ភ្នំពេញ៖ បន្ទាប់ពីមានសារសំឡេងចែករំលែកតៗគ្នាៗតាមបណ្តាញសង្គម ដោយជនអនាមិកថាមានខ្មែរឥស្លាមជាច្រើននាក់ នៅសង្កាត់ព្រែកប្រា បានឆ្លងកូវីដ១៩ មកពីម៉ាឡេស៊ីនោះ លោកស្រី សេន សាណាស់ សាមាជិកក្រុមប្រឹក្សាខណ្ឌច្បារអំពៅ បានសរសេរក្នុងហ្វេសប៊ុករបស់ខ្លួននាល្ងាចថ្ងៃទី១៦មីនា នេះថា ៖ ព័ត៌មាននេះជាព័ត៌មានមិនពិត គ្មានមូលដ្ឋានច្បាស់លាស់នោះទេ ចំពោះបណ្តាហ្វេសប៊ុកមួយចំនួនថា សង្កាត់ព្រែកប្រា កើត 40រូប covid-19 មិនពិតឡើយ ជាព័ត៌មានបំពុលសង្គម។
បងប្អូនខ្មែរឥស្លាមរស់នៅក្នុងសង្កាត់ព្រែកប្រា ខណ្ឌច្បារអំពៅ មានចំនួន ៧នាក់ ក្នុងចំណោមបងប្អូនជនជាតិឥស្លាមក្នុងប្រទេសកម្ពុជា ដែលបានចូលរួមក្នុងពិធីអ៊ិជទីម៉ាក នៅជាយទីក្រុងកូឡាឡាំពួរ ប្រទេសម៉ាឡេស៊ី។ បច្ចុប្បន្ននេះក្រសួងសុខាភិបាល បានយកចិត្តទុកដាក់តាមដានពិនិត្យសុខភាព និងធ្វើតេស្តស្វែងរកជំងឺcovid-19 លើពួកគាត់ទាំងអស់គ្នា។ លទ្ធផលនៃការត្រួតពិនិត្យក្រសួងសុខាភិបាល នឹងប្រកាសជូនជាសាធារណៈ។
សូមបញ្ជាក់ថា បងប្អូនជនជាតិឥស្លាមចំនួន២នាក់នៅខេត្តព្រះវិហារ ដែលបានចូលរួមក្នុងពិធីអ៊ិជទីម៉ាក នៅជាយទីក្រុងកូឡាឡាំពួរ ប្រទេសម៉ាឡេស៊ី មកដល់កម្ពុជាវិញ ត្រូវបានរកឃើញមានជំងឺកូវីដ១៩ ហើយកំពុងស្ថិតក្នុងដំណាក់កាលព្យាបាល៕ដោយ៖កូឡាប
