ភ្នំពេញ៖ នៅថ្ងៃទី១៧ខែមីនានេះ មានក្រសួងចំនួន២ គឺក្រសួងពាណិជ្ជកម្ម និងក្រសួងសាធារណការនិងដឹកជញ្ជូន បានចេញសេចក្តីណែនាំ ស្តីពីការអនុវត្តវិធានការបង្ការ និងទប់ស្កាត់ការរាតត្បាតនៃជំងឺកូវីដ ១៩ នៅក្នុងទីស្តីការក្រសួងរបស់ខ្លួន។
ក្រសួងសាធារណការ ក៏បានប្រកាសព័ត៌មានថា មន្ត្រីរដ្ឋបាលដែលធ្វើការដោយផ្ទាល់ទទួល ប្រគល់ឯកសារ ឬមន្ត្រីចរាចរឯកសារដែលមានការទាក់ទងជាមួយអង្គភាពខាងក្រៅ ត្រូវពាក់ម៉ាស់ជាប្រចាំ និងប្រើប្រាស់ស្រោមដៃការពារ ហើយត្រូវលាងដៃដោយសាប៊ូ ឬទឹកអាកុលជាប្រចាំ មុននឹងក្រោយពេលកាន់ឯកសារ។ រាល់ឯកសារចេញចូលទាំងឡាយ ត្រូវធ្វើការបាញ់ថ្នាំសម្លាប់មេរោគ ជាពិសេសឯកសារប្រគល់ទទួលនៅច្រកចូលចេញនីមួយៗ នៃការិយាល័យទទួលឯកសាររដ្ឋបាល។ រាល់ម៉ាស៊ីឧបករណ៍ មធ្យោបាយបម្រើការងារប្រចាំថ្ងៃ ដែលប្រើប្រាស់រួមគ្នា ជាប្រចាំ កន្លែងសាធារណៈ ដែលមានការប៉ះពាល់ច្រើន ដូចជា ជណ្តើរយន្ត បង្កាន់ដៃជណ្តើរ បន្ទប់ទឹក បន្ទប់ប្រជុំ បរិក្ខារប្រើប្រាស់ ក្នុងការិយាល័យដូចជា តុ កៅអី ជាដើម ត្រូវមានវិធានការលាង ឬជូតសម្អាត់ដោយអាកុលឬបាញ់ថ្នាំសម្លាប់មេរោគជាប្រចាំ។ ត្រូវប្តូរឥរិយាបថចាប់ដៃ មកជាការសំពះគ្នាវិញ និងរក្សាគម្លាតសមរម្យមួយ ក្នុងរង្វង់១,៥ម៉ែត្រ ទៅ២ម៉ែត្រ ក្នុងអំឡុងពេលធ្វើការទំនាក់ទំនងគ្នា ជាមួយបុគ្គលមកពីខាងក្រៅ ឬសហការី។ ត្រូវកាត់បន្ថយសមាជិកចូលរួមប្រជុំឲ្យបានជាអតិបរមា ដោយកិច្ចប្រជុំមួយអាចមានការចូលរួមពីបុគ្គលិកដែលពាក់ព័ន្ធចាំបាច់ប៉ុណ្ណោះ ហើយកន្លែងអង្គុយប្រជុំ ត្រូវរក្សាឲ្យមានគម្លាតពីគ្នា សម្រាប់មន្ត្រីនីមួយៗ។
ក្រសួងពាណិជ្ជកម្ម បានអះអាងថា ផ្អាកការធ្វើដំណើរទៅចូលរួមកិច្ចប្រជុំ សិក្ខាសាលា ឬវគ្គបណ្តុះបណ្តាលនានានៅក្រៅប្រទេស ជាពិសេសគឺការធ្វើដំណើរទៅកាន់បណ្តាប្រទេសនៅអឺរ៉ុប សហរដ្ឋអាមេរិក និងអ៊ីរ៉ង់ លើកលែងតែមានការអនុញ្ញាតពិសេស ឬចាំបាច់បំផុតណាមួយដោយខានពុំបាន។ ផ្អាកការទទួលជួបភ្ញៀវបរទេស និងភ្ញៀវនានា។ បើពុំមានការចាំបាច់ ថ្នាក់ដឹកនាំអគ្គនាយកដ្ឋាន នាយកដ្ឋាន អង្គភាពនានា អាចអនុញ្ញាតឲ្យមន្ត្រីរបស់ខ្លួនបំពេញការងារនៅផ្ទះ តាមប្រពន្ធអនឡាញ ។ចំពោះមន្ត្រីរាជការដែលត្រឡប់មកពីបំពេញការងារនៅក្រៅប្រទេស ដូចជា អឺរ៉ុប អាមេរិក អ៊ីរ៉ង់ ត្រូវដាក់ខ្លួនឲ្យនៅដាច់ដោយឡែកក្នុងរយៈពេល១៤ថ្ងៃ៕ដោយ៖កូឡាប
