចេះការពារខ្លួន ការធ្វើអនាម័យជាប្រចាំ គឺជាជម្រើសដែលល្អបំផុត ដែលការញរខ្លួនបានពីជំងឺគ្រប់ប្រភេទ រួមទាំងជំងឺ COVID-19 ផងដែរ ខណៈពេលដែល ១៤៤ប្រទេស នៅលើពិភពលោកកំពុងតែជួបនឹងបញ្ហា ដោយសារការឆ្លង រាលដាលវីរុសកូរ៉ូណា ឬ COVID-19 នេះ ដែលមានអ្នកបានឆ្លងដល់ទៅជិត ១៦ម៉ឺននាក់ និងមានអ្នកស្លាប់ដល់ទៅជាង ៦ពាន់នាក់។
២- ត្រូវរួមគ្នាថែរក្សាសុខសន្តិភាព និងការអភិវឌ្ឍន៍ ដោយរក្សាឲ្យបាននូវសន្តិសុខសណ្តាប់ធ្នាប់ពង្រឹងនូវភូមិ-ឃុំ មានសុវត្ថិភាពនៅមូលដ្ឋាន និងរួមគ្នាថែរក្សានូវសមិទ្ធផលនានារបស់រាជរដ្ឋាភិបាល ដែលបានផ្តល់ជូន ឱ្យបានគង់វង្សសម្រាប់ទុកដល់កូនចៅជំនាន់ក្រោយៗទៀត។
៣- មន្ទីរសុខាភិបាលខេត្តស្វាយរៀង ត្រូវបន្តយកចិត្តទុកដាក់បន្ថែមទៀត ក្នុងការផ្តល់សេវា អប់រំសុខភាព ការបង្ការជំងឺ និងផ្តល់សេវាសុខាភិបាលជូនប្រជាជនតាមមូលដ្ឋាន ក្នុងដែនសមត្ថកិច្ចរៀងៗខ្លួនឱ្យបានទាន់ពេលវេលា និងមានប្រសិទ្ធភាព។
៤- ដោយសារតែការកើនឡើងនៃកម្តៅផែនដី និងបាតុភូតធម្មជាតិនានា ដែលអាចកើតឡើងជាយថាហេតុ ខ្ញុំស្នើឲ្យបងប្អូនទាំងអស់គ្នាត្រូវថែរក្សាទឹកទុក ឲ្យបានល្អសម្រាប់ការប្រើប្រាស់ប្រចាំថ្ងៃ៕ ដោយ៖វ៉ៃកូ