រាជធានីភ្នំពេញ ៖ ក្រសួងធនធានទឹកនិងឧតុនិយម បានចេញប្រកាសអំពាវនាវឲ្យប្រជាពលរដ្ឋ ថែរក្សាសុខភាពចំពោះការកើនកម្តៅ និងសូមឲ្យមានការប្រុងប្រយ័ត្នចំពោះបាតុភូត ផ្គរ រន្ទះ និងខ្យល់កន្ត្រាក់ ពិសេសបណ្តាខេត្តនៅភាគពាយ័ព្យ ចាប់ពីថ្ងៃទី១៨ ដល់២១ មីនា ឆ្នាំ២០២០ ។
ក្រសួងធនធានទឹក និងឧតុនិយម បានអះអាងបែបនេះថា តាមរយៈការតាមដានស្ថានភាពអាកាសធាតុជាប់ជាបន្ត សង្កេតឃើញថា កម្រិតសម្ពាធទាបនៅលើផ្ទៃដី និងសម្ពាធខ្ពស់នៅរយៈកម្ពស់គ្របដណ្តប់លើកម្ពុជា ចាប់ពីថ្ងៃទី ១៧ រហូតដល់ថ្ងៃទី២៣ ខែមីនានេះ អាកាសធាតុនៅក្នុងប្រទេសកម្ពុជានឹងឡើងកម្ដៅដល់ ៣៩ អង្សាសេ ហើយមានផ្គរ រន្ទះ និងខ្យល់កន្ត្រាក់ ។
ក្រសួងបន្តថា ស្ថានភាពបែបនេះធ្វើឲ្យធាតុអាកាសបន្តក្តៅនៅពេលថ្ងៃ ៖ ១.បណ្តាខេត្តនៅតំបន់វាលទំនាបកណ្តាល សីតុណ្ហភាពអប្បបរមា មានពី២៦-២៨អង្សាសេ និងសីតុណ្ហភាពមានពី៣៧-៣៩អង្សាសេ ហើយអាចមានភ្លៀងធ្លាក់ខ្សោយនៅផ្នែកខ្លះ នៅខេត្តភាគពាយ័ព្យ ចាប់ពីថ្ងៃទី១៨ដល់ទី២១មីនា។
ក្រសួងបានលើកឡើងទៀតថា ចាប់ពីថ្ងៃទី១៧-២៣ខែមីនា នឹងអាចមានភ្លៀងខ្សោយ ដោយឡែកតែខេត្តកោះកុងនឹងអាចមានភ្លៀងនៅក្នុងកម្រិតតិចទៅមធ្យម ។
ស្ថានភាពអាកាសធាតុបែបនេះ ក្រសួងឧតុនិយម បានអំពាវនាវថែរក្សាសុខភាពចំពោះការកើនកម្តៅ និងសូមឲ្យមានការប្រុងប្រយ័ត្នចំពោះបាតុភូត ផ្គរ រន្ទះ និងខ្យល់កន្ត្រាក់ ពិសេសបណ្តាខេត្តនៅភាគពាយ័ព្យចាប់ពីថ្ងៃទី១៨ ដល់២១ មីនា ឆ្នាំ២០២០ ៕ដោយ៖កូឡា
