ភ្នំពេញ៖ ក្រសួងសុខាភិបាល បានចេញសេចក្តីជូនព័ត៌មានស្ដីពី “អាល់កុល” ។ បើតាមសេចក្ដីជូនព័ត៌មានរបស់ក្រសួងសុខាភិបាលបានណែនាំឱ្យ ម្ចាស់ឱសថស្ថាន និងឱសថការីទទួលបន្ទុកបច្ចេកទេសនៅតាមឱសថស្ថាន នៅកម្ពុជា ត្រូវទិញអាល់កុល ដែលមានប្រភពច្បាស់លាស់ ស្របពេលដែលមានតម្រូវការខ្ពស់ដើម្បីបង្ការកូវីដ១៩។
បច្ចុប្បន្នមានឱសថស្ថាន ឱសថស្ថានរងមួយចំនួន បានទិញអាល់កុលមកលក់ ពុំមានប្រភពច្បាស់លាស់ ដែលមានគុណភាពមិនត្រឹមត្រូវតាមស្ដង់ដារ។
អាល់កុលប្រើប្រាស់សម្រាប់សម្លាប់មេរោគ គឺជាល្បាយដែលមានសារធាតុអេតាណុលជាមួយទឹក មិនត្រូវមានសារធាតុផ្សេងទៀតទេ ពិសេសសារធាតុមេតាណុល ដែលអាចបណ្ដាលឱ្យពុល និងគ្រោះថ្នាក់ដល់អាយុជីវិតផង ក្នុងករណីប្រើប្រាស់មិនបានត្រឹមត្រូវ។
ខណៈដែលប្រជាពលរដ្ឋទាំងអស់កំពុងត្រូវការអាល់កុលជាចាំបាច់ ក្នុងការបង្ការការចម្លងវីរុសកូវីដ១៩ នៅកម្ពុជា ដោយអាល់កុលមួយចំនួន មានការលាយសារធាតុមេតាណុលជាមួយអេតាណុល និងអាល់កុលមួយចំនួនទៀត ពុំមានសារធាតុអេតាណុលទេ គឺមានតែសារធាតុមេតាណុលតែប៉ុណ្ណោះ។ ក្រសួងសុខាភិបាល បានជម្រាបដល់សាធារណជនឱ្យបានជ្រាបថា ប្រើប្រាស់សម្រាប់សម្លាប់មេរោគ គឺជាល្បាយដែលមានសារធាតុ អេតាណុលជាមួយទឹក ដោយមិនត្រូវមានសារធាតុផ្សេងទៀតទេ ជាពិសេសសារធាតុមេតាណុល។ ចំពោះសារធាតុមេតាណុលមិនត្រូវបានគេប្រើប្រាស់សម្រាប់សម្លាប់មេរោគទេ ដោយសារធាតុនេះ មានមុខងារសម្លាប់មេរោគខ្សោយបំផុត ប៉ុន្តែវាអាចបណ្ដាលឲ្យពុលនឹងគ្រោះថ្នាក់ដល់អាយុជីវិតទៀតផង ក្នុងករណីប្រើប្រាស់សារធាតុនេះមិនបានត្រឹមត្រូវ។
លោកស្រី ឱ វណ្ណឌី អ្នកនាំពាក្យ និងជារដ្ឋលេខាធិការក្រសួងសុខាភិបាល បានថ្លែងបញ្ជាក់ថា គ្រប់ឱសថស្ថាន ឱសថស្ថានរង ត្រូវទិញអាល់កុលដែលមានប្រភពច្បាស់លាស់ ដោយមានវិក្កយបត្ររក្សាទុកត្រឹមត្រូវ ដើម្បីឲ្យក្រសួងសុខាភិបាល អាចតាមដាន ក៏ដូចជាស្វែងរកប្រភពជាក់លាក់ នៅពេលដែលរកឃើញថាអាល់កុលនោះ ពុំមានគុណភាពត្រឹមត្រូវ៕ដោយ៖កូឡាប