ភ្នំពេញ៖ សម្តេចក្រឡាហោម បានថ្លែងថា យុទ្ធនាការ នៃកិច្ចប្រតិបត្តិការរួមរបស់ប្រទេសមហាអនុតំបន់ទន្លេមេគង្គ ឱ្យអនុវត្តប្រតិបត្តិការដប់ប្រាំដប់មួយ (១៥ ១១) ក្នុងឆ្នាំ២០១៩កន្លងមក គឺខិតខំប្រឹងប្រែង និងការយកចិត្តទុកដាក់ របស់តំបន់ក្នុងការប្រយុទ្ធប្រឆាំងគ្រឿងញៀន ហើយក៏ជាការឆ្លុះបញ្ចាំងឱ្យឃើញពី កម្លាំងសាមគ្គីគ្នា។
ការប្រកាសបែបនេះ ខណៈដែលសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ តំណាងដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា អញ្ជើញបិទសន្និបាតបូកសរុបការងារ ត្រួតពិនិត្យគ្រឿងញៀន ឆ្នាំ២០១៩ និងកិច្ចប្រជុំបូកសរុបលទ្ធផល នៃការអនុវត្តន៍ផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៤ នៅទីស្តីការក្រសួងមហាផ្ទៃ ដោយមានការអញ្ជើញចូលរួមពីសំណាក់រដ្ឋមន្ត្រី-ស្ថាប័ន អង្គភាពដែលពាក់ព័ន្ធ លើយុទ្ធនាការប្រយុទ្ធប្រឆាំងគ្រឿងញៀនខុសច្បាប់ និងរាជធានី-ខេត្ត មូលដ្ឋាន និងតុលាការប្រមាណជិត៦០០នាក់ នៅរសៀលថ្ងៃទី១៧ ខែមីនា ឆ្នាំ២០២០នេះ ។
ទន្ទឹមនឹងនេះ សម្តេចក្រឡាហោម ស ខេង បានថ្លែងនូវការគាំទ្រចំពោះយុទ្ធនាការ នៃកិច្ចប្រតិបត្តិការរួម របស់ប្រទេសមហាអនុតំបន់ទន្លេមេគង្គ ឱ្យអនុវត្តប្រតិបត្តិការដប់ប្រាំដប់មួយ (១៥ ១១)
ដែលបានដាក់ចេញកាលពីកិច្ចប្រជុំថ្នាក់រដ្ឋមន្ត្រី នៃប្រទេសហត្ថលេខី អឹម អូ យូ (MoU) ១៩៩៣ នៅទីក្រុងបាងកក កាលពីថ្ងៃទី១៥ ខែវិច្ឆិកា ឆ្នាំ ២០១៩កន្លងមក គឺខិតខំប្រឹងប្រែង និងការយកចិត្តទុកដាក់របស់តំបន់ ក្នុងការប្រយុទ្ធប្រឆាំងគ្រឿងញៀន ហើយក៏ជាការឆ្លុះបញ្ចាំងឱ្យឃើញពី កម្លាំងសាមគ្គីគ្នា ក្នុងតំបន់ពិសេសការចូលរួមរបស់តំបន់ ជាមួយរាជរដ្ឋាភិបាលកម្ពុជា ក្នុង យុទ្ធនាការប្រយុទ្ធប្រឆាំងគ្រឿងញៀនខុសច្បាប់ ដែលយើងបានដំណើរការតាំងពីឆ្នា២០១៧មក និងសូមណែនាំដល់គ្រប់ក្រសួង ស្ថាប័ន និងអង្គភាពពាក់ព័ន្ធទាំងអស់ ពិសេសអង្គភាពអនុវត្តច្បាប់ ត្រូវយកចិត្តទុកដាក់ ចូលរួមអនុវត្តឱ្យមានប្រសិទ្ធភាព៕ដោយ៖បញ្ញាស័ក្តិ