តាមសេចក្តីជូនដំណឹង របស់ក្រសួងសុខាភិបាលកម្ពុជា នោះគិតត្រឹមថ្ងៃទី១៨ ខែមីនា ឆ្នាំ២០២០ ចំនួនអ្នកឆ្លងជំងឺកូវីដ១៩ ក្នុងប្រទេសកម្ពុជា មានការកើនឡើងគួរឲ្យកត់សម្គាល់រហូតដល់ ៣៥ ករណី ។ ការធ្វើតេស្តរកឃើញឆ្លងកូវីដ១៩ ភាគច្រើន គឺជាខ្មែរអ៊ីស្លាម ដែលបានវិល ត្រឡប់មកពីពិធីបុណ្យសាសនានៅឯប្រទេសម៉ាឡេស៊ី និងព្រមទាំងជនជាបរទេសមួយចំនួនទៀតផងដែរ។
ជាមួយការព្រួយបារម្ភនេះ រាជរដ្ឋាភិបាល ក៏ដូចក្រសួងសុខភិបាល បានមានវិធានការយ៉ាងយកចិត្តទុកដាក់ខ្ពស់ ដើម្បីទប់ស្កាត់ការរីករាលនៃជំងឺកូវីដ ១៩ ដោយក្នុងនោះតាមរយៈការបិទសាលារៀនវ៉ាកងមិនពេលកំណត់ ផ្អាកការបើកក្លឹបកម្សាន្ត ខារ៉ាអូខេ រោងភាពយន្ត និងទីកន្លែងប្រមូលផ្តុំសប្បាយមួយចំនួនទៀត នៅទូទាំងប្រទេស ។
ភ្ជាប់នឹងវិធានការទប់ស្កាត់ខាងលើនេះ គេសង្កេតឃើញថា កម្មពិធីមង្គលការមួយចំនួន ក៏ត្រូវបានប្រកាសលើកពេលផងដែរ ព្រោះតែព្រួយបារម្ភភ្ញៀវពុំមកចូលរួម ខ្លាចឆ្លងវីរុស Covid-19 ។ ជាក់ស្តែង ដូចជាមង្គលការប៉ុន្មានរោងកាលពីយប់មិញនេះ ត្រូវបានអ្នកលេងហ្វេសប៊ុកបង្ហោះឲ្យដឹងថា គឺស្ងាត់ភ្ញៀវឈឹងតែម្តង ដែលធ្វើឲ្យម្ចាស់ដើមការបានត្រឹមទឹកមុខស្រពោនបាយទឹកលែងឆ្ងាញ់ ។
ដោយឡែក ថ្មីៗនេះ មានការភ្ញាក់ផ្អើលជាខ្លាំង ខណៈគូស្វាមីភរិយាថ្មីថ្មោងមួយគូបានប្រកាសថាមិនលើកថ្ងៃពិធីមង្គលការទេ ប៉ុន្តែ ប្រែមកជាធ្វើពិធីសែនវិញ ត្រឹមត្រឹមម៉ែពុក តាយាយ អ៊ុំពូមីង មាន់១គូ ទា១គូ ផ្លែឈើ៥គូ បាយសម្ល១តុ ក៏ពួកគាត់អាចកសាងគ្រួសារតូចមួយនេះបានដែរ ចាំដល់ Covid-19 រសាយបាត់ ចាំគិតធ្វើខួបអាពាហ៍ពិពាហ៍ជាថ្មី ក៏មិនហួសពេល ។
នេះបើយោងតាមហ្វេសប៊ុកឈ្មោះ YaYa Darling បានបង្ហោះឲ្យដឹងថា៖ «មួយជាតិការម្ដង មិនគួរណាជួបបញ្ហាបែបនេះសោះមេីលទៅ ក្បាលជ្រូក១ មាន់១គូរ ទា១គូរ ផ្លែឈេី៥គូរ បាយសម្ល១តុ សំពះមេបា សែនដូនតាជាការស្រេច។ពេលនេះអ្វីដែលត្រូវគិតគឺ សេដ្ឋកិច្ចគ្រួសារ បញ្ហាធនាគា ផ្ទះជួល លក់ដូរអត់ដាច់ អត់អីស៊ី ទេីបសំខាន់ ហេងដែរ ចេះមានរូបថត pre-wedding កុំអីអត់ស្គាល់ជាតិកូនក្រមុំនិងគេសូមទោសសាច់ញាតិ អូនសែនព្រេនហេីយ
ចាំឆ្នាំក្រោយធ្វេីខួបអាពាហ៍ពិពាហ៍ ចាំដាក់អោយអស់ដៃ មានត្រឹមម៉ែពុក តាយាយ អ៊ុំពូមីង ក៏អូនអាចកសាងគ្រួសារតូចមួយនេះបានដែរ។ សែនហេីយរៀបគម្រោងយកកូនហ្មង ខ្ជិលគិត មិនមែនស្រុកខ្មែររំសាយតែគូរអូនណា គូរគេក៏រំសាយដែរ» ៕
អត្ថបទ៖ លឹម ហុង
