ដូចដែលប្រិយមិត្ត និងមហាជនជាច្រើន ជាពិសេសអ្នកប្រើប្រាស់បណ្តាញសង្គម បានដឹងរួចហើយថា ព្រះនាងតូច ជេណា បច្ចុប្បន្ននេះ បានកំពុងទទួលការគោរពស្រឡាញ់ និងការកោតសរសើរជាខ្លាំង ពីសំណាក់បងប្អូនជនរួមជាតិខ្មែរទាំងក្នុង និងក្រៅប្រទេស ព្រោះថា អ្នកអង្គម្ចាស់ពុំត្រឹមមានរូបសម្រស់ស្រស់ផូរផង់ប៉ុណ្ណោះទេ តែនៅមានទេពកោសល្យខាងផ្នែកសិល្បះទាំងចម្រៀង និងសម្តែងមិនធម្មតាដ៏មិននឹកស្មាន ខណៈព្រះនាងទើបតែមានព្រះជន្ម ៨ ព្រះវស្សា ។ មិនត្រឹមតែប៉ុណ្ណឹង អ្នកអង្គម្ចាស់តូចក៏ថែមទាំងអាចនិយាយបាន ៥ ភាសាបរទេស ទៀតផង ។
ដោយបានមើលឃើញពីបុគ្គលិកលក្ខណៈសម្បត្តិដ៏ឆ្នើមរបស់ទ្រង់ល្អតាំងពីតូចយ៉ាងដូច្នេះ ក្រុមហ៊ុនសែលកាត (cellcard) បានសម្រេចិត្ត និងប្រកាសជាផ្លូវការទទួលយកព្រះនាងតូច នរោត្តម ជេណា ជារាជទូសុឆន្ទៈ ។
ខាងក្រោមនេះជាសេចក្តីប្រកាសផ្លូវការរបស់ក្រុមហ៊ុន callcard ដែលបានបង្ហោះតាមរយៈទំព័រហ្វេសប៊ុករបស់ខ្លួនកាលពីថ្ងៃ១៣ ខែមីនា ឆ្នាំ២០២០៖
«ក្នុងថ្ងៃនេះ សែលកាតបានប្រកាសជាផ្លូវការនូវការទទួល ព្រះនាងតូច នរោត្តម ជេនណា ជារាជទូតសុឆន្ទៈ។
សេចក្តីប្រកាសនេះ ត្រូវបានធ្វើឡើងនៅក្នុងឱកាសចម្រើនព្រះជន្មគម្រប់ 8 ព្រះវស្សា របស់ព្រះនាងតូច ជេនណា ដោយមានការយាង និងអញ្ជើញចូលរួមពីសំណាក់សមាជិកក្រុមហ៊ុនសែលកាត ព្រះញាតិវង្ស និងមិត្តភក្តិជិតស្និទ្ធមួយចំនួនផងដែរ។
ក្នុងព្រះជន្ម 8 ព្រះវស្សា ព្រះនាងតូច ជេនណា អាចនិយាយបាន 5 ភាសា ទ្រង់ក៏មានទេពកោសល្យខាងសិល្បៈចម្រៀង រាំ និងសម្តែង។ ហើយក្នុងពេលបច្ចុប្បន្ននេះ អ្នកអង្គម្ចាស់ក៏កំពុងរៀននូវរបាំអប្សរាផងដែរ។
ក្នុងនាមជាក្រុមហ៊ុនរបស់ខ្មែរនិងគ្រប់គ្រងដោយជនជាតិខ្មែរទាំងស្រុង សែលកាត មានក្តីសោមនស្សជាពន់ពេក ដែលមានឱកាសបានសហការជាមួយបុគ្គលវ័យក្មេងមានបុគ្គលិកលក្ខណៈឆ្នើមដូចជាអ្នកអង្គម្ចាស់ ជេនណា ដើម្បីជួយកសាងអនាគតនៃវិស័យឌីជីថលឱ្យកាន់តែរីកចម្រើនខ្លាំងទៅមុខទៀតនៅក្នុងជំនាន់ឌីជីថលនេះ។»៕ ដោយ៖ CEN
