ឆ្នាំជូត
រាសីស្រុតចុះ។ ក្នុងថ្ងៃនេះបើទោះធ្វើអ្វីក៏ដោយត្រូវមើលមុខក្រោយនោះទើបបញ្ហាមិនល្អឈានចូលកើតនិងរឿងរាវពីអាក្រក់ប្រែមកល្អប្រសើរឡើងវិញ។ក្រៅពីនេះបើកើតបញ្ហាអ្វីលោកអ្នកតោងតែខិតខំដោះស្រាយហើយមិនត្រូវនិយាយស្តីអ្វីដែលបង្កើតជាបញ្ហាកាន់តែធ្ងន់ធ្ងរថែមទៀត។សម្រាប់អ្នកប្រកបរបររកស៊ីជួញដូរជួបផលលំបាកក្នុងការរកផលចំណូលណាស់ ហើយការជួញជិតឆ្ងាយទៀតសោតជួបតែភាពរកាំរកូសច្រើន។ការធ្វើដំណើរទីជិតឆ្ងាយជួបភាពសុខដុមដូចសព្វមួយដង។
រីឯបញ្ហាសម្ព័ន្ធស្នេហាកំលោះក្រមុំឬពោះម៉ាយមេម៉ាយក្តី បើចង់ធ្វើការជ្រើសរើសគូស្រករពុំសូវល្អទេព្រោះច្រើនជួបគូកម្មច្រើនជាងគូព្រេង៕
ឆ្នាំឆ្លូវ
រាសីខ្ពស់ត្រដែត។ នៅថ្ងៃនេះផ្តល់ផលល្អសម្រាប់លោកអ្នកដំណើរការងារក្នុងនេះអាចទំនាក់ទំនងចរចាឬធ្វើកិច្ចសន្យាអ្វីមួយផង។អ្នកប្រកបរបររកស៊ីជួញដូរលោកអ្នកអាចបើកហាងថ្មីឬទិញកន្លែលក់ដូរថ្មីតែងជោគជ័យដូចសមប្រកបជានិច្ច។ការធ្វើដំណើរទីជិតឆ្ងាយជួបសេចក្តីសុខក្សេមក្សាន្តដូចសព្វមួយដង។
រីឯមនោសញ្ចេតនាសម្ព័ន្ធស្នេហាកំលោះក្រមុំឬពោះម៉ាយមេម៉ាយក្តីបើមិនទាន់មានគូគាប់កុំឃើញភ្លាមស្រឡាញ់ភ្លែតនាំជួបផលលំបាកនៅគ្រាក្រោយហើយត្រូវមកខ្លោចផ្សារចិត្តឥតអំពើ ៕
ឆ្នាំខាល
រាសីល្អជាមធ្យម។ នៅថ្ងៃនេះឃើញថាដំណើរជីវិត ជួបនូវបញ្ហាលំបាកត្រូវឆ្លងកាត់ច្រើនបន្តិច ប៉ុន្តែយ៉ាងណាសម្រាប់ដំណើរជីវិតបុរសវិញមានដំណើរធម្មតាឥតមានឧបសគ្គត្រូវឆ្លងកាត់ច្រើននោះឡើយ។ដោយឡែកសម្រាប់អ្នកប្រកបរបររកស៊ីជួញដូរការរកផលចំណូលមិនត្រូវឱ្យអតិថិជនជំពាក់ប្រាក់ច្រើនទ្បើយប្រយ័ត្នជួបរឿងដូចពាក្យចាស់ថាពេលឱ្យជំពាក់ធូរដូចទឹកហូរ ឯការសងមកវិញតឹងដូចអូសឫស្សីបញ្ច្រាសចុងហើយស្រួលមិនស្រួលកើតមានជម្លោះវិវាទបែបស៊ីសាច់ហុតឈាមគ្នាទៀត។
រីឯសម្ព័ន្ធស្នេហាប្រុសស្រីមិនមានការជឿនលឿនទៅមុខទេគឺមានការថយក្រោយច្រើនជាង៕
ឆ្នាំថោះ
រាសីស្រុតចុះ។ នៅថ្ងៃនេះបើជាស្ត្រីធ្វើអ្វីតោងតែប្រយ័ត្នប្រយែងពីព្រោះថាងាយជួបនូវបញ្ហាមិនល្អចំពោះមុខផង។ចំណែកអ្នកប្រកបរបររកស៊ីជួញដូរបញ្ហាប្រាក់កាសបើទោះបីធ្វើអ្វីក៏ដោយតែងមិនឆ្លើយតបដូចសេចក្តីប្រាថ្នាទេគឺតែងមានការខកបំណងចូលយាយីជានិច្ច។អ្នកប្រកបរបររកស៊ីជួញដូរបើមានក្រុមមនុស្សប្លែកមុខយករបស់មកលក់ក្នុងតម្លៃថោកបែបណាក៏ដោយគប្បីប្រយ័ត្នប្រយែងក្រែងប៉ះចំរបស់ចោរត្រូវជាប់ការកុនដោយប្រការណាមួយ។
រីឯបញ្ហាសេចក្តីស្នេហាប្រុសស្រីមានទាំងផ្អែមល្ហែមនិងជូរចត់កំពុងនៅលាយឡំគ្នា៕
ឆ្នាំរោង
រាសីល្អជាមធ្យម។ នៅថ្ងៃនេះទោះបីលោកអ្នកបំពេញកិច្ចការងារអ្វីឃើញថាតែងផ្តល់ផលល្អនិងក្រុមមនុស្សជួយជ្រោមជ្រែងផង។ថ្ងៃនេះលោកអ្នកគប្បីមានការប្រយ័ត្នប្រយែងបន្តិចព្រោះងាយជួបគ្រោះចាញ់បោកគេណាស់ដែរ។ចំពោះអ្នកប្រកបរបររកស៊ីជួញដូរវិញមានភាពលំនឹងល្អ ហើយទោះជួញទីជិតឆ្ងាយអាចរកផលកម្រៃគ្រាន់ចិញ្ចឹមឆ្នាំងបាយអញ្ចឹងដែរ។
រីឯបញ្ហាគូស្នេហ៍ប្រុសស្រីកុំយកកំហឹងទល់កំហល់ដាក់ខ្លួនប្រយ័ត្នកើតរឿងធំឈានដល់ការបែកបាក់៕
ឆ្នាំម្សាញ់
រាសីល្អជាមធ្យម។ ក្នុងថ្ងៃនេះជួបបញ្ហាលំបាកចិត្តច្រើន ហើយបើចង់ធ្វើកិច្ចការធំៗមិនសូវទទួលលទ្ធផលដូចជាទីក្តីប្រាថ្នាឡើយគឺតែងមានការខកបំណងច្រើនជាង។អ្នកប្រកបរបររកស៊ីជួញដូរការចេញធ្វើជំនួញទីជិតឆ្ងាយមិនសូវជោគជ័យដូចបំណងប៉ុន្មានទេឬអាចនិយាយបានថាទោះជួញទីជិតឆ្ងាយផលកម្រៃច្រើនបំផុតគ្រាន់មួយទប់ទល់ចាយវាយប៉ុណ្ណោះ។ការធ្វើដំណើរទីជិតឆ្ងាយចូរប្រយ័ត្នក្រុមមនុស្សនាំទុក្ខដោយប្រការណាមួយ។
រីឯបញ្ហាសម្ព័ន្ធស្នេហាប្រុសស្រីជួបភាពប្រទាំងប្រទើសនិងចាប់កំហុសគ្នាមិនតិចនោះឡើយ៕
ឆ្នាំមមី
រាសីខ្ពស់ត្រដែត។ នៅថ្ងៃនេះលោកអ្នកបើចង់និយាយជាមួយនរណាម្នាក់គេតែងស្តាប់បង្គាប់ឬជឿតាមច្រើនជាងសព្វមួយដង។ក្រៅពីនេះបើលោកអ្នកចង់ទំនាក់ទំនងអ្វីមួយក៏តែងហុចផ្លែផ្កាមកវិញឆាប់រហ័សជានិច្ច។សម្រាប់អ្នកប្រកបរបររកស៊ីជួញដូរវិញមានការរីកលូតលាស់ទៅមុខសន្សឹមៗតែប្រយ័ត្នការកើតជម្លោះវិវាទណាមួយព្រោះតែសម្តីច្រំដែលឥតបានការ។ការធ្វើដំណើរទីជិតឆ្ងាយជួបសេចក្តីសុខក្សេមក្សាន្តដូចសព្វមួយដង។
រីឯសម្ព័ន្ធស្នេហាប្រុសស្រីបើមានចូលនិយាយដល់ចាស់ទុំឬចូលស្តីដណ្តឹងជាពេលវេលាល្អប្រពៃបំផុត៕
ឆ្នាំមមែ
រាសីខ្ពស់ត្រដែត។ នៅពេលនេះលោកអ្នកគប្បីគ្រប់គ្រងខ្លួនឯងឱ្យបានល្អពីព្រោះមានបញ្ហាខ្លះកំពុងយាយីតែយ៉ាងណាបើលោកអ្នកចេះដោះស្រាយនោះបញ្ហាធំសោះអាចប្រែជាតូចវិញពុំខាន។សម្រាប់អ្នកប្រកបរបររកស៊ីជួញដូរបញ្ហាប្រាក់កាសមានការលូតលាស់ទៅមុខគ្រាន់បើ ហើយបើទោះបីមិនច្រើនក៏មានការចូលគ្រាន់បំពេញក្រពះផងដែរ។ការធ្វើដំណើរទីជិតឆ្ងាយជួបសេចក្តីសុខក្សេមក្សាន្តដូចសព្វមួយដង។
រីឯបញ្ហាសេចក្តីស្នេហាកំលោះក្រមុំមានភាពផ្អែមល្ហែមនិងស្រស់ស្រាយប្រពៃណាស់៕
ឆ្នាំវក
រាសីល្អជាមធ្យម។ នៅថ្ងៃនេះបើទោះបីលោកអ្នកប្រកបការងារអ្វីឃើញថាមានការចម្រើនលូតលាស់សន្សឹមៗទៅមុខឥតមានបញ្ហាអ្វីយាយីច្រើននាំពិបាកឆ្លងកាត់នោះឡើយ។សម្រាប់អ្នកប្រកបរបររកស៊ីជួញដូរលោកអ្នកមិនគប្បីមានចិត្តឆាប់ប្រកែប្រកាន់ឬចិត្តច្រណែនឈ្នានីសលោភលន់ច្រើនប្រយ័ត្នឥតការអ្វីសោះយករឿងរាវក្តៅក្រហាយមកដាក់ខ្លួន។ចំពោះស្ត្រីមេផ្ទះចូរប្រយ័ត្នកូនតូចៗកើតរោគជំងឺឬដួលធ្លាក់ដោយប្រការណាមួយ។
រីឯបញ្ហាសម្ព័ន្ធស្នេហាកំលោះក្រមុំមានការប្រចែប្រច័ណ្ឌនិងមើលផ្លូវអាក្រក់ចំពោះគ្នាមិនតិចនោះឡើយ ៕
ឆ្នាំរកា
រាសីស្រុតចុះ។ នៅថ្ងៃនេះលោកអ្នកមិនគប្បីធ្វើអ្វីសំខាន់ឡើយពីព្រោះថាផលអាក្រក់ងាយកើតឡើងចំពោះមុខណាស់ដែរ។អ្នកប្រកបរបររកស៊ីជួញដូរជួបការពិបាកច្រើនព្រោះផលចំណូលរកបានដោយតានតឹងនិងភាគច្រើនលាភហេងច្រើនបោលហួសជានិច្ច។ការធ្វើដំណើរទីជិតឆ្ងាយជួបសេចក្តីសុខក្សេមក្សាន្តទាំងពេលទៅនិងត្រឡប់មកវិញ។
សម្ព័ន្ធស្នេហាកំលោះក្រមុំបើមិនទាន់មានគូគាប់កុំគប្បីឃើញភ្លាមស្រឡាញ់ភ្លែតប្រយ័ត្ននាំរឿងរាវអំពលទុក្ខនៅពេលក្រោយ៕
ឆ្នាំច
រាសីល្អជាមធ្យម។ មុនពេលដែលយើងបានទទួលអ្វីដែលសមដូចក្តីប្រាថ្នានោះចាំបាច់ណាស់ត្រូវពុះពារការលំបាកគ្រប់បែបយ៉ាងណាមួយខ្លះទើបផលសម្រេចកើតមាននៅពេលក្រោយឆ្លើយតបមកវិញ។អ្នកប្រកបរបររកស៊ីជួញដូរនៅថ្ងៃនេះទោះជួញទីជិតឆ្ងាយការរកផលកម្រៃមានភាពធូរស្បើយជាងមុនដោយលោកអ្នកអាចរកប្រាក់ចំណូលគ្រាន់សម្រាប់បំពេញបំពង់ ហើយបើចង់បណ្តាក់ទុនធ្វើអ្វីក៏តែងលូតលាស់គួរសមជានិច្ច។
រីឯបញ្ហាសេចក្តីស្នេហាកំលោះក្រមុំមានការប្រឆាំងនិងបង្កជម្លោះចំពោះគ្នាច្រើន៕
ឆ្នាំកុរ
រាសីល្អជាមធ្យម។ នៅថ្ងៃនេះការប្រកបការងារមិនសូវជឿនលឿនទៅមុខទេគឺមានការថយក្រោយមួយចំនួនគប្បីមានការប្រយ័ត្នប្រយែងបន្តិចទើបប្រសើរ ។សម្រាប់ថ្ងៃនេះដែរការប្រកបការងារលោកអ្នកគប្បីមានការប្រយ័ត្នប្រយែងពិសេសក្រុមមនុស្សទម្លាក់កំហុសអ្វីមួយទុកឱ្យនាំត្រូវជួបការលំបាករែកពន់នៅគ្រាខាងមុខ។ចំពោះលោកអ្នកប្រកបរបររកស៊ីជួញដូរវិញជួបភាពប្រទាំងប្រទើសច្រើនពិសេសឱ្យប្រយ័ត្នកើតជម្លោះវិវាទព្រោះតែសម្តីចរចាទៅរកគ្នា។
រីឯបញ្ហាសេចក្តីស្នេហាប្រុសស្រីមានការជឿនលឿនទៅមុខយឺតណាស់តែបើថយក្រោយវិញសឹងតែឈានដល់បែកបាក់ថែមទៀត៕