ក្រចេះ៖ អង្គការ WWF-កម្ពុជា នៅថ្ងៃទី១៨ ខែមីនា ឆ្នាំ២០២០នេះ បានចេញប្រកាសព័ត៌មានថា កាលពីថ្ងៃទី១៣ ប្រទះឃើញកូនផ្សោតទីបួន ថ្ងៃទី១៤ ប្រទះឃើញកូនផ្សោតមួយទៀត ដែលជាកូនផ្សោតទីប្រាំ ត្រូវបានកត់ត្រាក្នុងឆ្នាំ២០២០ នេះ។
អង្គការ WWF-កម្ពុជា បានបញ្ជាក់ថា “ក្រុមការងារស្រាវជ្រាវសត្វផ្សោតទន្លេមេគង្គ នៃរដ្ឋបាលជលផល ខណ្ឌរដ្ឋបាលជលផលខេត្តក្រចេះ និងខេត្តស្ទឹងត្រែង អង្គការ WWF-កម្ពុជា បានប្រទះឃើញកូនផ្សោត ទើបកើតថ្មីមួយក្បាលទៀត មានអាយុប្រហែលជាមួយថ្ងៃ កំពុងហែលក្នុងចំណោមហ្វូងផ្សោតធំចំនួនប្រាំ នៅអន្លង់ផ្សោតកាំពី ខេត្តក្រចេះ កាលពីថ្ងៃទី១៤ ខែមីនា ឆ្នាំ២០២០ ខណៈដែលក្រុមការងារកំពុងធ្វើការអង្កេត និងពិនិត្យតាមដានអត្ថសញ្ញាណ និងរាប់ចំនួនសត្វផ្សោតទន្លេមេគង្គ តាមទន្លេមេគង្គចាប់ពីខេត្តក្រចេះ ទៅដល់ខេត្តស្ទឹងត្រែងព្រំប្រទល់កម្ពុជា ឡាវ ដើម្បីធ្វើរបាយការណ៍ចំនួនសត្វផ្សោតទន្លេមេគង្គក្នុងប្រទេសកម្ពុជា ក្នុងត្រីមាសទីបីនៃឆ្នាំ២០២០។ តាមរបាយការណ៍នៃការអង្កេតចំនួនសត្វផ្សោតទន្លេមេគង្គក្នុងឆ្នាំ២០១៧ បានបង្ហាញថាមានសត្វផ្សោតចំនួន ៩២ ក្បាល ក្នុងទន្លេមេគង្គក្នុងខេត្តក្រចេះ និងស្ទឹងត្រែង”៕ដោយ៖កូឡាប