ខេត្តស្វាយរៀង៖ បុរសម្នាក់បានស្លាប់ភ្លាមៗ ខណៈដែលបើកបរម៉ូតូវ៉ាជែង ក្នុងស្ថានភាពគ្រោះថ្នាក់ ជ្រុលទៅបុកត្រាក់ទ័រ ផ្លោងហោះចូលក្រោមកង់សណ្តោងរ៉ឺម៉កកិនស្លាប់។ ករណីនេះបានកើតឡើងកាលពីវេលាម៉ោង១៩ និង៥នាទី ថ្ងៃទី១៧ ខែមីនា ឆ្នាំ២០២០ នៅលើផ្លូវលេខ316A ស្ថិតក្នុងភូមិគោកល្វៀង សង្កាត់ព្រៃអង្គុញ ក្រុងបាវិត ខេត្តស្វាយរៀង។
យោងតាមសមត្ថកិច្ចបានឲ្យដឹងថា នៅមុនពេលកើតហេតុមានម៉ូតូមួយគ្រឿង ម៉ាក (junter) ពណ៌ក្រហម ពាក់ផ្លាកលេខ61Z4-2839 បើកបរដោយឈ្មោះ សេក វិត ភេទប្រុស អាយុ២៧ឆ្នាំ ជនជាតិខ្មែរ មានទីលំនៅភូមិព្រៃឣង្គុញ សង្កាត់ព្រៃឣង្គុញ ក្រុងបាវិត ខេត្តស្វាយរៀង (ម៉ូតូមានកញ្ចក់មើលក្រោយ គ្មានមួកសុវត្ថិភាព) ធ្វើដំណើរទិសដៅស្របទិសគ្នាពីលិចទៅកើត។ លុះមកដល់ចំណុចកើតហេតុខាងលើ បានបុកប៉ះត្រាក់ទ័រមួយគ្រឿង បុកប៉ះកង់ត្រាក់ទ័រ ពណ៌ក្រហម បើកបរដោយឈ្មោះ ស៊ុ ណត ភេទប្រុស អាយុ៣២ ឆ្នាំ ជនជាតិខ្មែរ មានទីលំនៅភូមិកោះឬស្សី ឃុំទួលស្ដី ស្រុកចន្ទ្រា ខេត្តស្វាយរៀង បណ្តាលឲ្យដួលត្រូវកង់សណ្តោងរ៉ឺម៉កត្រាក់ទ័រ កិនចំក្បាលបណ្ដាលឲ្យស្លាប់ នៅហ្នឹងកន្លែងកើតហេតុតែម្តង។
បច្ចុប្បន្នសាកសព សមត្ថកិច្ចយើងបានធ្វើកំណត់ ហេតុប្រគល់ឲ្យទៅក្រុមគ្រួសារ យកទៅធ្វើបុណ្យតាមប្រពៃណី។ រីឯវត្ថុតាងទាំង២គ្រឿង ត្រូវបានយកមករក្សាទុក នៅប៉ុស្តិ៍នគរបាលរដ្ឋបាលព្រៃអង្គុញ។ ចំណែកអ្នកបើកបរត្រាក់ទ័រ ត្រូវបានសម្ថកិច្ចយកមកអធិការដ្ឋាន ដើម្បីបំពេញសំណុំរឿងតាមនីតិវិធីច្បាប់៕ ដោយ៖វ៉ៃកូ