កាលពីពេលថ្មីៗនេះ មានការភ្ញាក់ផ្អើលជាខ្លាំង ក្រោយពេលតារាចម្រៀងក្នុងផលិតកម្មរស្មីហង្សមាស កញ្ញា ចំរើន សុភ័ក្ត្រ បានបង្ហោះវីដេអូមួយពីកាមេរ៉ាសុវត្ថិភាព បង្ហាញឲ្យឃើញចោរម្នាក់បានធ្វើសកម្មភាពជនសង្ស័យម្នាក់ចូលគាស់ទ្វារថយន្តរបស់កញ្ញា ដែលចតនៅមុខផ្ទះ បំរុងលួចយកទៅ ដោយមិនញញើតទាល់តែសោះ បើទោះជាផ្ទះកញ្ញាបានបើកភ្លើងនៅមុខផ្ទះក៏ដោយ។ សំណាងហើយ ដែលចោរនោះបានបាក់សោរ ខណៈពេលកំពុងចាក់គាស់ កុំអីឡានរបស់កញ្ញានឹងត្រូវបានជិះយកទៅបាត់ទៅហើយ ។
ក្រោយហេតុការណ៍នេះកើតឡើង កញ្ញា ចំរើន សុភ័ក្ត្រ ក៏បានការរាយការណ៍ទៅសមត្ថកិច្ចខណ្ឌមានជ័យ និងឈានចាប់ខ្លួនជនសង្ស័យខាងលើផងដែរ ។
នេះបើតាមទំព័រហ្វេសបុកកញ្ញា បានធ្វើការអរគុណដល់អធិការខណ្ឌមានជ័យយ៉ាងដូច្នេះថា៖ «នាងខ្ញុំចំរេីន សុភ័ក្ត្រ សូមថ្លែងអំណរគុណដល់លោកពូ ម៉េងវិមានដារា ដែលជាអធិការខណ្ឌមានជ័យ ដែលបានចាប់ជនល្មេីសគាស់ឡាននៅផ្ទះរបស់នាងខ្ញុំបានត្រឹមតែមួយយប់ ក្នុងនាមនាងខ្ញុំជាប្រជាពលរដ្ឋពិតជាសប្បាយចិត្តយ៉ាងខ្លាំង ជាចុងក្រោយសូមអោយគ្រប់អង្គភាពទាំងអស់មានសុខភាពល្អកំលាំងមាំមួនដេីម្បីជាម្លប់របស់ប្រជាពលរដ្ឋបន្តរទៀត ។» ៕ ដោយ៖ លឹម ហុង