ប្រទេសថៃកំពុងចាត់វិធានការដែលមិនធ្លាប់មានពីមុនមក ដើម្បីទប់ស្កាត់ការរីករាលដាលនៃវីរុស Covid-19 ដោយបិទសាលារៀន សាកលវិទ្យាល័យ និងកន្លែងកំសាន្ត ដែលរួមទាំងកន្លែងរាត្រីដ៏ពេញនិយមមួយចំនួន និងសូម្បីបានប្រកាសលើកពេលការប្រារព្ធសង្ក្រានឆ្នាំថ្មី ដែលជាពិធីបុណ្យចូលឆ្នាំថ្មីប្រពៃណីថៃ។
វិធានការណ៍នេះត្រូវបានធ្វើឡើង គឺបន្ទាប់ពីចំនួនករណីឆ្លងវីរុសកូរ៉ូណា១៩ បានកើនឡើងទ្វេដងក្នុងរយៈពេលតែ ៣ ថ្ងៃ ឈានដល់ទៅ ១៧៧ ករណី ក្នុងនោះមានករណីថ្មី ៣២ ករណីនៅថ្ងៃអាទិត្យ ៣៣ ករណីនៅថ្ងៃច័ន្ទ និង ៣០ ករណីថ្មីកាលពីម្សិលមិញ។
នាយករដ្ឋមន្ត្រី ប្រាយុទ្ធ ចាន់អូចា ដែលបានពាក់ម៉ាសការពារផងដែរនោះ បានប្រាប់អ្នកយកព័ត៌មានបន្ទាប់ពីកិច្ចប្រជុំគណៈរដ្ឋមន្ត្រីកាលពីម្សិលមិញថា “ មិនទាន់មានការបិទទូទាំងទីក្រុង ឬប្រទេស នៅឡើយទេ” ។
លោក ប្រាយុទ្ធ បានមានប្រសាសន៍បន្តថា៖ «យើងកំពុងកាត់បន្ថយឱកាសនៃការរីករាលដាលនៃជំងឺនៅក្នុងកន្លែងដែលមានហានិភ័យខ្ពស់ ដោយត្រូវតែបិទទីកន្លែងនោះតែម្តង» ។
សាលារៀន និងសាកលវិទ្យាល័យទូទាំងប្រទេស នឹងត្រូវបិទរយៈពេល ២ សប្តាហ៍ ដោយចាប់ផ្តើមពីថ្ងៃនេះ។ វិធានការផ្សេងទៀតត្រូវបានកំណត់បន្ថែមទៀតនៅក្នុងវិសាលភាព។
នៅទីប្រជុំជនទីក្រុងបាងកក កន្លែងកម្សាន្ត រួមទាំងហាងម៉ាស្សាល្បី ៗ នឹងបិទរយៈពេល ១៤ ថ្ងៃ។ រីឯកន្លែងផ្សេងទៀតរួមមានសង្វៀនប្រដាល់ វាលកីឡាការប្រណាំងសេះ និងសង្វៀនជល់មាន់ ក៏នឹងត្រូវបិទនៅក្នុងតំបន់បាងកក មិនមានជាដាច់ខាត “ដរាបណាស្ថានភាពប្រសើរឡើងវិញ” ៕
ដោយ៖ លឹម ហុង (ប្រភព៖ Reuters)
