ខេត្តស្វាយរៀងៈលោក ម៉ែន វិបុល អភិបាលខេត្តស្វាយរៀង នៅថ្ងៃទី១៧ ខែមីនា ឆ្នាំ២០២០ បានអញ្ជើញអមដំណើរគណៈប្រតិភូ គណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក (គណៈកម្មការទី៣) នៃរដ្ឋសភា ដឹកនាំដោយលោក ជា វ៉ាន់ដេត ក្នុងគោលបំណងដើម្បីពិនិត្យ សិក្សាស្វែងយល់អំពីការអភិវឌ្ឍ ស្ថិតនៅតំបន់សេដ្ឋកិច្ចពិសេសស្វាយរៀងគីហ្គារីសស៍ ស្រុកស្វាយទាប តំបន់សេដ្ឋកិច្ចពិសេសមែនហាតធេនក្រុងបាវិត និងពិនិត្យច្រកទ្វាអន្តរជាតិបាវិត ។
គណៈប្រតិភូនៃការចុះបំពេញទស្សនកិច្ចនេះរួមមានលោក ជា វិទ្ធី អគ្គលេខាធិការរងគណៈកម្មាធិការ ក្រុមប្រឹក្សាវិនិយោគកម្ពុជា លោកអនុប្រធាន លេខាធិការ និងសមាជិកគណៈកម្មការទី៣ នៃរដ្ឋសភា លោក លោកស្រីជាអ្នកតំណាងរាស្ត្រមណ្ឌលខេត្តស្វាយរៀង លោក លោកស្រីជារដ្ឋលេខាធិការ អនុរដ្ឋលេខាធិការ តំណាងក្រសួងពាក់ព័ន្ធ លោកនាយករដ្ឋបាលសាលាខេត្ត លោកប្រធានមន្ទីរពាក់ព័ន្ធ អភិបាលស្រុកស្វាយទាប និងអភិបាលក្រុងបាវិត ព្រមទាំងមន្ត្រីពាក់ព័ន្ធមួយចំនួនទៀត ៕ វ៉ៃកូ