កោះតៃវ៉ាន់នឹងធ្វើការហាមប្រាមបរទេស ស្ទើរតែទាំងអស់ មិនឲ្យចូលទឹកដីរបស់ខ្លួន លើកលែងតែបរទេស ដែលមានលិខិតអនុញ្ញាតឲ្យស្នាក់នៅ និងអ្នកការទូត ដែលនេះគឺជាវិធានការដើម្បីទប់ស្កាត់វីរុសកូរ៉ូណា។ នេះបើតាមការបញ្ជាក់របស់រដ្ឋាភិបាលនៅថ្ងៃពុធនេះ។
តៃវ៉ាន់ បានទទួលការសរសើរ ពីអ្នកជំនាញសុខាភិបាល ដោយសារតែមានកិច្ចប្រឹងប្រែងខ្លាំង ក្នុងការគ្រប់គ្រងការរីករាលដ នៃវីរុសកូរ៉ូណា បានយ៉ាងមានប្រសិទ្ធភាព ប៉ុន្តែបច្ចុប្បន្ននេះ មានការរាយការណ៍ ពីការកើនឡើងនៃករណីឆ្លងថ្មីរៀងរាល់ថ្ងៃ ពីប្រជាជនមកប្រទេសផ្សេងៗ ចូលទឹកដីតៃវ៉ាន់ ជាពិសេសប្រជាជនមកពីតំបន់អឺរ៉ុប។
រដ្ឋាភិបាលបានប្រាប់ប្រជាជនតៃវ៉ាន់ទាំងអស់ កុំឲ្យធ្វើដំណើរទៅក្រៅប្រទេស ប្រសិនជាមិនចាំបាច់ ហើយឥឡូវនេះ បានចាត់វិធានការគ្រប់គ្រង ដើម្បីបញ្ឈប់បរទេសចូលក្នុងទឹកដីខ្លួន។
រដ្ឋមន្ត្រីសុខាភិបាលតៃវ៉ាន់ Chen Shih-chung ដែលជាអ្នកប្រកាសពីវិធានការថ្មីនេះ បាននិយាយថា មនុស្សទាំងអស់ ដែលបានចូលតៃវ៉ាន់ ក៏នឹងត្រូវដាក់ឲ្យនៅដោយឡែករយៈពេល ១៤ថ្ងៃផងដែរ។
លោកបញ្ជាក់ថា ចំនួនករណីឆ្លងវីរុសមកពីខាងក្រៅ មានការកើនឡើងខ្លាំង។ បច្ចុប្បន្នតៃវ៉ាន់មានអ្នកឆ្លងវីរុស COVID-19 ចំនួន ៧៧ករណី។
រដ្ឋាភិបាលមិនបានប្រកាសឲ្យដឹងទេថាតើ វិធានការថ្មីនេះ នឹងត្រូវបញ្ចប់នៅពេលណា។
សូមបញ្ជាក់ថា រហូតមកដល់ពេលនេះ វីរុសកូរូណា បានផ្តាច់ជីវិតមនុស្សជិត ៨.០០០នាក់ និងឆ្លងដល់មនុស្សជិត ២០០.០០០នាក់ ទូទាំងពិភពលោក។ អ៊ីតាលីជាប្រទេសទី ២ ដែលមានអ្នកស្លាប់ និងឆ្លងច្រើនបំផុត បន្ទាប់ពីចិន៕
អត្ថបទប្រែសម្រួលដោយ៖ សុភ័ក្រ
ប្រភព៖ channelnewsasia
