ថ្លែងក្នុងសន្និសីទកាសែត នៅទីស្តីការគណៈរដ្ឋមន្ត្រីនាព្រឹកថ្ងៃទី១៨ ខែមែនា ឆ្នាំ២០២០ អ្នកស្រីវេជ្ជបណ្ឌិត ឱ វណ្ណឌីន អ្នកនាំពាក្យក្រសួងសុខាភិបាល បានបញ្ជាក់ថា អាការៈបុរសខ្មែរអាយុ៣៨ឆ្នាំ ដែលឆ្លងកូវីដ-១៩ និង កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាម សុខភាពរបស់គាត់ពុំធ្ងន់ធ្ងរនោះទេ ពោលគឺធម្មតា ហើយបើតាមការត្រួតពិនិត្យឃើញថា វីរុសដែលផ្ទុកនៅក្នុងខ្លួនរបស់គាត់បានថយចុះជាបណ្តើរៗគួរឲ្យកត់សម្គាល់ និងសង្ឃឹមថា គាត់វិវត្តន៍ទៅរកភាពល្អប្រសើរ ហើយអាចនឹងជាសះស្បើយនៅពេលឆាប់ៗខាងមុខ ។
អ្នកស្រីវេជ្ជបណ្ឌិត ក៏បានបញ្ជាក់ឲ្យដឹងទៀតថា «ដោយឡែក មានករណីមួយចំនួនទៀត ដែលលើកលែងតែជនជាតិអង់គ្លេសចំនួន៣នាក់ ដែលមានវ័យចំណាស់ យើងសង្កេតឃើញថា អ្នកជំងឺដែលវ័យស្របាល ២០ ក្រាស់ រហូតដល់ ៤០ ក្រាស់ គឺស្ថិតក្នុងកម្លាំងពលំខ្លាំងក្លា តែយើងនឹងតាមដានសុខភាពរបស់ជាបន្តទៀត ប៉ុន្តែ មកទល់បច្ចុប្បន្ននេះ អាការសុខភាពរបស់ពួកគាត់ហាក់ដូចពុំបង្ហាញការវិវត្តន៍ធំដុំគួរឲ្យព្រួយបារម្ភនោះទេ ពោលគឺពួកគាត់មួយចំនួនធំ មានសភាពសុខភាពធម្មតានៅឡើយ…» ។
សូមបញ្ជាក់ថា គិតត្រឹមថ្ងៃទី១៨ ខែមីនា ឆ្នាំ២០២០ ម្សិលមិញ កម្ពុជា រកឃើញមនុស្ស៣៥នាក់ហើយ ដែលឆ្លងកូវីដ-១៩ ដោយក្នុងនោះ មានម្នាក់ គឺបុរសជនជាតិចិន បានជាសះស្បើយវិញ៕ ដោយ៖ លឹម ហុង
