ទីក្រុងវូហាន ត្រូវគេរំពឹងថា នឹងលែងមានករណីឆ្លងថ្មីនៅចុងខែមីនានេះ ហើយការបិទទីក្រុងនេះ នឹងត្រូវបើកដំណើរការវិញ នៅពេលដែលគ្មានការឆ្លងថ្មីក្នុងរយៈពេល ១៤ថ្ងៃ។
ទោះយ៉ាងណាក៏ដោយ វិធានការបង្ការ និងគ្រប់គ្រងជំងឺ នឹងនៅតែត្រូវការ ដើម្បីការពារកុំឲ្យមានលទ្ធភាព នៃការរីករាលដាលឡើងវិញ។ នេះបើតាមការចុះផ្សាយរបស់ China Daily ដោយដកស្រង់សម្តីរបស់លោក Li Lanjuan អ្នកជំនាញសិក្សាពីរោគរាតត្បាត។
“ប្រសិនជាមិនមានករណីឆ្លងថ្មីរយៈពេល ១៤ថ្ងៃជាប់គ្នា នៅក្នុងទីក្រុងវូហាន ពួកយើងជឿជាក់ថា វាគឺជាពេលវេលា ដែលត្រូវដកចេញនូវវិធានការបិទក្រុង”។
លោក Li Lanjuan រំពឹងថា ករណីឆ្លងថ្មីនឹងត្រូវបញ្ចប់នៅពាក់កណ្តាល ឬចុងខែមីនានេះ។
សូមបញ្ជាក់ថា ទីក្រុងវូហាន ដែលមានប្រជាជន ១១លាននាក់ ត្រូវបានបិទចាប់តាំងពីពិធីបុណ្យចូលឆ្នាំចិន អំឡុងពាក់កណ្តាលខែមករា ហើយវានៅតែជាទីក្រុង ដែលគេចាត់ទុកថា មានគ្រោះថ្នាក់ខ្លាំងនៅក្នុងខេត្តហូបេ។
ចំនួនអ្នកស្លាប់នៅក្នុងខេត្តហូប មាន ៣.១៣០នាក់ គិតត្រឹមថ្ងៃទី ១៨ ខែមីនា ដែលវាច្រើនជាង ១ភាគ ៣នៃចំនួនអ្នកស្លាប់ជាង ៨.០០០នាក់ទូទាំងពិភពលោក។
នៅថ្ងៃពុធម្សិលមិញនេះ ទីក្រុងវូហាន មិនមានការឆ្លងថ្មីជាលើកដំបូង ចាប់តាំងពីមានការផ្ទុះមក។ កាលពីថ្ងៃ ចន្ទ និងអង្គារ ទីក្រុងវូហានមានការឆ្លងត្រឹមតែ ២ករណីប៉ុណ្ណោះ។ នៅក្នុងខេត្តហូបេ មិនាមានការឆ្លងថ្មីឡើយ ក្នុងរយៈពេលជិត ២សប្តាហ៍ចុងក្រោយ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia