ក្រុងព្រះសីហនុ៖ នៅព្រឹកថ្ងៃ១៧ ខែមីនា ឆ្នាំ២០២០នេះ អាជ្ញាធរក្រុងព្រះសីហនុ បានបន្តចុះរុះរើផ្ទះ និងសំណង់ផ្សេងៗ របស់ពលរដ្ឋ២៩គ្រួសារ ដែលអាជ្ញាធរបញ្ជាក់ថា សង់ប៉ះដីពង្រីកផ្លូវ និងដីអូរប្រឡាយ នៅម្តុំខាងក្រោយសាលារៀនអូរ២ ក្នុងសង្កាត់លេខ៤ ក្រុងព្រះសីហនុ ។
លោកអ៊ី សុខឡេង អភិបាលក្រុងព្រះសីហនុ បានថ្លែងថា សកម្មភាពនេះ នឹងធ្វើទៅលើសំណង់ ដែលប៉ះពាល់ទាំងអស់ ដើម្បីបើកឲ្យដំណើរការពង្រីកផ្លូវ និងកាយស្តារអូរ តាមគម្រោងរបស់ថ្នាក់ជាតិ និងរដ្ឋបាលខេត្តព្រះសីហនុ។
លោកអ៊ី សុខឡេង បានថ្លែងថាកាលពីថ្ងៃទី១៦ ខែមីនា ឆ្នាំ២០២០ នៅសាលាក្រុងព្រះសីហនុ បានដឹកនាំប្រជុំសម្របសម្រួល ជាមួយប្រជាពលរដ្ឋចំនួន ២៩គ្រួសារ ដែលរស់នៅតាមបណ្តោយអូរ៥ ដែលរងផលប៉ះពាល់ ក្នុងគម្រោងកាយអូរពង្រីកតាមប្លង់ប្រព័ន្ធ។ សមាសភាពចូលរួមប្រជុំ រួមមាន តំណាងក្រសួងសាធារណការ និងដឹកជញ្ជូន លោកប្រធានមន្ទីរធនធានទឹក តំណាងមន្ទីរសាធារណការ តំណាងមន្ទីរបរិស្ថាន និងមន្ត្រីក្រុងជាច្រើនរូប។ លទ្ធផលអង្គប្រជុំ ចំណាយពេលជិត ២ម៉ោង ដើម្បីសម្របសម្រួលជាមួយប្រជាពលរដ្ឋចំនួន ២៩គ្រួសារ សម្រេចជោគជ័យ ១០០ភាគរយ។
លោកអ៊ី សុខឡេង អភិបាលក្រុងព្រះសីហនុថ្លែងថា មុនពេលអាជ្ញាធរចុះវាយកម្ទេចផ្ទះវីឡាមួយកាលពីរសៀលថ្ងៃ១៦ខែមីនាឆ្នាំ២០២០ រដ្ឋបាលក្រុងព្រះសីហនុ អញ្ជើញប្រជាពលរដ្ឋចំនួន ២៩គ្រួសារ រស់នៅតាមបណ្តោយអូរ៥ ដែលរងផលប៉ះពាល់ ក្នុងគម្រោងកាយអូរពង្រីកតាមប្លង់ប្រព័ន្ធ មកពន្យល់ប្រាប់ពីគោលការណ៍របស់អាជ្ញាធរខេត្ត ក្នុងការមិនអនុញ្ញាតឲ្យមានសំណង់ផ្សេងៗ នៅលើដីអូរនេះទៀតទេ ។ បើតាមលោកអភិបាលក្រុង បានបញ្ជាក់ថា ក្រៅពីផ្ទះវីឡា ដែលបានវាយកម្ទេចកាលពីម្សិលមិញ សំណង់ផ្សេងៗទៀត របស់ពលរដ្ឋដែលប៉ះពាល់ដីអូរនេះ នឹងត្រូវអនុវត្តន៍ដូចគ្នា តាមរយៈការរុះរើដោយខ្លួនឯង ឬរុះរើវាយកម្ទេច ដោយកម្លាំងអាជ្ញាធរ នៅថ្ងៃទី១៧ ខែមីនា ឆ្នាំ២០២០នេះបន្តទៀត ក្នុងនោះបើតាមលោកអភិបាលក្រុងបញ្ជាក់ថា ពលរដ្ឋម្ចាស់សំណង់ បានយល់ព្រមចូលរួមសហការ ក្នុងការវាយកម្ទេចនេះ ដោយមិនធ្វើការតវ៉ាជំទាស់ឡើយ ។ ចំពោះប្រតិកម្មមួយចំនួន ដែលលើកឡើងថា ពេលពលរដ្ឋសាងសង់ ផ្នែកជំនាញមិនចុះហាមឃាត់ លោកអភិបាលក្រុង បានពន្យល់ត្រឡប់វិញថា ជាធម្មតា នៅពេលមានការសាងសង់សំណង់មិនរៀបរយ ឬមិនស្របច្បាប់ណាមួយ (សំណង់គ្មានប្លង់) អាជ្ញាធរ ឬមន្ត្រីជំនាញ បានចុះហាមឃាត់ ជាមួយនឹងការធ្វើកំណត់ហេតុ កិច្ចសន្យាផ្សេងៗ ជាមួយពលរដ្ឋពាក់ព័ន្ធ មិនដែលរំលងឡើយ ក្នុងនោះមានពលរដ្ឋមួយចំនួនអនុវត្តន៍តាម និងម្ចាស់សំណង់មួយចំនួន មិនអនុវត្តន៍តាម បន្តសាងសង់ លើទីតាំងដែលបានហាមឃាត់នោះ។
លោកអភិបាលក្រុងព្រះសីហនុ បានថ្លែងរំលឹកដាស់តឿនថា ចាប់ពីពេលនេះតទៅ សូមពលរដ្ឋទាំងអស់ បញ្ឈប់ការសាងសង់សំណង់ ឬផ្ទះស្នាក់នៅ ដោយពុំបានសុំច្បាប់អនុញ្ញាត ពីអាជ្ញាធរ ឬស្ថាប័នជំនាញ ដើម្បីបង្ការកុំឲ្យមានការខាតបង់ ក្នុងពេលដែលអាជ្ញាធរឲ្យរុះរើចេញវិញ៕ដោយ៖បញ្ញាស័ក្តិ