ខេត្តឧត្តរមានជ័យ៖ រដ្ឋាភិបាលអាល្លឺម៉ង់ បានផ្តល់ជំនួយ ៧,២៥ លានផោន សម្រាប់ការបោសសម្អាតមីនមនុស្សធម៌នៅកម្ពុជា ដល់អង្គការ HALO Trust ចាប់តាំងពីឆ្នាំ២០១៦។ ថ្ងៃទី១៧ ខែមីនា ឆ្នាំ២០២០ លោក ទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន និងលោក Christian Berger ឯកអគ្គរដ្ឋទូតអាល្លឺម៉ង់ប្រចាំនៅកម្ពុជា បានចុះពិនិត្យលទ្ធផល និងប្រតិបត្តិការបោសសម្អាតមីនរបស់អង្គការ HALO Trust ក្រោមជំនួយរបស់ប្រទេសអាល្លឺម៉ង់ នៅសង្កាត់អូរស្មាច់ ក្រុងសំរោង ខេត្តឧត្ដរមានជ័យ ។
លោក Christian Berger បានកោតសរសើរ ចំពោះកិច្ចប្រឹងប្រែងរបស់រាជរដ្ឋាភិបាលកម្ពុជា ក្នុងការស្តារ និងអភិវឌ្ឍន៍ប្រទេសជាតិឲ្យមានការរីកចម្រើនលើគ្រប់វិស័យដូចសព្វថ្ងៃនេះ ក្នុងនោះការសម្រេចបាននូវសមិទ្ធផលនៃការងារបោសសម្អាតមីននៅកម្ពុជានាពេលកន្លងមក។
ឯកអគ្គរដ្ឋទូតអាល្លឺម៉ង់ ក៏បានប្តេជ្ញាបន្តជួយដល់កម្ពុជា លើការងារសកម្មភាពមីន រហូតដល់កម្ពុជា សម្រេចបាននូវគោលដៅរបស់ខ្លួន គ្មានមីនឆ្នាំ២០២៥។ ជាមួយគ្នានេះ អាល្លឺម៉ង បានប្រកាសផ្តល់ជំនួយ ១,៥ លានផោនសម្រាប់ឆ្នាំ២០២០ ដល់អង្គការ HALO Trust បន្ថែមលើថវិកាដែលបានផ្តល់ចំនួន ១លានផោន រួចហើយ។
ប្រធានអាជ្ញាធរមីន លោកទេសរដ្ឋមន្ត្រី លី ធុជ បានថ្លែងអរគុណចំពោះរដ្ឋាភិបាល និងប្រជាជនអាល្លឺម៉ង ដែលបានជួយដល់កម្ពុជា ក្នុងនោះ ក៏បានចូលរួមយ៉ាងសកម្មក្នុងសកម្មភាពមីនមនុស្សធម៌នៅកម្ពុជា នាពេលកន្លងមក និងបច្ចុប្បន្ននេះ ផងដែរ។ លោក ទេសរដ្ឋមន្ត្រី ក៏បានចាត់ទុកអាល្លឺម៉ង់ គឺជាមិត្តដ៏សំខាន់មួយ និងជាដៃគូកិច្ចសហប្រតិបត្តិការដ៏យូរអង្វែង ផងដែរ។
លោកទេសរដ្ឋមន្ត្រី បានបញ្ជាក់បន្ថែមថា អាល្លឺម៉ង បានផ្តល់ជំនួយបោសសម្អាតមីនមនុស្សធម៌នៅកម្ពុជា ដល់អង្គការ HALO Trust ចាប់តាំងពីឆ្នាំ២០១៦ សរុបថវិកាចំនួន ៧,២៥ លានផោន ក្នុងនោះថវិកាចំនួន ២,៥ លានផោន សម្រាប់ការងារសកម្មភាពមីនក្នុងឆ្នាំ២០២០។ គិតត្រឹមខែកុម្ភៈ ឆ្នាំ២០២០ ក្រោមជំនួយរបស់ប្រទេសអាល្លឺម៉ង់ អង្គការ HALO Trust បានរំដោះផ្ទៃដីប្រមាណ ១២ គីឡូម៉ែត្រក្រឡា និងបានរកឃើញនិងបំផ្លាញមីនប្រឆាំងមនុស្ស ៣៤២១ គ្រាប់ មីនប្រឆាំងរថក្រោះ ១២៧ គ្រាប់ និងយុទ្ធភណ្ឌមិនទាន់ផ្ទុះ ៣៥០៦ គ្រាប់ ដោយមានអ្នកទទួលផលជាង ១៤ម៉ឺននាក់។
ឆ្លៀតក្នុងឱកាសនោះ លោកទេសរដ្ឋមន្ត្រី បានអំពាវនាវឲ្យប្រតិបត្តិករដោះមីនទាំងអស់ ត្រូវជឿទុកចិត្ត លើវិធានការនានា របស់រាជរដ្ឋាភិបាល ក្នុងការប្រយុទ្ធប្រឆាំងនឹងជំងឺកូវីដ-១៩ និងត្រូវចូលរួមទប់ស្កាត់ ការរីករាលដាល ដើម្បីបញ្ចៀសការឆ្លងជំងឺកូវីដ-១៩ ឲ្យកាន់តែមានប្រសិទ្ធភាព ដោយត្រូវថែរក្សាអនាម័យដៃ ខ្លួនប្រាណ ចំណីអាហារ និង បរិស្ថានជុំវិញខ្លួនឲ្យបានជាប់ជាប្រចាំ។
មុននឹងចាប់ផ្ដើមទស្សនកិច្ចចម្ការមីន នៅខេត្តឧត្តរមានជ័យ លោកទេសរដ្ឋមន្ត្រី លី ធុជ និងលោក Christian Berger ឯកអគ្គរដ្ឋទូតអាល្លឺម៉ងប្រចាំនៅកម្ពុជា បានចុះពិនិត្យការងារប្រតិបត្តិការសកម្មភាពមីនរបស់អង្គការ HALO Trust នៅកម្ពុជា ចាប់តាំងពីឆ្នាំ១៩៩១ រហូតដល់បច្ចុប្បន្ន នៅទីស្នាក់ការអង្គការ HALO Trust ខេត្តសៀមរាប៕ដោយ៖បញ្ញាស័ក្តិ